ସମୀକ୍ଷା ବ୍ୟୁରୋ
ଆଜି ଦିନ ତମାମ କଂଗ୍ରେସ କାର୍ଯ୍ୟକାରୀଣି କମିଟ ବୈଠକରେ କସରତ ପରେ ସୋନିଆ ଗାନ୍ଧିଙ୍କୁ ଅନ୍ତରିଣ ସଭାପତି ଭାବେ ନିର୍ବାଚିତ କରାଯାଇଛି। କଂଗ୍ରେସ କାର୍ଯ୍ୟାଳୟରେ ବସିଥିବା ଏହି କମିଟ ବୈଠକରେ ଏପରି ନିଷ୍ପତି କରାଯାଇଛି ବୋଲି ବରିଷ୍ଠ ନେତା ଗୁଲାମନବୀ ଆଜାଦ କହିଛନ୍ତି। ଏହି ଗୁରୁତ୍ବପୂର୍ଣ୍ଣ ବୈଠକରେ ପ୍ରଥମେ ରାହୁଳ ଗାନ୍ଧୀଙ୍କୁ ପୁଣି ଥରେ ସଭାପତି ହେବା ପାଇଁ ଅନୁରୋଧ କରାଯାଇଥିଲା। ହେଲେ ସେ ସଭାପତି ହେବେ ନାହିଁ ବୋଲି ପୁଣି ଥରେ ମନା କରିଦେଲେ। ଏହାପରେ କାର୍ଯ୍ୟକାରିଣୀ କମିଟ, ସଭାପତି ବାଛିବା ପାଇଁ ଏକ କମିଟ ଗଠନ କରାଗଲା। ଆଉ ସେହି କମିଟରେ ସୋନିଆ ରାହୁଳ ଏବଂ ପ୍ରିୟଙ୍କାଙ୍କ ସହିତ ଅନ୍ୟମାନେ ରହିବେ ବୋଲି ଘୋଷଣା କରାଗଲା। ହେଲେ ଶେଷ ମୂହୁର୍ତ୍ତରେ ଏହି କମିଟରେ ଗାନ୍ଧି ପରିବାରର କେହି ରହିବେ ନାହିଁ ବୋଲି ରାହୁଳ କହିଲେ। ତାପରେ ପୁଣି ଥରେ କସରତ ଆରମ୍ଭ ହେଲା କିଏ ହେବ ସଭାପତି। ହେଲେ ଶେଷ ପର୍ଯ୍ୟନ୍ତ କୌଣସି ନିଷ୍କର୍ସ ବାହାରିପାରିଲା ନାହିଁ। ଫଳରେ କାର୍ଯ୍ୟକାରୀ କମିଟ ସର୍ବସମ୍ମତି କ୍ରମେ ନିଷ୍ପତି କଲେ ଯେ ନୂଆ ସଭାପତି ନିର୍ବାଚିତ ହେବା ପର୍ଯ୍ୟନ୍ତ ସୋନିଆ ଗାନ୍ଧି ଅନ୍ତରିଣ ସଭାପତି ରହିବେ। ଏଥିରେ ସୋନିଆ ମଧ୍ୟ କୁଆଡେ ରାଜି ହୋଇଚନ୍ତି ବୋଲି ଗଣମାଧ୍ୟକୁ କଂଗ୍ରେସର ବରିଷ୍ଠ ନେତାମାନେ କହିଛନ୍ତି।