ଭୁବନେଶ୍ଵର: NALCOର କର୍ପୋରେଟ୍ ସାମାଜିକ ଦାୟିତ୍ୱବୋଧ ପଦକ୍ଷେପ ଅଧୀନରେ ଆରମ୍ଭ ହୋଇଛି ପ୍ରୋଜେକ୍ଟ ଇନ୍ଦ୍ରଧନୁଷ। ଏହି କାର୍ଯ୍ୟକ୍ରମ ଅଧୀନରେ, NALCO କୋରାପୁଟ ଜିଲ୍ଲାର ଖଣି ଏବଂ ରିଫାଇନାରୀ କମ୍ପ୍ଲେକ୍ସର ପାର୍ଶ୍ୱବର୍ତ୍ତୀ ଗ୍ରାମଗୁଡ଼ିକର ଅନୁସୂଚିତ ଜନଜାତି ପିଲାମାନଙ୍କୁ ପୃଷ୍ଠପୋଷକତା ପ୍ରଦାନ କରିଆସୁଛି। ଯେଉଁମାନେ ସ୍କୁଲ ଛାଡିଛନ୍ତି କିମ୍ବା କେବେ ଆନୁଷ୍ଠାନିକ ଶିକ୍ଷା ଗ୍ରହଣ କରିନାହାଁନ୍ତି, ସେମାନେ ଏବେ ଭୁବନେଶ୍ୱରର କଳିଙ୍ଗ ଇନଷ୍ଟିଚ୍ୟୁଟ୍ ଅଫ୍ ସୋସିଆଲ ସାଇନ୍ସେସ୍ – କିସରେ ରହି ମାଗଣାରେ ପ୍ରାଥମିକ ଶିକ୍ଷାଠାରୁ ଉଚ୍ଚ ଶିକ୍ଷା ଗ୍ରହଣ କରିପାରୁଛନ୍ତି। ସେମାନଙ୍କୁ ବୈଷୟିକ ଶିକ୍ଷା ମଧ୍ୟ ପ୍ରଦାନ କରାଯାଉଛି। ଏଥିପାଇଁ ନାଲକୋ ରହିବା, ଖାଇବା ଓ ସମସ୍ତ ଶୈକ୍ଷିକ ଖର୍ଚ୍ଚ ବହନ କରୁଛି।
ଏହି ପଦକ୍ଷେପରେ ଛାତ୍ରଛାତ୍ରୀମାନେ ବେଶ୍ ଉପକୃତ ହୋଇପାରିଛନ୍ତି। ବଣ ଜଙ୍ଗଲ ଅଧ୍ୟୁଷିତ ଗାଁରେ ଶିକ୍ଷା ଗ୍ରହଣ କ୍ଷେତ୍ରରେ ଅସୁବିଧା ହେଉଥିଲା। ଏବେ ସହରରେ ଆସି ଶିକ୍ଷା ଗ୍ରହଣ ସହ ଖେଳକୁଦ, ବୃତ୍ତିଗତ ଶିକ୍ଷା ପାଇପାରୁଛନ୍ତି। ଏହା ସେମାନଙ୍କର ଆତ୍ମବିଶ୍ୱାସ ସୃଷ୍ଟି କରୁଛି। ଆଗାମୀ ଦିନରେ ସେମାନେ ଉଚ୍ଚତ୍ତର ଶିକ୍ଷା ହାସଲ କରିବା ନେଇ ଲକ୍ଷ୍ୟ ରଖିଛନ୍ତି।
ଶିକ୍ଷା ବ୍ୟତୀତ, ପ୍ରୋଜେକ୍ଟ ଇନ୍ଦ୍ରଧନୁଷ ଦକ୍ଷତା ବିକାଶ ଏବଂ ସାମଗ୍ରିକ ବ୍ୟକ୍ତିତ୍ୱ ଅଭିବୃଦ୍ଧିକୁ ପ୍ରୋତ୍ସାହିତ କରିଆସୁଛି। ଛାତ୍ରଛାତ୍ରୀମାନଙ୍କୁ ଏକ ଉତ୍ତମ ଭବିଷ୍ୟତ ଏବଂ ସମାଜର ମୁଖ୍ରସ୍ରୋତରେ ଅଂଶଗ୍ରହଣ ପାଇଁ ପ୍ରସ୍ତୁତ କରିବାରେ ସାହାଯ୍ୟ କରୁଛି।
ପ୍ରୋଜେକ୍ଟ ଇନ୍ଦ୍ରଧନୁଷ ମାଧ୍ୟମରେ, NALCO ଦୁର୍ଗମ ଅଞ୍ଚଳର ପିଲାମାନଙ୍କୁ ଶିକ୍ଷା ମାଧ୍ୟମରେ ଅନ୍ତର୍ଭୁକ୍ତିମୂଳକ ଅଭିବୃଦ୍ଧି ଏବଂ ସାମାଜିକ ପରିବର୍ତ୍ତନ ପ୍ରତି ପ୍ରତିବଦ୍ଧତାକୁ ସୁଦୃଢ଼ କରିଚାଲିଛି।