ଭୁବନେଶ୍ବର: ଭାରତୀୟ ରାଜନୀତିର ପ୍ରତିଷ୍ଠିତ ବ୍ୟକ୍ତିତ୍ବ, ଓଡ଼ିଶାର ଗର୍ବ, ଆନ୍ଧ୍ରପ୍ରଦେଶ ଓ ଛତିଶଗଡ଼ର ପୂର୍ବତନ ରାଜ୍ୟପାଳ, ଶ୍ରୀଯୁକ୍ତ ବିଶ୍ୱଭୂଷଣ ହରିଚନ୍ଦନଙ୍କ ଦ୍ୱାରା ରଚିତ ଓଡ଼ିଆ ପୁସ୍ତକ ‘ଏ ମାଟି କଥା କହେ’ ଏବଂ ଇଂରାଜୀ ପୁସ୍ତକ ‘ବକ୍ସି ଜଗବନ୍ଧୁ: ଦ ଗ୍ରେଟ୍ କମାଣ୍ଡର’ର ଲୋକାର୍ପଣ ହୋଇଯାଇଛି। ରାଜ୍ୟପାଳ ଡ ହରିବାବୁ କୁମ୍ବମପାଟି ଏବଂ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହାକୁ ଲୋକାର୍ପଣ କରିଛନ୍ତି।
ଭୁବନେଶ୍ବରର କୃଷି ବିଶ୍ବବାଦ୍ୟାଳୟର କୃଷି ଶିକ୍ଷା ସଦନ ପ୍ରେକ୍ଷାଳୟରେ ଆୟୋଜିତ ଏହି ଉତ୍ସବରେ ଲେଖକ ବିଶ୍ବଭୂଷଣ ହରିଚନ୍ଦନ ଉପସ୍ଥିତ ରହି ନିଜର ଅଭିବ୍ୟକ୍ତି ପ୍ରକାଶ କରିଥିଲେ। ପାଇକ ପୁଅ ଭାବେ ପରିଚିତ ବିଶ୍ବଭୂଷଣ ହରିଚନ୍ଦନଙ୍କ ଏହି ଦୁଇଟି ପୁସ୍ତକ ଓଡିଶାର ପାଇକ ବିଦ୍ରୋହ ଏବଂ ପାଇକ ବିରତ୍ବର ଗାଥା ବର୍ଣ୍ଣିତ କରାଯାଇଛି। ପୁସ୍ତକ ସଂପର୍କରେ ଖୋଦ ବିଶ୍ବଭୂଷଣ ହରିଚନ୍ଦନ ନିଜର ପାଇକ ଚେତନାକୁ ପରିପ୍ରକାଶ କରିଥିଲେ।
ପୁସ୍ତକ ଦ୍ବୟକୁ ଉନମୋଚନ କରି ରାଜ୍ୟପାଳ କୁମ୍ବମପାଟି ବିଶ୍ବଭୂଷଣଙ୍କ ଏହି ଉଦ୍ୟମକୁ ବେଶ ପ୍ରଶଂସା କରିଥିଲେ। ସେ କହିଥିଲେ ଯେ, ଏହି ପୁସ୍ତକଦ୍ୱୟରେ ମାତୃଭୂମି ପ୍ରତି ନିଷ୍ଠାପୂର୍ଣ୍ଣ ସେବା ଓ ଅପାର ଭଲପାଇବା, ଦେଶପ୍ରେମ ଏବଂ ସମାଜ ପ୍ରତି ମଣିଷର ଦାୟିତ୍ୱବୋଧ ସୁନ୍ଦର ଭାବେ ପ୍ରତିଫଳିତ ହୋଇଛି। ପାଇକ ବିଦ୍ରୋହର ମହାନାୟକ ବକ୍ସି ଜଗବନ୍ଧୁଙ୍କ ବୀରତ୍ୱଗାଥା ସହ ଓଡ଼ିଶାର ଗୌରବମୟ ଅତୀତ, ଗର୍ବିତ ପରମ୍ପରା, ସ୍ୱାଭିମାନ ଓ ବୀରତ୍ୱକୁ ଏହି ପୁସ୍ତକଦ୍ୱୟରେ ସଜୀବ ଭାବେ ଉପସ୍ଥାପନ କରାଯାଇଛି। ଏହା ଆଜିର ଯୁବପିଢ଼ିଙ୍କ ମନରେ ଜାତୀୟ ଭାବନା ଅଙ୍କୁରିତ କରିବ ବୋଲି ଦୃଢ଼ ଆଶା ରହିଛି।
ଏହି ଉପଲକ୍ଷେ ମୁଖ୍ୟମନ୍ତ୍ରୀ ମୋହନ ମାଝୀ ନିଜର ଅଭିଭାଷଣ ରଖି କହିଥିଲେ ଯେ,ବିଶ୍ବଭୂଷଣଙ୍କ ପ୍ରେରଣାଦାୟୀ ଆତ୍ମଜୀବନୀ ‘ସଂଗ୍ରାମ ସରିନାହିଁ’, ପାଠକ ମହଲରେ ଅନେକ ପ୍ରଂଶସା ସାଉଁଟିଛି । ଏହି ଗ୍ରନ୍ଥଗୁଡ଼ିକର ଇଂରାଜୀ, ହିନ୍ଦୀ ଓ ତେଲୁଗୁ ଅନୁବାଦ ମାଧ୍ୟମରେ ସେ ସାରା ଦେଶରେ ଓଡ଼ିଆ ସାହିତ୍ୟ ଓ ଚିନ୍ତାଧାରାକୁ ପରିଚିତ କରାଇଛନ୍ତି।
ଏପରି ଜଣେ ଅନୁଭବୀ ମହାନ୍ ସାରସ୍ୱତ ସାଧକଙ୍କ ଲେଖନୀରୁ ଜନ୍ମ ନେଇଥିବା ଏହି ପୁସ୍ତକଗୁଡ଼ିକ ଛାତ୍ରଛାତ୍ରୀ, ଗବେଷକ, ବୁଦ୍ଧିଜୀବୀ ଓ ସାଧାରଣ ପାଠକ — ସମସ୍ତଙ୍କ ପାଇଁ ଏକ ଅମୂଲ୍ୟ ସମ୍ପଦ ହେବ ବୋଲି ମୋର ଦୃଢ଼ ବିଶ୍ୱାସ।
ବିଶ୍ୱଭୂଷଣ ବାବୁ, ଆମ ସମସାମୟିକ ରାଜନୈତିକ ଜୀବନରେ ସବୁଠାରୁ ଅଭିଜ୍ଞ ଓ ସବୁଠାରୁ ଜ୍ଞାନୀ । ତାଙ୍କର ଦୀର୍ଘ ଅଭିଜ୍ଞତାପୂର୍ଣ୍ଣ ଜୀବନ ହିଁ ଆମ ପାଇଁ ପଥପ୍ରଦର୍ଶକ। ବକ୍ସିଙ୍କ ପରି ସେ କେବେ ସାଲିସ୍ କରିନାହାନ୍ତି ଏବଂ ଗୋପବନ୍ଧୁଙ୍କ ପରି ଜନସେବାରେ ନିୟୋଜିତ ଥାଇ ମଧ୍ୟ ସାରସ୍ୱତ ସାଧନାକୁ ମଧ୍ୟ ଛାଡ଼ିନାହାନ୍ତି । ଏହା ଆମ ସମସ୍ତଙ୍କ ପାଇଁ ନିଶ୍ଚିତ ଭାବେ ପ୍ରେରଣା ।
ଏହି ଉତ୍ସବ ମଞ୍ଚରେ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ, ସମ୍ବାଦର ପ୍ରତିଷ୍ଠାତା ସୌମ୍ୟରଂଜନ ପଟ୍ଟନାୟକ, ସାହିତ୍ୟିକ ବିଜୟାନନ୍ଦ ସିଂହ ଏବଂ ଅନୁବାଦକ ଭଗବାନ ଜୟସିଂହ ଉପସ୍ଥିତ ଥିଲେ। ଏଥିସହିତ ପୂର୍ବତନ ସାଂସଦ ପ୍ରସନ୍ନ ପାଟ୍ଟଶାଣୀ, ପୂର୍ବତନ ମନ୍ତ୍ରୀ ପ୍ରଫୁଲ ଘଡେଇ, ବିଧାୟକ ବାବୁ ସିଂ, ମେୟର ସୁଲୋଚନା ଦାସ, ସାହିତ୍ୟିକ ଗୌରହରି ଦାସ ପ୍ରମୁଖ ଯୋଗ ଦେଇଥିଲେ।