ଭୁବନେଶ୍ବର: ଓଡିଶା ଗଣମାଧ୍ୟମ ଜଗତରେ ସାମିଲ ହେଲେ ଓଡିଶାର ପୂର୍ବତନ ମୁଖ୍ୟ ଶାସନ ସଚିବ ବିଜୟ କୁମାର ପଟ୍ଟନାୟକ। ଆଜି ତାଙ୍କ ସଂପାଦିତ ସାପ୍ତାହିକ ସମ୍ବାଦପତ୍ର ‘ଜନବାର୍ତ୍ତା’ ଉନମୋଚିତ ହୋଇଛି। ଏଥିସହିତ ଏହାର ଏକ ଡିଜିଟାଲ ଚ୍ୟାନେଲ ଓ ୱେବ୍ ପୋର୍ଟାଲ ମଧ୍ୟ ଶୁଭାରମ୍ଭ ହୋଇଛି। ଆଜି ଭୁବନେଶ୍ବରର ଭାରତୀୟ ବିଦ୍ୟାଭବନରେ ଆୟୋଜିତ କାର୍ଯ୍ୟକ୍ରମରେ ଏହା ଉନମୋଚିତ ହୋଇଛି।
ଏହି ଉତ୍ସବରେ ସମ୍ବାଦର ପ୍ରତିଷ୍ଠାତା ସୌମ୍ୟ ରଞ୍ଜନ ପଟ୍ଟନାୟକ, ଆଉଟଲୁକର ପୂର୍ବତନ ସମ୍ପାଦକ ରୁବେନ ବାନାର୍ଜୀ, ବରିଷ୍ଠ ସାମ୍ବାଦିକ ରବି ଦାସ, ପୂର୍ବତନ ରାଷ୍ଟ୍ରଦୂତ ମଳୟ ମିଶ୍ର ପ୍ରମୁଖ ଯୋଗଦେଇଥିଲେ। ଏଥିରେ ବିଜୟ କୁମାର ପଟ୍ଟନାୟକ କହିଥିଲେ, “ବଗିଚାରେ ଅନେକ ଫୁଲ ଫୁଟୁଛି। ଆଉ ଏକ ନୂଆ ଫୁଲ ଫୁଟିଲେ କିଛି କ୍ଷତିନାହିଁ। ଓଡ଼ିଶା ପାଇଁ କିଛି କରିବାର ମୁଁ ସ୍ୱପ୍ନ ଦେଖିଛି। ସେଇ ସ୍ୱପ୍ନ ମିଡ଼ିଆ ଦ୍ୱାରା ହିଁ ସମ୍ଭବ ହେବ ଭାବି ଏଥିରେ ଯୋଗଦେଲି। ଜନତାଙ୍କ ପାଇଁ ସାପ୍ତାହିକ ‘ଜନବାର୍ତ୍ତା’ ‘ସ୍ଵାଭିମାନୀ ଓଡିଆଙ୍କ ସ୍ୱର’ ଭାବେ ପ୍ରତିଫଳିତ ହେବ ବୋଲି ସେ କହିଛନ୍ତି।