ଭୁବନେଶ୍ୱର: ଜାତୀୟ ବିଜ୍ଞାନ ଦିବସ ଅବସରରେ ଜାତୀୟ ବିଜ୍ଞାନ ସଂଗ୍ରହାଳୟ ପରିଷଦର ଏକ ଶାଖା ଆଞ୍ଚଳିକ ବିଜ୍ଞାନ କେନ୍ଦ୍ର (ଆରଏସସି), ଭୁବନେଶ୍ୱର ପକ୍ଷରୁ ‘ନ୍ୟାସନାଲ ଇନୋଭେସନ ଫାଉଣ୍ଡେସନ-ଇଣ୍ଡିଆ’ (ଏନଆଇଏଫ୍) ସହଯୋଗରେ ‘ଇନୋଭେସନ ଫେଷ୍ଟିଭାଲ-୨୦୨୬’ ଶନିବାର ଉଦଘାଟିତ ହୋଇଛି।
ଏହି କାର୍ଯ୍ୟକ୍ରମରେ ଏସଟିପିଆଇ, ଭୁବନେଶ୍ୱରର ନିର୍ଦ୍ଦେଶକ ଡ଼ଃ ମାନସ ରଞ୍ଜନ ପଣ୍ଡା ମୁଖ୍ୟ ଅତିଥି ଭାବେ ଯୋଗଦେଇ ଉତ୍ସବର ଶୁଭାରମ୍ଭ କରିଥିଲେ। ଏହା ସହିତ ଏନଆଇଏଫ୍-ଇଣ୍ଡିଆର ବୈଜ୍ଞାନିକ ଓ ଏସଡିଡିଏମ ମୁଖ୍ୟ ଡ଼ଃ ବିବେକ କୁମାର, ଆଞ୍ଚଳିକ ବିଜ୍ଞାନ କେନ୍ଦ୍ରର ପ୍ରକଳ୍ପ ସଂଯୋଜକ ଶ୍ରୀ କପିଳ ଜୈନଙ୍କ ସହିତ ଅନ୍ୟାନ୍ୟ ଅତିଥିମାନେ ମଧ୍ୟ ଉପସ୍ଥିତ ଥିଲେ। କାର୍ଯ୍ୟକ୍ରମରେ ସହଯୋଗୀ ଭାବେ ‘ଷ୍ଟାର୍ଟଅପ୍ ଓଡ଼ିଶା’ ଏବଂ ‘ଭୁବନେଶ୍ୱର ସିଟି ନଲେଜ୍ ଆଣ୍ଡ ଇନୋଭେସନ କ୍ଲଷ୍ଟର ଫାଉଣ୍ଡେସନ’ ଯୋଗ ଦେଇଛନ୍ତି।
ମହୋତ୍ସବର ମୁଖ୍ୟ ଆକର୍ଷଣ ରହିଥିଲା ଓଡ଼ିଶାର ବିଭିନ୍ନ ଜିଲ୍ଲାରୁ ଆସିଥିବା ତୃଣମୂଳ ନବସୃଜନକାରୀ, ଷ୍ଟାର୍ଟଅପ୍, ଇନକ୍ୟୁବେଟର ଏବଂ ଶିକ୍ଷାନୁଷ୍ଠାନମାନଙ୍କ ପକ୍ଷରୁ ପ୍ରଦର୍ଶିତ ନବ ମଡେଲ ଓ ଉତ୍ପାଦ। ସାଧାରଣ ଜୀବନର ଜଟିଳ ସମସ୍ୟାଗୁଡ଼ିକର ସରଳ ଓ ସୃଜନଶୀଳ ସମାଧାନ ଖୋଜିବା ଏହି ଉତ୍ସବର ମୂଳ ଲକ୍ଷ୍ୟ ଥିଲା। ପ୍ରଦର୍ଶନୀରେ ପ୍ରାୟ ୮୨ ଜଣ ପ୍ରତିଯୋଗୀ ନିଜସ୍ୱ ଉଦ୍ଭାବନ ପ୍ରଦର୍ଶନ କରିଥିଲେ।
କାର୍ଯ୍ୟକ୍ରମର ପ୍ରଥମ ପର୍ଯ୍ୟାୟରେ ଶିକ୍ଷାନୁଷ୍ଠାନ ଓ ଇନକ୍ୟୁବେଟର ବର୍ଗର ପ୍ରତିଯୋଗୀମାନଙ୍କୁ ସମ୍ବର୍ଦ୍ଧନା ଦିଆଯାଇଥିଲା। ଦ୍ୱିତୀୟ ପର୍ଯ୍ୟାୟରେ ବ୍ୟକ୍ତିଗତ ବର୍ଗର ନବସୃଜନକାରୀମାନେ ନିଜ ଉଦ୍ଭାବନ ପ୍ରକଳ୍ପ ଉପସ୍ଥାପନ କରିଥିଲେ। ବିଶେଷତଃ ପେଟେଣ୍ଟ ପ୍ରାପ୍ତ ତୃଣମୂଳ ଉଦ୍ଭାବନଗୁଡ଼ିକ ଛାତ୍ରଛାତ୍ରୀଙ୍କ ମଧ୍ୟରେ ବ୍ୟାପକ ଆକର୍ଷଣ ସୃଷ୍ଟି କରିଥିଲା।
ଏହି ଅବସରରେ ଡ଼ଃ ଆଞ୍ଚଲ କାଟୋଚ ‘ଡିଜାଇନ ଥିଙ୍କିଙ୍ଗ ଫର ଇନୋଭେସନ’ ବିଷୟରେ ଏକ ବିଶେଷ ଅଧିବେଶନ ଚାଳନା କରି ଉଦ୍ୟମୀ ମନୋଭାବ ଓ ସୃଜନଶୀଳ ଚିନ୍ତାଧାରାର ଗୁରୁତ୍ୱ ଉପସ୍ଥାପନ କରିଥିଲେ।
ଉଦଯାପନୀ ସମାରୋହରେ ଅତିଥି ଓ ବିଚାରକମାନଙ୍କୁ ସମ୍ମାନିତ କରାଯାଇଥିବା ସହ ପ୍ରତିଯୋଗୀମାନଙ୍କୁ ପ୍ରମାଣପତ୍ର ପ୍ରଦାନ କରାଯାଇଥିଲା। ଭୁବନେଶ୍ୱର-କଟକର ୧୦ରୁ ଅଧିକ ବିଦ୍ୟାଳୟର ଛାତ୍ରଛାତ୍ରୀ ଉତ୍ସାହଭରା ଭାବରେ ଏହି ଉତ୍ସବରେ ଯୋଗଦେଇଥିଲେ।
ଆଞ୍ଚଳିକ ବିଜ୍ଞାନ କେନ୍ଦ୍ର ବର୍ତ୍ତମାନ କେବଳ ସ୍କୁଲସ୍ତରୀୟ କାର୍ଯ୍ୟକ୍ରମରେ ସୀମିତ ନ ରହି ନବସୃଜନ, ସହଯୋଗ ଓ ଉଦ୍ୟୋଗିତାର ଏକ ପ୍ରମୁଖ କେନ୍ଦ୍ର ଭାବେ ଆଗକୁ ବଢ଼ୁଛି। ଆୟୋଜକମାନେ ଏହି ‘ଇନୋଭେସନ ଫେଷ୍ଟିଭାଲ’କୁ ପ୍ରତିବର୍ଷ ଆୟୋଜନ କରି ଓଡ଼ିଶାରେ ବୈଜ୍ଞାନିକ ମନୋଭାବ ଓ ନବସୃଜନ ସଂସ୍କୃତିକୁ ଶକ୍ତିଶାଳୀ କରିବାର ଲକ୍ଷ୍ୟ ରଖିଛନ୍ତି।