ନୂଆଦିଲ୍ଲୀ: ଅନ୍ତର୍ଜାତୀୟ ମହିଳା ଦିବସ ଉପଲକ୍ଷେ ନୂଆଦିଲ୍ଲୀର କର୍ତ୍ତବ୍ୟ ପଥରେ ଶକ୍ତି ଓ୍ବାକ୍ ଶି ଲିଡ୍ସ ଭାରତ ପଦଯାତ୍ରା ଅନୁଷ୍ଠିତ ହୋଇଯାଇଛି। ପ୍ରଗତିଶୀଳ ଏବଂ ସମାବେଶୀ ଭାରତ ନିର୍ମାଣରେ ମହିଳା ଶକ୍ତିଙ୍କ ଭୂମିକା ସମ୍ପର୍କରେ ସଚେତନତା ସୃଷ୍ଟି କରିବା ଲାଗି ଏହି ପଦଯାତ୍ରା ଆୟୋଜନ କରାଯାଇଥିଲା।
ପଦଯାତ୍ରାକୁ କେନ୍ଦ୍ର ମହିଳା ଓ ଶିଶୁ କଲ୍ୟାଣ ମନ୍ତ୍ରୀ ଅନ୍ନପୂର୍ଣ୍ଣା ଦେବୀ ଉଦଘାଟନ କରିଥିଲେ। ଏହି ଅବସରରେ ମହିଳା ଓ ଶିଶୁ କଲ୍ୟାଣ ରାଷ୍ଟ୍ରମନ୍ତ୍ରୀ ସାବିତ୍ରୀ ଠାକୁର, ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା, କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ଏବଂ ସାର ଓ ରସାୟନ ରାଷ୍ଟ୍ରମନ୍ତ୍ରୀ ଅନୁପ୍ରିୟା ପଟେଲ ପ୍ରମୁଖ ଉପସ୍ଥିତ ଥିଲେ। କେନ୍ଦ୍ର ମହିଳା ଆୟୋଗ ଅଧ୍ୟକ୍ଷା ବିଜୟା ରହତାକର, ମହିଳା ଓ ଶିଶୁ କଲ୍ୟାଣ ମନ୍ତ୍ରଣାଳୟ ସଚିବ ଅନୀଲ ମଲିକ ମଧ୍ୟ କାର୍ଯ୍ୟକ୍ରମରେ ଯୋଗ ଦେଇଥିଲେ।
କର୍ତ୍ତବ୍ୟ ପଥ, ଇଣ୍ଡିଆ ଗେଟରୁ ଏହି ପଦଯାତ୍ରା ରାଷ୍ଟ୍ର ଗୀତ “ବନ୍ଦେ ମାତରମ୍” ଗାନ ଆରମ୍ଭ ହୋଇଥିଲା। କାର୍ଯ୍ୟକ୍ରମର ଆରମ୍ଭ ପାଇଁ ସମ୍ମାନିତ ବ୍ୟକ୍ତି, ଅଂଶଗ୍ରହଣକାରୀ ଏବଂ ଉପସ୍ଥିତ ଲୋକମାନେ ଏକତ୍ରିତ ହୋଇଥିଲେ। ଏହି ପଦଯାତ୍ରା ମହିଳା ସଶକ୍ତିକରଣ ପ୍ରତି ଶକ୍ତି, ଏକତା ଏବଂ ସାମୂହିକ ପ୍ରତିବଦ୍ଧତାର ପ୍ରତୀକ ଥିଲା। ଅଂଶଗ୍ରହଣକାରୀମାନେ ଉତ୍ସାହର ସହିତ ପଦଯାତ୍ରାରେ ଯୋଗ ଦେଇଥିଲେ।
ଏହି ପଦଯାତ୍ରା ଇଣ୍ଡିଆ ଗେଟରୁ ବିଜୟ ଚୌକ ପର୍ଯ୍ୟନ୍ତ କର୍ତ୍ତବ୍ୟ ପଥ ଦେଇ ପ୍ରାୟ ୨ କିଲୋମିଟର ପର୍ଯ୍ୟନ୍ତ ଯାଇଥିଲା। ରାସ୍ତାରେ ମହିଳାମାନଙ୍କ ପାଇଁ ପ୍ରମୁଖ ସରକାରୀ ଯୋଜନା ଏବଂ ପଦକ୍ଷେପ ସହିତ ବିଭିନ୍ନ କ୍ଷେତ୍ରରେ ମହିଳାମାନଙ୍କର ପ୍ରମୁଖ ସଫଳତାକୁ ନେଇ ହୋର୍ଡିଂ ସବୁ ପ୍ରଦର୍ଶିତ ହୋଇଥିଲା। ସାରା ଭାରତରେ ମହିଳାମାନଙ୍କର ସମୃଦ୍ଧ ସାଂସ୍କୃତିକ ବିବିଧତା ଏବଂ ଶକ୍ତିକୁ ପ୍ରଦର୍ଶିତ କରୁଥିବା ଭବ୍ୟ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ପ୍ରଦର୍ଶିତ ହୋଇଥିଲା।
ପ୍ରାୟ ୨୦୦ ମନ୍ତ୍ରଣାଳୟ, ବିଭାଗ ଏବଂ ସଂଗଠନର ୩ ହଜାରରୁ ଅଧିକ ମହିଳା ଏହି ପଦଯାତ୍ରାରେ ଅଂଶଗ୍ରହଣ କରିଥିଲେ। ଅଂଶଗ୍ରହଣକାରୀମାନଙ୍କ ମଧ୍ୟରେ ସଶସ୍ତ୍ର ବାହିନୀ, ପୋଲିସ, ସ୍ୱାସ୍ଥ୍ୟସେବା କ୍ଷେତ୍ର, ଗଣମାଧ୍ୟମ, କ୍ରୀଡା, ଶିକ୍ଷା, ପରିମଳ, ବିମାନ ଚଳାଚଳ, ଶିଳ୍ପ ଏବଂ ସରକାରୀ ପ୍ରତିଷ୍ଠାନର ପ୍ରତିନିଧି, ଏଏନଏମ ସେବା ପ୍ରଦାନକାରୀ, ଭାରତ ଟ୍ୟାକ୍ସି ସାରଥିର ମହିଳା ଡ୍ରାଇଭର, ଶିକ୍ଷକ, ଲୋକୋମୋଟିଭ୍ ଡ୍ରାଇଭର, ମାଇ ଭାରତ ସ୍ୱେଚ୍ଛାସେବୀ, କ୍ଷେତ୍ର କାର୍ଯ୍ୟକର୍ତ୍ତା ଏବଂ ମହିଳା ଉଦ୍ୟୋଗୀମାନେ ସାମିଲ ଥିଲେ।