ସମୀକ୍ଷା ବ୍ୟୁରୋ
ବନ୍ୟା ଅଶଙ୍କା ଥିବା ଜିଲ୍ଲାଗୁଡିକର ଜିଲ୍ଲାପାଳମାନେ 24 ଘଣ୍ଟା ସତର୍କ ରହିବାକୁ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି। ରାଜ୍ୟ ଲୋକସେବା ଭବନରେ ଏକ ଭିଡିଓ କନଫ୍ରେସିଂ ମାଧ୍ୟମରେ ଜିଲ୍ଲାପାଳଙ୍କୁ ଏହି ନିର୍ଦ୍ଦେଶ ଦେଇଛନ୍ତି। ମୁଖ୍ୟତଃ ବଲାଙ୍ଗୀର,କଳାହାଣ୍ଡି, ବୈଦ,ସୁବର୍ଣ୍ଣପୁର,କନ୍ଧମାଳ ଜିଲ୍ଲାରେ ବର୍ତ୍ତମାନ ବନ୍ୟାସ୍ଥିତିରେ ସୁଧାର ଆସି ନାହିଁ। ଏହି ଜିଲ୍ଲାଗୁଡିକରେ ସହାୟତ କାମ ବୃଦ୍ଧି କରିବାକୁ ମୁଖ୍ୟମନ୍ତ୍ରୀ କହିଛନ୍ତି। ତେବେ ବଲାଙ୍ଗୀର ଜିଲ୍ଲାର ସ୍ଥିତି ଉଦବେଗ ଜନିତ ରହିଥିବାରୁ ସେଠାକୁ ଆଉ 3ଟି ଓଡ୍ରାଫ ଟିମ ପଠାଇବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ସେହିପରି 15 ତାରିଖ ସୁଦ୍ଧା ମହାନଦୀରେ ପ୍ରାୟ 11 ଲକ୍ଷ କ୍ୟୁସେକ ପାଣି ପ୍ରବାହିତ ହେବାର ସମ୍ଭାବନା ରହିଛି। ଏହା ଦ୍ବାରା କଟକ, ଜଗତସିଂହପୁର,ପୁରୀ,ନୟାଗଡ,ଖୋର୍ଦ୍ଧା ଏବଂ କେନ୍ଦ୍ରାପଡା ଜିଲ୍ଲା କ୍ଷତିଗସ୍ତ ହେବାର ସମ୍ଭାବନା ରହିଛି। ଏହି ଜିଲ୍ଲାର ନଦୀବନ୍ଧଗୁଡିକ ସୁଦୃଢ ରହିଛି କି ନାହିଁ ତାହା ଯାଞ୍ଚ କରିବାକୁ ମଧ୍ୟ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି।ଏଥିସହିତ ସାତଦିନ ପାଇଁ ରିଲିଫ ଦେବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। କଳାହାଣ୍ଡି, ବଉଦ, କନ୍ଧମାଳ,ସୋନପୁର ଏବଂ ବଲାଙ୍ଗିର ଜିଲ୍ଲାରେ ଏହି ରିଲିଫ ଦେବାକୁ କହିଛନ୍ତି। ଏଥିରେ ବୟସ୍କମାନଙ୍କ ଦିନ ପିଛା 60 ଟଙ୍କା ଏବଂ ପିଲାମାନଙ୍କୁ ଦିନପିଛା 45 ଟଙ୍କାର ରିଲିଫ ଦେବାକୁ ନିର୍ଦ୍ଦେଶ ଦେଇଛନ୍ତି। ଗତ କିଛିଦିନ ଧରି ଉପରମୁଣ୍ଡରେ ପ୍ରବଳ ବର୍ଷା ହେବାରୁ ବିଭିନ୍ନ ନଦୀର ଜଳପତନ ବୃଦ୍ଧି ପାଇ ବନ୍ୟା ପରିସ୍ଥିତି ସୃଷ୍ଟି ହୋଇଛି। ସେ ନେଇ ମୁଖ୍ୟମନ୍ତ୍ରୀ ସମୀକ୍ଷା ବୈଠକ କରି ଏପରି ପଦକ୍ଷେପ ନେଇଛନ୍ତି।