ନୂଆଦିଲ୍ଲୀ: ପଶ୍ଚିମ ଏସିଆର ସାମ୍ପ୍ରତିକ ଘଟଣାକ୍ରମ ଉପରେ ନୂଆଦିଲ୍ଲୀସ୍ଥିତ ଜାତୀୟ ଗଣମାଧ୍ୟମ କେନ୍ଦ୍ରରେ ଏକ ଆନ୍ତଃମନ୍ତ୍ରାଳୟସ୍ତରୀୟ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି। ପେଟ୍ରୋଲିୟମ ଓ ପ୍ରାକୃତିକ ବାଷ୍ପ ମନ୍ତ୍ରଣାଳୟ, ବୈଦେଶିକ ବ୍ୟାପାର ମନ୍ତ୍ରଣାଳୟ, ବନ୍ଦର, ଜାହାଜ ଚଳାଚଳ ଓ ଜଳପଥ ମନ୍ତ୍ରଣାଳୟ ଏବଂ ସୂଚନା ଓ ପ୍ରସାରଣ ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ ଏହି କ୍ଷେତ୍ରର ପରିବର୍ତ୍ତିତ ପରିସ୍ଥିତି ଏବଂ ଏହାର ମୁକାବିଲା ଲାଗି ଭାରତ ସରକାରଙ୍କ ଦ୍ୱାରା ନିଆଯାଇଥିବା ପ୍ରସ୍ତୁତି ପଦକ୍ଷେପ ଏବଂ କାର୍ଯ୍ୟାନୁଷ୍ଠାନ ବିଷୟରେ ଗଣମାଧ୍ୟମକୁ ସୂଚନା ଦେଇଥିଲେ। ବିଶେଷ କରି ଇନ୍ଧନ ଯୋଗାଣ ପ୍ରସ୍ତୁତି, ସାମୁଦ୍ରିକ ସୁରକ୍ଷା, ବିଦେଶରେ ଥିବା ଭାରତୀୟ ନାଗରିକଙ୍କ କଲ୍ୟାଣ ଏବଂ ସରକାରଙ୍କ ଦ୍ୱାରା ଗ୍ରହଣ କରାଯାଇଥିବା ଯୋଗାଯୋଗ ପଦକ୍ଷେପ ବିଷୟରେ ସଦ୍ୟତମ ସୂଚନା ପ୍ରଦାନ କରାଯାଇଥିଲା।
ଇନ୍ଧନ ଯୋଗାଣ ଏବଂ ତୈଳ ଉପଲବ୍ଧତା
ପେଟ୍ରୋଲିୟମ ଓ ପ୍ରାକୃତିକ ବାଷ୍ପ ମନ୍ତ୍ରଣାଳୟର ଅଧିକାରୀ ଗଣମାଧ୍ୟମକୁ ଇନ୍ଧନ ଯୋଗାଣ ପରିସ୍ଥିତି ଏବଂ ନିରବଚ୍ଛିନ୍ନ ଇନ୍ଧନ ଯୋଗାଣ ସୁନିଶ୍ଚିତ କରିବା ପାଇଁ ନିଆଯାଉଥିବା ପଦକ୍ଷେପ ବିଷୟରେ ସୂଚନା ଦେଇଥିଲେ।
ଅଶୋଧିତ ତୈଳ
● ଭାରତର ଅଶୋଧିତ ତୈଳ ଯୋଗାଣ ସୁରକ୍ଷିତ ରହିଛି। ଭାରତର ଦୈନିକ ବ୍ୟବହାରର ପ୍ରାୟ ୫୫ ଲକ୍ଷ ବ୍ୟାରେଲ ରହିଛି । ଭିନ୍ନ ଭିନ୍ନ ଉତ୍ସରୁ ତୈଳ କ୍ରୟ ମାଧ୍ୟମରେ ବର୍ତ୍ତମାନ ସୁରକ୍ଷିତ ପରିମାଣ ବଜାୟ ରଖାଯାଇପାରିଛି। ଏସବୁ ଉତ୍ସରୁ ଆସୁଥିବା ତୈଳ ସାଧାରଣତଃ ହର୍ମୁଜ୍ ପ୍ରଣାଳୀ ଦେଇ ଆସୁଥିବା ପରିମାଣଠାରୁ ଅଧିକ।
● ଭାରତ ବର୍ତ୍ତମାନ ପ୍ରାୟ ୪୦ଟି ଦେଶରୁ ଅଶୋଧିତ ତୈଳ ଆମଦାନୀ କରୁଛି। ଏହି ବିବିଧତା ଫଳରେ, ପ୍ରାୟ ୭୦ ପ୍ରତିଶତ ଅଶୋଧିତ ତୈଳ ଆମଦାନୀ ବର୍ତ୍ତମାନ ହର୍ମୁଜ୍ ପ୍ରଣାଳୀ ବାହାର ମାର୍ଗରୁ ଆସୁଛି ଯାହା ପୂର୍ବରୁ ପ୍ରାୟ ୫୫ ପ୍ରତିଶତ ଥିଲା।
● ଦୁଇଟି ଅତିରିକ୍ତ ଅଶୋଧିତ ତୈଳ କାର୍ଗୋ ବର୍ତ୍ତମାନ ମାର୍ଗରେ ଅଛି ଏବଂ ଆଗାମୀ କିଛି ଦିନ ମଧ୍ୟରେ ଭାରତରେ ପହଞ୍ଚିବ, ଯାହା ଅଶୋଧିତ ତୈଳ ଯୋଗାଣ ସ୍ଥିତିକୁ ଆହୁରି ମଜବୁତ କରିବ।
● ଦେଶ ସାରା ବିଶୋଧନାଗାରଗୁଡ଼ିକୁ ଅତ୍ୟନ୍ତ ଉଚ୍ଚ କ୍ଷମତା ବ୍ୟବହାର ସ୍ତରରେ କାର୍ଯ୍ୟ କରୁଛନ୍ତି, କିଛି କ୍ଷେତ୍ରରେ ୧୦୦ ପ୍ରତିଶତ କ୍ଷମତା ମଧ୍ୟ ବ୍ୟବହାର କରାଯାଉଛି।
ପ୍ରାକୃତିକ ବାଷ୍ପ
● ଭାରତର ମୋଟ ପ୍ରାକୃତିକ ବାଷ୍ପ ବ୍ୟବହାର ପ୍ରାୟ ୧୮୯ ଏମଏମଏସସିଏମଡି ହୋଇଥିବା ବେଳେ ଏଥିମଧ୍ୟରୁ ୯୭.୫ ଏମଏମଏସସିଏମଡି ଘରୋଇ ଭାବେ ଉତ୍ପାଦିତ ହୁଏ। ତେବେ ଅପ୍ରତ୍ୟାଶିତ ପରିସ୍ଥିତି ଯୋଗୁଁ ପ୍ରାୟ ୪୭.୪ ଏମଏମଏସସିଏମଡି ଯୋଗାଣ ପ୍ରଭାବିତ ହୋଇଛି।
● ଏହି ବାଧା ପୂରଣ କରିବା ପାଇଁ ବିକଳ୍ପ ଯୋଗାଣକାରୀ ଏବଂ ବିକଳ୍ପ ମାର୍ଗ ମାଧ୍ୟମରେ କ୍ରୟ ଚାଲିଛି। ବାଷ୍ପ କମ୍ପାନୀଗୁଡ଼ିକ ନୂତନ ଉତ୍ସରୁ ଏଲଏନଜି କାର୍ଗୋକୁ ମଧ୍ୟ ସୁରକ୍ଷିତ କରିଛନ୍ତି ଏବଂ ଦୁଇଟି ଏଲଏନଜି କାର୍ଗୋ ଦେଶକୁ ପଠାଯାଉଛି।
● ବାଷ୍ପ ଯୋଗାଣ ପରିଚାଳନା ଏବଂ ପ୍ରାଥମିକତା କ୍ଷେତ୍ରଗୁଡ଼ିକୁ ସୁରକ୍ଷା ଦେବା ପାଇଁ ସରକାର ୯ ମାର୍ଚ୍ଚ ୨୦୨୬ରେ ଅତ୍ୟାବଶ୍ୟକ ସାମଗ୍ରୀ ଆଇନ ଅଧୀନରେ ଏକ ପ୍ରାକୃତିକ ବାଷ୍ପ ନିୟନ୍ତ୍ରଣ ଆଦେଶ ଜାରି କରିଥିଲେ।
● ବାଷ୍ପ ଯୋଗାଣ ପରିଚାଳନା ଏବଂ ପ୍ରାଥମିକତା କ୍ଷେତ୍ରଗୁଡ଼ିକୁ ସୁରକ୍ଷା ଦେବା ପାଇଁ ଘରୋଇ ପିଏନଜି ଯୋଗାଣ ଓ ସିଏନଜି କୌଣସି କଟକଣା ବିନା ୧୦୦ ପ୍ରତିଶତ ଯୋଗାଣ ପାଇବେ।
● ଚା ଶିଳ୍ପ, ଉତ୍ପାଦନ ୟୁନିଟ୍ ଏବଂ ବାଷ୍ପ ଗ୍ରୀଡ୍ ସହିତ ସଂଯୁକ୍ତ ଅନ୍ୟ ଶିଳ୍ପ ଗ୍ରାହକମାନେ ସେମାନଙ୍କର ପୂର୍ବ ଛଅ ମାସର ହାରାହାରି ଯୋଗାଣର ପ୍ରାୟ ୮୦ ପ୍ରତିଶତ ପାଇବେ।
● ସାର କାରଖାନାଗୁଡ଼ିକ ପ୍ରାୟ ୭୦ ପ୍ରତିଶତ ଯୋଗାଣ ପାଇବେ, ଯେତେବେଳେ କି ବିଶୋଧନାଗାର ଏବଂ ପେଟ୍ରୋକେମିକାଲ୍ ୟୁନିଟଗୁଡ଼ିକ ପ୍ରାୟ ୩୫ ପ୍ରତିଶତ କମ ପାଇବେ ଯାହା ଦ୍ୱାରା ଉଚ୍ଚ ପ୍ରାଥମିକତା କ୍ଷେତ୍ରଗୁଡ଼ିକୁ ସୁରକ୍ଷା ଦିଆଯାଇପାରିବ।
ଏଲପିଜି
● ଭାରତ ନିଜ ଏଲପିଜି ବ୍ୟବହାରର ପ୍ରାୟ ୬୦ ପ୍ରତିଶତ ଆମଦାନୀ କରେ ଏବଂ ଏହି ଆମଦାନୀର ପ୍ରାୟ ୯୦ ପ୍ରତିଶତ ହରମୁଜ୍ ପ୍ରଣାଳୀ ଦେଇ ହୋଇଥାଏ ଯାହା ବର୍ତ୍ତମାନର ଘଟଣାଗୁଡ଼ିକ ଦ୍ୱାରା ପ୍ରଭାବିତ ହୋଇଛି।
● ୮ ମାର୍ଚ୍ଚ, ୨୦୨୬ରେ, ସରକାର ଏକ ନିର୍ଦ୍ଦେଶ ଜାରି କରି ତୈଳ ବିଶୋଧନାଗାର ଏବଂ ପେଟ୍ରୋକେମିକାଲ୍ କମ୍ପ୍ଲେକ୍ସକୁ ପ୍ରୋପେନ୍, ବ୍ୟୁଟେନ୍, ପ୍ରୋପିଲିନ୍ ଏବଂ ବ୍ୟୁଟିନ୍ ଭଳି ବାଷ୍ପଗୁଡ଼ିକୁ ଏଲପିଜି ପୁଲ୍ କୁ ପଠାଇ ସର୍ବାଧିକ ଏଲପିଜି ଉତ୍ପାଦନ କରିବାକୁ ନିର୍ଦ୍ଦେଶ ଦେଇଥିଲେ। ଏହି ପଦକ୍ଷେପର ଫଳସ୍ୱରୂପ, ଘରୋଇ ଏଲପିଜି ଉତ୍ପାଦନ ପ୍ରାୟ ୨୫ ପ୍ରତିଶତ ବୃଦ୍ଧି ପାଇଛି ଏବଂ ସମ୍ପୂର୍ଣ୍ଣ ଘରୋଇ ଏଲପିଜି ଉତ୍ପାଦନ ଘରୋଇ ଗ୍ରାହକଙ୍କ ଉଦ୍ଦେଶ୍ୟରେ ପ୍ରଦାନ କରାଯାଉଛି।
● ଅଣ-ଘରୋଇ ଏଲପିଜି ପାଇଁ, ହସ୍ପିଟାଲ ଏବଂ ଶିକ୍ଷାନୁଷ୍ଠାନ ଭଳି ଅତ୍ୟାବଶ୍ୟକ କ୍ଷେତ୍ରଗୁଡ଼ିକୁ ପ୍ରାଥମିକତା ଦିଆଯାଉଛି।
● ରେସ୍ତୋରାଁ, ହୋଟେଲ ଓ ଅନ୍ୟାନ୍ୟ ବାଣିଜ୍ୟିକ ବ୍ୟବହାରକାରୀଙ୍କୁ ଦିଆଯାଇଥିବା ଆବଣ୍ଟନ ସମୀକ୍ଷା କରିବା ଏବଂ ଉପଲବ୍ଧ ଏଲପିଜି ଯୋଗାଣର ନିରପେକ୍ଷ ତଥା ସ୍ୱଚ୍ଛ ବଣ୍ଟନ ସୁନିଶ୍ଚିତ କରିବା ପାଇଁ ଆଇଓସିଏଲ, ଏଚପିସିଏଲ ଏବଂ ବିପିସିଏଲର କାର୍ଯ୍ୟନିର୍ବାହୀ ନିର୍ଦ୍ଦେଶକଙ୍କୁ ନେଇ ଏକ ତିନି ସଦସ୍ୟ ବିଶିଷ୍ଟ କମିଟି ଗଠନ କରାଯାଇଛି।
● କିଛିଦିନ ପୂର୍ବରୁ ୬୦ ଟଙ୍କା ବୃଦ୍ଧି ପରେ ଦିଲ୍ଲୀରେ ଗୋଟିଏ ଘରୋଇ ଏଲପିଜି ସିଲିଣ୍ଡରର ବର୍ତ୍ତମାନ ମୂଲ୍ୟ ୯୧୩ ଟଙ୍କା ରହିଛି। ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନା ହିତାଧିକାରୀଙ୍କ ପାଇଁ, ପ୍ରତି ସିଲିଣ୍ଡର ମୂଲ୍ୟ ୬୧୩ ଟଙ୍କା ରହିଛି।
● ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନା ପରିବାରଙ୍କ ପାଇଁ, ସାମ୍ପ୍ରତିକ ବୃଦ୍ଧି ପ୍ରତିଦିନ ୮୦ ପଇସାରୁ କମ୍।
● ଯଦିଓ ଜୁଲାଇ ୨୦୨୩ ପରଠାରୁ ସାଉଦି ଚୁକ୍ତିନାମା ମୂଲ୍ୟ ପ୍ରାୟ ୪୧ ପ୍ରତିଶତ ବୃଦ୍ଧି ପାଇଛି, ସରକାରୀ ସମର୍ଥନ ଯୋଗୁଁ ସମାନ ସମୟ ମଧ୍ୟରେ ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନା ସିଲିଣ୍ଡର ମୂଲ୍ୟ ପ୍ରାୟ ୩୨ ପ୍ରତିଶତ ହ୍ରାସ ପାଇଛି।
● ଏଲପିଜିର କମ୍ ଅସୁଲି ପାଇଁ ସରକାର ତୈଳ ବିପଣନ କମ୍ପାନୀଗୁଡ଼ିକୁ ୩୦ ହଜାର କୋଟି ଟଙ୍କାର କ୍ଷତିପୂରଣ ମଞ୍ଜୁର କରିଛନ୍ତି।
● କ୍ଷେତ୍ର ସ୍ତରରୁ ପ୍ରାପ୍ତ ସୂଚନାରୁ ଜଣାପଡିଛି ଯେ କିଛି ଲୋକ ସିଲିଣ୍ଡର ବୁକିଂ କରୁଛନ୍ତି ଏବଂ ସେଗୁଡ଼ିକୁ ଗଚ୍ଛିତ କରୁଛନ୍ତି। ତଥାପି, ଘରୋଇ ଏଲପିଜି ପାଇଁ ସାଧାରଣ ବିତରଣ ସମୟ ପ୍ରାୟ ଅଢ଼େଇ ଦିନ ରହିଛି ଏବଂ ଗ୍ରାହକମାନଙ୍କୁ ତରବରିଆ ଭାବେ ସିଲିଣ୍ଡର ବୁକିଂ ନ କରିବାକୁ ପରାମର୍ଶ ଦିଆଯାଇଛି।
● ବିତରକ ସ୍ତରରେ ଠକେଇ ରୋକିବା ପାଇଁ ବିତରଣ ପ୍ରମାଣୀକରଣ କୋଡ୍ (ଡିଏସି) ବ୍ୟବସ୍ଥାକୁ ପ୍ରାୟ ୯୦ ପ୍ରତିଶତ ଗ୍ରାହକଙ୍କ ପାଖରେ ପହଞ୍ଚା ଯାଇଛି।
● ଅସ୍ଥାୟୀ ଚାହିଦା ପରିଚାଳନା ପଦକ୍ଷେପ ଭାବରେ ଏଲପିଜି ବୁକିଂ ମଧ୍ୟରେ ସର୍ବନିମ୍ନ ବ୍ୟବଧାନ୨୧ ଦିନରୁ ୨୫ ଦିନକୁ ବୃଦ୍ଧି କରାଯାଇଛି।
● ତୈଳ ବିପଣନ କମ୍ପାନୀଗୁଡ଼ିକ ଏବଂ ପ୍ରବର୍ତ୍ତନ ଦଳଗୁଡ଼ିକ ବିତରକମାନଙ୍କ ନିକଟରେ ପଡ଼ି ରହିଥିବା ଅର୍ଡରଗୁଡ଼ିକୁ ପୂରଣ କରିବା ଏବଂ ସୁଗମ ବିତରଣ ସୁନିଶ୍ଚିତ କରିବା ପାଇଁ କ୍ଷେତ୍ର ସ୍ତରରେ ସମନ୍ୱୟ ସ୍ଥାପନ କରୁଛନ୍ତି।
● ସରକାର ବିଶ୍ୱ ପରିସ୍ଥିତି ଉପରେ ନିରନ୍ତର ନଜର ରଖିଛନ୍ତି ଏବଂ ନିରବଚ୍ଛିନ୍ନ ଇନ୍ଧନ ଯୋଗାଣ ସୁନିଶ୍ଚିତ କରିବା ତଥା ପରିବାର ଓ ପ୍ରାଥମିକତା କ୍ଷେତ୍ରଗୁଡ଼ିକୁ ସୁରକ୍ଷା ଦେବା ପାଇଁ ଆବଶ୍ୟକ ପଦକ୍ଷେପ ନେଉଛନ୍ତି।
ସାମୁଦ୍ରିକ ସୁରକ୍ଷା ଜାହାଜ ଚଳାଚଳ
● ବନ୍ଦର, ଜାହାଜ ଚଳାଚଳ ଏବଂ ଜଳପଥ ମନ୍ତ୍ରଣାଳୟ ପକ୍ଷରୁ ପାରସ୍ୟ ଉପସାଗର ଅଞ୍ଚଳରେ ସାମୁଦ୍ରିକ ପରିସ୍ଥିତି ଏବଂ ଭାରତୀୟ ନାବିକ, ଜାହାଜ ଓ ସାମୁଦ୍ରିକ ବାଣିଜ୍ୟ କାର୍ଯ୍ୟକଳାପର ସୁରକ୍ଷା ସୁନିଶ୍ଚିତ କରିବା ପାଇଁ ନିଆଯାଉଥିବା ପଦକ୍ଷେପ ବିଷୟରେ ଗଣମାଧ୍ୟମକୁ ସୂଚନା ଦିଆଯାଇଥିଲା।
● ବର୍ତ୍ତମାନ, ପାରସ୍ୟ ଉପସାଗର ଅଞ୍ଚଳରେ ୨୮ଟି ଭାରତୀୟ ଜାହାଜ କାର୍ଯ୍ୟ କରୁଛି। ଏଥିମଧ୍ୟରୁ ୨୪ଟି ହର୍ମୁଜ୍ ପ୍ରଣାଳୀର ପଶ୍ଚିମରେ ରହିଛି ଏବଂ ଏଥିରେ ୬୭୭ ଭାରତୀୟ ନାବିକ ଅଛନ୍ତି। ସେହିପରି ଆଉ ୪ଟି ଜାହାଜ ପ୍ରଣାଳୀର ପୂର୍ବରେ ରହିଛନ୍ତି ଏବଂ ସେଥିରେ ୧୦୧ ଭାରତୀୟ ନାବିକ ଅଛନ୍ତି। ସେମାନଙ୍କର ସୁରକ୍ଷା ଉପରେ ସକ୍ରିୟ ନଜର ରଖାଯାଇଛି।
● ୨୮ ଫେବୃଆରୀ, ୨୦୨୬ ଠାରୁ ମନ୍ତ୍ରଣାଳୟ ଏବଂ ଜାହାଜ ଚଳାଚଳ ମହାନିର୍ଦ୍ଦେଶାଳୟରେ ଏକ ୨୪ ଘଣ୍ଟିଆ ନିୟନ୍ତ୍ରଣ କକ୍ଷ କାର୍ଯ୍ୟକ୍ଷମ ହୋଇଛି, ଯାହା ଘଟଣାକ୍ରମ ଉପରେ ନଜର ରଖିବା ସହିତ ସହାୟତା ପାଇଁ କାର୍ଯ୍ୟ କରୁଛି।
● ଜାହାଜ ଚଳାଚଳ ମହାନିର୍ଦ୍ଦେଶାଳୟ ୨୮ ଫେବୃଆରୀ, ୨୦୨୬ରେ ଏକ ମାର୍ଗଦର୍ଶିକା ଜାରି କରିଥିଲେ, ଯେଉଁଥିରେ ଭାରତୀୟ ଜାହାଜ ଏବଂ ଭାରତୀୟ ନାବିକମାନଙ୍କ ପାଇଁ ବର୍ଦ୍ଧିତ ସୁରକ୍ଷା ବ୍ୟବସ୍ଥା ଗ୍ରହଣ କରିବାକୁ ଏବଂ ନାବିକମାନଙ୍କର ବିବରଣୀ ଦାଖଲ କରିବା ସହିତ ରିପୋର୍ଟିଂ ପ୍ରୋଟୋକଲ ପାଳନ କରିବାକୁ ନିର୍ଦ୍ଦେଶ ଦିଆଯାଇଥିଲା।
● ଅଧିକାରୀ, ଜାହାଜ ପରିଚାଳକ ଏବଂ ନିଯୁକ୍ତି ଏଜେନ୍ସିଗୁଡ଼ିକ ଭାରତୀୟ ନାବିକଙ୍କ ସୁରକ୍ଷା ସୁନିଶ୍ଚିତ କରିବା ଏବଂ ଆବଶ୍ୟକ ସ୍ଥଳେ ସହାୟତା ଯୋଗାଇବା ପାଇଁ ଭାରତୀୟ ଦୂତାବାସ ଏବଂ ସ୍ଥାନୀୟ କର୍ତ୍ତୃପକ୍ଷଙ୍କ ସହିତ ଘନିଷ୍ଠ ସମନ୍ୱୟ ରକ୍ଷା କରୁଛନ୍ତି।
● ସମଗ୍ର ଭାରତରେ ବନ୍ଦର ପରିଚାଳନା ସ୍ଥିର ରହିଛି। ରପ୍ତାନିକାରୀମାନେ ସମ୍ମୁଖୀନ ହେଉଥିବା ଅସୁବିଧାକୁ ହ୍ରାସ କରିବା ଏବଂ ଆମଦାନୀ-ରପ୍ତାନି ବାଣିଜ୍ୟର ନିରନ୍ତରତା ସୁନିଶ୍ଚିତ କରିବା ପାଇଁ ଆବଶ୍ୟକ ସହାୟତା ପ୍ରଦାନ କରିବାକୁ ବନ୍ଦରଗୁଡ଼ିକୁ ନିର୍ଦ୍ଦେଶ ଦିଆଯାଇଛି।
● ପ୍ରମୁଖ ବନ୍ଦରଗୁଡ଼ିକ ଜାହାଜ ଗତିବିଧି ଉପରେ ନିରନ୍ତର ନଜର ରଖୁଛନ୍ତି। ବାସ୍ତବ ସମୟରେ ଏହି ଅଞ୍ଚଳର ଘଟଣାକ୍ରମକୁ ମୂଲ୍ୟାଙ୍କନ କରୁଛନ୍ତି ଏବଂ ଜାହାଜ ଓ ମାଲବାହୀ ଜାହଜର ସ୍ଥିତି ନିୟମିତ ଭାବରେ ରିପୋର୍ଟ କରୁଛନ୍ତି।
● ମନ୍ତ୍ରଣାଳୟ ଭାରତୀୟ ନାବିକ ଏବଂ ଭାରତୀୟ ପତାକା ଜାହାଜର ସୁରକ୍ଷା ପ୍ରତି ବିଶେଷ ଧ୍ୟାନ ଦେଇ ପାରସ୍ୟ ଉପସାଗରୀୟ ଅଞ୍ଚଳରେ ସାମୁଦ୍ରିକ ପରିସ୍ଥିତି ଉପରେ କଡ଼ା ନଜର ରଖିଛି।
● ମନ୍ତ୍ରଣାଳୟ ସାମୁଦ୍ରିକ ବାଣିଜ୍ୟ ଏବଂ ନାବିକମାନଙ୍କୁ ଆବଶ୍ୟକ ସହାୟତା ପ୍ରଦାନ କରିବା ପାଇଁ ଶିଳ୍ପ ଅଂଶୀଦାରମାନଙ୍କ ସହିତ ନିୟମିତ ଯୋଗାଯୋଗରେ ରହିଛି।
● ଭାରତୀୟ ନାବିକଙ୍କ ସୁରକ୍ଷା ଏବଂ କଲ୍ୟାଣ ସୁନିଶ୍ଚିତ କରିବା ଏବଂ ଭାରତର ସାମୁଦ୍ରିକ ସ୍ୱାର୍ଥକୁ ରକ୍ଷା କରିବା ପାଇଁ ସରକାର ପ୍ରତିବଦ୍ଧ।
ଭାରତୀୟ ନାଗରିକଙ୍କ ସୁରକ୍ଷା
ଏହି ଅବସରରେ ବୈଦେଶିକ ବ୍ୟାପାର ମନ୍ତ୍ରଣାଳୟ ଯୁଦ୍ଧ ପ୍ରଭାବିତ ଅଞ୍ଚଳରେ ଭାରତୀୟ ନାଗରିକଙ୍କ ପରିସ୍ଥିତି ସମ୍ପର୍କରେ ଏକ ସୂଚନା ପ୍ରଦାନ କରିଛି। ଭାରତୀୟ ଦୂତାବାସ ମାଧ୍ୟମରେ ଭାରତୀୟ ପ୍ରବାସୀମାନଙ୍କ ସୁରକ୍ଷା ଏବଂ କଲ୍ୟାଣ ସୁନିଶ୍ଚିତ କରିବା ପାଇଁ କରାଯାଉଥିବା ପ୍ରୟାସ ଉପରେ ଆଲୋକପାତ କରିଛି। ମନ୍ତ୍ରଣାଳୟ କହିଛି:
● ପ୍ରାୟ ୧କୋଟି ଭାରତୀୟ ପ୍ରବାସୀ ଭାରତର ପଡ଼ୋଶୀ ଦେଶଗୁଡ଼ିକରେ ବସବାସ କରନ୍ତି, ଏବଂ ସେମାନଙ୍କର କଲ୍ୟାଣ ଓ ସୁରକ୍ଷା ସରକାରଙ୍କ ପ୍ରାଥମିକତା।
● ପ୍ରଧାନମନ୍ତ୍ରୀ ସଂଯୁକ୍ତ ଆରବ ଏମିରେଟ୍ସ, କତାର, ସାଉଦି ଆରବ, ଓମାନ, ବାହାରିନ, କୁଏତ, ଜୋର୍ଡାନ ଏବଂ ଇସ୍ରାଏଲ ସମେତ ଅନେକ ଉପସାଗରୀୟ ଏବଂ ପଶ୍ଚିମ ଏସୀୟ ଦେଶର ନେତାମାନଙ୍କ ସହ କଥା ହୋଇଛନ୍ତି।
● ବୈଦେଶିକ ବ୍ୟାପାର ମନ୍ତ୍ରୀ ଏହି ଦେଶଗୁଡ଼ିକରେ ତାଙ୍କ ପ୍ରତିପକ୍ଷ ଏବଂ ଇରାନ ସହିତ ମଧ୍ୟ ନିୟମିତ ଯୋଗାଯୋଗରେ ଅଛନ୍ତି।
● ଏହି କ୍ଷେତ୍ରରେ ଭାରତୀୟ ଦୂତାବାସଗୁଡ଼ିକ ଭାରତୀୟ ନାଗରିକମାନଙ୍କୁ ନିୟମିତ ମାର୍ଗଦର୍ଶିକା ଜାରି କରୁଛନ୍ତି।
● ରାଷ୍ଟ୍ରଦୂତ ଏବଂ ମହାବାଣିଜ୍ୟଦୂତମାନେ ଭାରତୀୟ ପ୍ରବାସୀଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ନିରନ୍ତର ଯୋଗାଯୋଗରେ ଅଛନ୍ତି।
● ମିଶନଗୁଡ଼ିକ ଫସି ରହିଥିବା ଭାରତୀୟମାନଙ୍କୁ, ପର୍ଯ୍ୟଟକ ଏବଂ ଯାତ୍ରୀମାନଙ୍କୁ, ମସ୍କଟ, ରିୟାଦ ଏବଂ ଜେଦ୍ଦା ଭଳି ସ୍ଥାନରୁ ଉପଲବ୍ଧ ବାଣିଜ୍ୟିକ ବିମାନ ବିକଳ୍ପ ମାଧ୍ୟମରେ ଘରକୁ ଫେରିବାକୁ ସାହାଯ୍ୟ କରିଛନ୍ତି।
● ବୈଦେଶିକ ବ୍ୟାପାର ମନ୍ତ୍ରଣାଳୟ ଭାରତୀୟ ନାଗରିକମାନଙ୍କୁ ସହାୟତା କରିବା ପାଇଁ ଏକ ନିୟନ୍ତ୍ରଣ କକ୍ଷ ସ୍ଥାପନ କରିଛି।
● ବାଣିଜ୍ୟ ଜାହାଜ ଉପରେ ଆକ୍ରମଣରେ ଦୁଇ ଜଣ ଭାରତୀୟ ନାଗରିକଙ୍କ ମୃତ୍ୟୁ ଘଟିଛି ଏବଂ ଜଣେ ନିଖୋଜ ଅଛନ୍ତି। ମୃତକଙ୍କ ପରିବାର ପ୍ରତି ସମବେଦନା ପ୍ରକାଶ କରାଯାଇଛି।
● କିଛି ଆହତ ଭାରତୀୟ ନାଗରିକଙ୍କ ଚିକିତ୍ସା ଚାଲିଛି ଏବଂ ଭାରତୀୟ ଦୂତାବାସ ସହାୟତା ଯୋଗାଇ ଦେଉଛି। ଇସ୍ରାଏଲରେ ଆହତ ଜଣେ ଭାରତୀୟ ନାଗରିକଙ୍କ ଅବସ୍ଥା ସୁଧୁରୁଛି, ଏବଂ ଦୁବାଇରେ ଆହତ ଅନ୍ୟ ଜଣେ ଭାରତୀୟ ନାଗରିକ ଭାରତୀୟ ଦୂତାବାସ ସହିତ ଯୋଗାଯୋଗରେ ଅଛନ୍ତି।
● ବର୍ତ୍ତମାନ ଇରାନରେ ପ୍ରାୟ ୯ ହଜାର ଭାରତୀୟ ନାଗରିକ ଅଛନ୍ତି। ଭାରତୀୟ ଦୂତାବାସ ଏମାନଙ୍କ ସହିତ ନିରନ୍ତର ଯୋଗାଯୋଗରେ ଅଛି।
● ଭାରତୀୟ ଛାତ୍ର ଏବଂ ତୀର୍ଥଯାତ୍ରୀମାନଙ୍କୁ ତେହେରାନ ବାହାରେ ସୁରକ୍ଷିତ ସହରକୁ ସ୍ଥାନାନ୍ତର କରାଯାଇଛି।
● ଆର୍ମେନିଆ ଏବଂ ଆଜରବୈଜାନ ସୀମା ପାର କରିବା ପାଇଁ ମଧ୍ୟ ସହାୟତା ଯୋଗାଇ ଦିଆଯାଉଛି ଯାହା ଦ୍ୱାରା ଭାରତୀୟମାନେ ବାଣିଜ୍ୟିକ ବିମାନ ଦ୍ୱାରା ଭାରତ ଫେରିପାରିବେ।
● ନାଗରିକମାନଙ୍କୁ ନିୟମିତ ସୂଚନା ପାଇଁ ବୈଦେଶିକ ମନ୍ତ୍ରଣାଳୟ ଏବଂ ଭାରତୀୟ ଦୂତାବାସର ସରକାରୀ ସୋସିଆଲ ମିଡିଆ ହ୍ୟାଣ୍ଡେଲଗୁଡ଼ିକୁ ଅନୁସରଣ କରିବାକୁ ପରାମର୍ଶ ଦିଆଯାଇଛି।
ଅତ୍ୟାବଶ୍ୟକ ସାମଗ୍ରୀ ସମ୍ପର୍କରେ ସାଧାରଣ ଯୋଗାଯୋଗ ଏବଂ ତଦାରଖ:
ସୂଚନା ଏବଂ ପ୍ରସାରଣ ମନ୍ତ୍ରଣାଳୟର ଅଧିକାରୀ ଗଣମାଧ୍ୟମକୁ ସୂଚନା ଦେବା ସମୟରେ ନିମ୍ନଲିଖିତ ବିନ୍ଦୁଗୁଡ଼ିକ ଉପରେ ଗୁରୁତ୍ୱାରୋପ କରିଥିଲେ:
● କେନ୍ଦ୍ର ଗୃହ ସଚିବ ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ମୁଖ୍ୟ ସଚିବ ଏବଂ ପୋଲିସ ମହାନିର୍ଦ୍ଦେଶକଙ୍କ ସହିତ ଏକ ବୈଠକ କରିଥିଲେ।
● ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ଅତ୍ୟାବଶ୍ୟକ ସାମଗ୍ରୀର ମହଜୁଦ ବିରୁଦ୍ଧରେ କଠୋର ପଦକ୍ଷେପ ନେବାକୁ ଏବଂ ଅତ୍ୟାବଶ୍ୟକ ସାମଗ୍ରୀର ନିରବଚ୍ଛିନ୍ନ ଉପଲବ୍ଧତା ସୁନିଶ୍ଚିତ କରିବାକୁ ପରାମର୍ଶ ଦିଆଯାଇଥିଲା।
● ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ଜନସାଧାରଣଙ୍କୁ ନିୟମିତ ଏବଂ ନିର୍ଭରଯୋଗ୍ୟ ସୂଚନା ପ୍ରଦାନ କରିବା ପାଇଁ ରାଜ୍ୟସ୍ତରୀୟ ମୁଖପାତ୍ର ନିଯୁକ୍ତ କରିବାକୁ ପରାମର୍ଶ ଦିଆଯାଇଥିଲା।
● ସରକାରୀ ସୋସିଆଲ ମିଡିଆ ହ୍ୟାଣ୍ଡେଲ, ଜିଲ୍ଲା ପ୍ରଶାସନ ଏବଂ ଗଣମାଧ୍ୟମ ଅଂଶୀଦାରମାନଙ୍କ ମାଧ୍ୟମରେ ଯାଞ୍ଚ କରାଯାଇଥିବା ସୂଚନା ପ୍ରସାରିତ କରାଯିବା ଉଚିତ।
● ଜିଲ୍ଲାପାଳ, ପୁଲିସ କମିଶନର ଏବଂ ପୌର କର୍ତ୍ତୃପକ୍ଷମାନେ ସକ୍ରିୟ ଭାବରେ ଜନସାଧାରଣଙ୍କ ସହ ଜଡିତ ହୋଇ ସୂଚନାର ନିର୍ଭରଯୋଗ୍ୟ ଉତ୍ସ ଭାବରେ କାର୍ଯ୍ୟ କରିବା ସହିତ ସ୍ଥାନୀୟ ପ୍ରଶାସନକୁ ଏକ ଯୋଗାଯୋଗ ଚ୍ୟାନେଲ ଭାବରେ ବ୍ୟବହାର କରାଯିବା ଉଚିତ।
ଭାରତ ସରକାର ପଶ୍ଚିମ ଏସିଆର ପରିସ୍ଥିତି ଉପରେ କଡ଼ା ନଜର ରଖିଥିବା ସୂଚନା ଦିଆଯାଇଛି। ଏଥିସହିତ ସମ୍ପୃକ୍ତ ମନ୍ତ୍ରଣାଳୟ ଏବଂ ଏଜେନ୍ସିଗୁଡ଼ିକ ମଧ୍ୟରେ ନିରନ୍ତର ସମନ୍ୱୟ ବଜାୟ ରଖାଯାଇଛି। ଇନ୍ଧନ ସୁରକ୍ଷା ସୁନିଶ୍ଚିତ କରିବା, ଏହି ଅଞ୍ଚଳରେ ଭାରତୀୟ ନାଗରିକମାନଙ୍କୁ ସୁରକ୍ଷା ଦେବା, ସାମୁଦ୍ରିକ ଗତିବିଧିର ସୁରକ୍ଷା ବଜାୟ ରଖିବା ଏବଂ ଅତ୍ୟାବଶ୍ୟକ ସାମଗ୍ରୀ ଯୋଗାଣର ନିରବଚ୍ଛିନ୍ନ ଉପଲବ୍ଧତା ସୁନିଶ୍ଚିତ କରିବା ପାଇଁ ଆବଶ୍ୟକ ପଦକ୍ଷେପ ନିଆଯାଉଛି। ପରିସ୍ଥିତି ପରିବର୍ତ୍ତନ ସମୟରେ ଜନସାଧାରଣଙ୍କୁ ଅବଗତ କରାଇବା ଏବଂ ଭାରତର ସ୍ୱାର୍ଥକୁ ସୁରକ୍ଷା ଦେବା ପାଇଁ ସମୟୋଚିତ ପଦକ୍ଷେପ ଗ୍ରହଣ କରିବାକୁ ସରକାର ପ୍ରତିବଦ୍ଧ ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଥିଲା।