ଫିଲ୍ମ ଅଭିନେତା ରଜନୀକାନ୍ତଙ୍କ କୃଷ୍ଣ- ଅର୍ଜୁନ ମନ୍ତବ୍ୟକୁ ନେଇ ଆକ୍ରମଣ କରିଛନ୍ତି ଅସଦୁଦ୍ଦିନ୍ ଓଓ୍ବେସୀ । ହାଇଦ୍ରାବାଦ ସାଂସଦ ଓଓ୍ବେସୀ କହିଛନ୍ତି ଯଦି ମୋଦି-ଶାହାଙ୍କ ଯୋଡି କୃଷ୍ଣ-ଅର୍ଜୁନ ଯୋଡି ଅଟନ୍ତି ତାହେଲେ ପାଣ୍ଡବ ଏବଂ କୌରବ କିଏ ବୋଲି ପ୍ରଶ୍ନ କରିଛନ୍ତି । ଇଦ୍ ଅବସରରେ ଓଓ୍ବେସୀଙ୍କ ଦଳ ଏଆଇଏମ୍ଆଇଏମ୍ର ହାଇଦ୍ରାବାଦ ସ୍ଥିତ କାର୍ଯ୍ୟାଳୟରେ ଏହି ମନ୍ତବ୍ୟ ଦେଇଛନ୍ତି ଓଓ୍ବେସୀ । ଉଲ୍ଲେଖଯୋଗ୍ୟ ଯେ, ଜମ୍ମୁ କାଶ୍ମୀରରୁ ଧାରା 370 ଉଚ୍ଛେଦ ହେବା ପରେ ରଜନୀକାନ୍ତ ମୋଦି ଏବଂ ଶାହାଙ୍କୁ ପ୍ରଶଂସା କରିଥିଲେ । ଉଭୟଙ୍କୁ କୃଷ୍ଣ ଅର୍ଜୁନ ଭାବରେ ଅଭିହିତ କରିଥିଲେ ରଜନୀକାନ୍ତ । ଧାରା 370ର ଉଚ୍ଛେଦ ଏବଂ ଜମ୍ମୁ କାଶ୍ମୀରର ବିଭାଜନ ଭାରତୀୟ ଇତିହାସରେ ତୃତୀୟ ଭୁଲ୍ । 1953 ମସିହାରେ ଶେଖ ଅବଦୁଲ୍ଲାଙ୍କ ଗିରଫ ଏବଂ 1987 ନିର୍ବାଚନରେ ବୁଥ୍ ରିଗିଂ ପରେ ଏହା ତୃତୀୟ ଐତିହାସିକ ଭୁଲ୍ ବୋଲି ଓଓ୍ବେସୀ କହିଛନ୍ତି । ସେହିପରି ତାମିଲନାଡୁର କଂଗ୍ରେସ ମୁଖ୍ୟ କେ ଏସ୍ ଆଲାଗିରି ମଧ୍ୟ ରଜନୀକାନ୍ତଙ୍କୁ ସମାଲୋଚନା କରିଛନ୍ତି । ସାଧାରଣ ଲୋକଙ୍କ ମୌଳିକ ଅଧିକାର କ୍ଷୁର୍ଣ୍ଣ କରିଥିବା ଜଣେ ବ୍ୟକ୍ତି କିଭଳି କୃଷ୍ଣ ହୋଇ ପାରିବେ ବୋଲି ଆଲାଗିରି ପ୍ରଶ୍ନ କରିଛନ୍ତି ।
