ଭୁବନେଶ୍ଵର: ସାମାଜିକ ଗଣମାଧ୍ୟମରେ ଧାର୍ମିକ ମୌଳବାଦ ବାର୍ତ୍ତା ପ୍ରଚାର କରିବା ଏବଂ ଦେଶ ସୁରକ୍ଷା ପ୍ରତି ବିପଦ ସୃଷ୍ଟି କରିବା ଅଭିଯୋଗରେ ଶନିବାର ଦିଲ୍ଲୀ ପୁଲିସ ଭୁବନେଶ୍ବରରୁ ଜଣେ ଅଭିଯୁକ୍ତକୁ ଗିରଫ କରିଛି। ଗିରଫ ଅଭିଯୁକ୍ତ ହେଲା ୟୁନିଟ୍-୬ ଅଞ୍ଚଳର ୨୨ ବର୍ଷୀୟ ଶେଖ୍ ଇମ୍ରାନ। ଦିଲ୍ଲୀ ପୁଲିସର ସ୍ବତନ୍ତ୍ର ଟିମ୍ କମିଶନରେଟ୍ ପୁଲିସ ସହାୟତାରେ ତାକୁ ଗିରଫ କରିଥିବା ସୂଚନା ମିଳିଛି।
ଗୋଟିଏ ସପ୍ତାହ ପୂର୍ବରୁ ବିଭିନ୍ନ ସୋସିଆଲ ମିଡିଆ ଟଫର୍ମରେ ଧାର୍ମିକ ମୌଳବାଦ ବାର୍ତ୍ତା ପ୍ରଚାର ଅଭିଯୋଗରେ ଦିଲ୍ଲୀ ପୁଲିସ କିଛି ଯୁବକଙ୍କୁ ଗିରଫ କରିଥିଲା। ଶେଖ୍ ଇମ୍ରାନ ଏହି ଯୁବକଙ୍କ ସହିତ ସଂପର୍କରେ ଥିବା ତଦନ୍ତ ପରେ ଜଣାପଡ଼ିଛି। ନିଜର ସୋସିଆଲ ମିଡିଆ ଆକାଉଣ୍ଟ ଏବଂ ହ୍ବାଟ୍ସଅପ ଜରିଆରେ ଇମ୍ରାନ ଉପରୋକ୍ତ ଯୁବକମାନଙ୍କ ସଂସ୍ପର୍ଶରେ ଆସିଥିଲା। ସେମାନଙ୍କ ସାମାଜିକ ଗଣମାଧ୍ୟମ ଆକାଉଣ୍ଟରେ ପ୍ରାୟତଃ ଧାର୍ମିକ ଉଗ୍ରବାଦ ବିଷୟବସ୍ତୁ ପ୍ରସାରିତ କରାଯାଉଥିଲା, ଯାହା ଜାତୀୟ ସୁରକ୍ଷାପାଇଁ ବିପଦ ସୃଷ୍ଟି କରୁଥିଲା ବୋଲି ପୁଲିସ କହିଛି।
ଏହି ଅଭିଯୋଗରେ ଆଜି ଇମ୍ରାନକୁ ଦିଲ୍ଲୀ ପୁଲିସ ଗିରଫ କରିବା ପରେ ଭୁବନେଶ୍ବର ଏସଡିଜେଏମ କୋର୍ଟରେ ହାଜର କରିଥିଲା। ଏହାପରେ ତାକୁ ଟ୍ରାଞ୍ଜିଟ ରିମାଣ୍ଡରେ ନିଆଯାଇଛି।