କୋଲକାତା: ସଂସଦରେ ମହିଳା ସଂରକ୍ଷଣ ବିଲ୍ କାଟ୍ ଖାଇବା ପରେ ପ୍ରଧାନମନ୍ତ୍ରୀ ମୋଦି ଦେଶବାସୀଙ୍କ ସମ୍ବୋଧନ କରିବା ସହିତ କଂଗ୍ରେସ ଏବଂ ତୃଣମୂଳ କଂଗ୍ରେସ ସମେତ ସମସ୍ତ ବିରୋଧୀଙ୍କ ଉପରେ କଡ଼ା ମନ୍ତବ୍ୟ ରଖିଥିଲେ । ଏହାର ଜବାବରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ବିଜେପିକୁ କଡ଼ା ସମାଲୋଚନା କରିଛନ୍ତି । ସେ କହିଛନ୍ତି ଯେ, ପ୍ରଧାନମନ୍ତ୍ରୀ ଏହି ପ୍ରସଙ୍ଗକୁ ସଚ୍ଚୋଟତାର ସହ ସମାଧାନ କରିବା ପରିବର୍ତ୍ତେ ଦେଶବାସୀଙ୍କୁ ଭ୍ରମିତ କରିବା ଦୁର୍ଭାଗ୍ୟଜନକ ।
ମମତା ବାନାର୍ଜୀ କହିଛନ୍ତି ଆହୁରି ମଧ୍ୟ କହିଛନ୍ତି ଯେ, ତୃଣମୂଳ କଂଗ୍ରେସ ସର୍ବଦା ମହିଳାଙ୍କ ପାଇଁ ଅଧିକ ରାଜନୈତିକ ପ୍ରତିନିଧିତ୍ୱକୁ ସମର୍ଥନ କରିଛି । ଏହି ଦଳର ମହିଳା ପ୍ରତିନିଧିଙ୍କ ଅନୁପାତି ସର୍ବାଧିକ । ଲୋକସଭାରେ ଟିଏମ୍ସିନିର୍ବାଚିତ ସଦସ୍ୟଙ୍କ ମଧ୍ୟରୁ ୩୭.୯% ମହିଳା। ସେହିପରି ରାଜ୍ୟସଭାରେ ଟିଏମ୍ସି ୪୬% ମହିଳା ସଦସ୍ୟଙ୍କୁ ମନୋନୀତ କରିଛି । ଟିଏମ୍ସି କେବେ ବି ମହିଳା ସଂରକ୍ଷଣକୁ ବିରୋଧ କରି ନାହିଁ କି ବିରୋଧ କରିବାର ପ୍ରଶ୍ନ ଉଠିନାହିଁ ବୋଲି ସେ ସ୍ପଷ୍ଟ କରିଛନ୍ତି ।
ସେ ଆହୁରି ମଧ୍ୟ କହିଛନ୍ତି, ସୀମା ନିର୍ଦ୍ଧାରଣ ପ୍ରକ୍ରିୟାକୁ ସେ ଦୃଢ ବିରୋଧ କରିଛନ୍ତି । ମାତ୍ର ମୋଦି ସରକାର ମହିଳାଙ୍କୁ ଢାଲ ଭାବରେ ବ୍ରବହାର କରି ନିଜ ସ୍ୱାର୍ଥ ସାଧନ ପାଇଁ ଯେଉଁ ଷଡଯନ୍ତ୍ର କରୁଥିଲେ, ତାହା ଭଣ୍ଡୁର ହୋଇଛି । ବାବାସାହେବ ଆମ୍ବେଦକରଙ୍କ ସମ୍ବିଧାନରେ ପରିବର୍ତ୍ତନ, ଦେଶର ବିଭାଜନ ଏବଂ ଅନ୍ୟ ରାଜ୍ୟଗୁଡ଼ିକୁ ଖର୍ଚ୍ଚ କରି ବିଜେପି ଶାସିତ ରାଜ୍ୟଗୁଡ଼ିକୁ ଅଧିକ ପ୍ରତିନିଧିତ୍ୱ ଦେବା ପାଇଁ ରାଜନୈତିକ ସୀମାର ହେରଫେରକୁ ଆମେ ଦୃଢ଼ ବିରୋଧ କରୁଛୁ। ଏହା ସଂଘୀୟ ଗଣତନ୍ତ୍ର ଉପରେ ଆକ୍ରମଣ, ଏବଂ ଆମେ ଚୁପ୍ ରହିବୁ ନାହିଁ ବୋଲି ମମତା କହିଛନ୍ତି ।
ତେବେ, ସଂସଦରେ ମହିଳା ସଂରକ୍ଷଣ ବିଲ୍ କାଟ୍ ଖାଇବା ପରେ ଏବେ ବିଜେପି ବିରୋଧୀଙ୍କୁ ନିଶାନା କରୁଥିବାବେଳେ ବିରୋଧୀ ମଧ୍ୟ ବିଜେପିକୁ କଡା ଜବାବ ଦେଉଛନ୍ତି । ନବୀନ ପଟ୍ଟନାୟକ ମଧ୍ୟ ଏହାକୁ ନେଇ ନିଜ ପ୍ରତିକ୍ରିୟା ରଖିଛନ୍ତି ।
