ବ୍ରହ୍ମପୁର, ବ୍ରହ୍ମପୁର ଲୋକସଭା ନିର୍ବାଚନ ମଣ୍ଡଳୀର ସାଂସଦ ଡ଼ଃ ପ୍ରଦୀପ କୁମାର ପାଣିଗ୍ରାହୀ, ଗଞ୍ଜାମ ଜିଲ୍ଲାର କାଳିପଲ୍ଲୀ ପଞ୍ଚାୟତରେ ବ୍ୟାପୁଥିବା କିଡ଼ନୀ ରୋଗର ଭୟାବହତାକୁ ନେଇ ଗଭୀର ଉଦବେଗ ପ୍ରକାଶ କରିଛନ୍ତି। ଏହି ସମ୍ବେଦନଶୀଳ ପ୍ରସଙ୍ଗରେ ତୁରନ୍ତ ହସ୍ତକ୍ଷେପ କରି ଏକ ନିରପେକ୍ଷ ତଦନ୍ତ କମିଟି ଗଠନ କରିବାକୁ ସେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କୁ ପତ୍ର ମାଧ୍ୟମରେ ଅନୁରୋଧ କରିଛନ୍ତି।
କାଳିପଲ୍ଲୀ, ବଡ଼ପୁଟି ଓ ହରିପୁର ସମେତ ଆଖପାଖ ଅଞ୍ଚଳରେ ବ୍ୟାପୁଥିବା ଏହି ରୋଗ ଯୋଗୁଁ ଅନେକ ଜୀବନ ହାନି ଘଟିଛି। ସ୍ଥାନୀୟ ଜନସାଧାରଣ ଓ ପ୍ରତିନିଧିମାନଙ୍କ ଅଭିଯୋଗ ଅନୁଯାୟୀ, ନିକଟସ୍ଥ ଭାରତୀୟ ବିରଳ ମୃତ୍ତିକା (IREL) କାରଖାନାରୁ ନିର୍ଗତ ବର୍ଜ୍ୟବସ୍ତୁ ଓ ଜଳ ପ୍ରଦୂଷଣ ଏହାର ମୁଖ୍ୟ କାରଣ ହୋଇଥାଇପାରେ। ବାରମ୍ବାର ବିଭିନ୍ନ ସରକାରୀ ମଞ୍ଚରେ ଏହି ସମସ୍ୟା ଉପସ୍ଥାପନ କରାଯାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ଠୋସ ପଦକ୍ଷେପ ନିଆଯାଇନାହିଁ।
ଏହି ବିଷୟରେ ମତ ରଖି ଡ଼ଃ ପାଣିଗ୍ରାହୀ କହିଛନ୍ତି, “କାଳିପଲ୍ଲୀବାସୀଙ୍କ ସ୍ୱାସ୍ଥ୍ୟ ଏବଂ ଜୀବନ ସର୍ବୋପରି। ଏହା ଏକ ଗୁରୁତର ଜନସ୍ୱାସ୍ଥ୍ୟ ସମସ୍ୟା। ମୁଁ ମୁଖ୍ୟମନ୍ତ୍ରୀଙ୍କୁ ନିବେଦନ କରିଛି ଯେ, ସ୍ୱତନ୍ତ୍ର ଚିକିତ୍ସା ବିଶେଷଜ୍ଞ ଏବଂ ପରିବେଶବିତ୍ ମାନଙ୍କୁ ନେଇ ଏକ ଉଚ୍ଚସ୍ତରୀୟ ତଦନ୍ତ କମିଟି ଗଠନ କରାଯାଉ। ସତ୍ୟାସତ୍ୟ ଜାଣିବା ଏବଂ ପ୍ରଭାବିତ ପରିବାରଙ୍କୁ ଉଚିତ ସହାୟତା ଓ ସ୍ୱଚ୍ଛ ପାନୀୟ ଜଳ ଯୋଗାଇ ଦେବା ଆମର ପ୍ରାଥମିକତା।”
ସାଂସଦ ରାଜ୍ୟ ସରକାରଙ୍କ ନିକଟରେ ନିମ୍ନଲିଖିତ ଦାବି ରଖିଛନ୍ତି:
ନିରପେକ୍ଷ ତଦନ୍ତ: ରୋଗର ପ୍ରକୃତ କାରଣ ନିର୍ଣ୍ଣୟ କରିବା ପାଇଁ ସ୍ୱତନ୍ତ୍ର ଏକ୍ସପର୍ଟ କମିଟି ଦ୍ୱାରା ତଦନ୍ତ।
ସ୍ୱାସ୍ଥ୍ୟ ପରୀକ୍ଷଣ: ସମସ୍ତ ଗ୍ରାମବାସୀଙ୍କ ପାଇଁ ଘରକୁ ଘର ବୁଲି ସ୍ୱାସ୍ଥ୍ୟ ପରୀକ୍ଷା ଏବଂ ତୁରନ୍ତ ଚିକିତ୍ସା ବ୍ୟବସ୍ଥା।
ସୁରକ୍ଷିତ ଜଳ ଯୋଗାଣ: ପ୍ରଦୂଷଣ ମୁକ୍ତ ପାନୀୟ ଜଳ ପ୍ରକଳ୍ପର କାର୍ଯ୍ୟକାରିତା ଏବଂ ପୀଡ଼ିତ ପରିବାରଙ୍କ ପାଇଁ ଆର୍ଥିକ ସହାୟତା।
ଡ଼ଃ ପାଣିଗ୍ରାହୀ ଏହି ସମସ୍ୟାର ସ୍ଥାୟୀ ସମାଧାନ ନ ହେବା ପର୍ଯ୍ୟନ୍ତ ସରକାରୀ ସ୍ତରରେ ନିରନ୍ତର ସଂଘର୍ଷ ଜାରି ରଖିବେ ବୋଲି ପ୍ରକାଶ କରିଛନ୍ତି।
ଗଞ୍ଜାମ ହାଜତ ମୃତ୍ୟୁ ମାମଲା: ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଲେ ବ୍ରହ୍ମପୁର ସାଂସଦ