ନୂଆଦିଲ୍ଲୀ: କର୍ଣ୍ଣାଟକର ନୂତନ ମୁଖ୍ୟମନ୍ତ୍ରୀଙ୍କ ପାଇଁ ପଥ ପରିଷ୍କାର ହୋଇଛି। ଡିକେ ଶିବକୁମାରଙ୍କୁ କଂଗ୍ରେସ ବିଧାୟକ ଦଳର ନେତା ଭାବରେ ନିର୍ବାଚିତ କରାଯାଇଛି। ରାଜ୍ୟପାଳ ତାଙ୍କୁ ଜୁନ୍ ୩ ତାରିଖରେ ଶପଥ ଗ୍ରହଣ କରିବାକୁ ମଧ୍ୟ ନିମନ୍ତ୍ରଣ କରିଛନ୍ତି। କର୍ଣ୍ଣାଟକ ରାଜ୍ୟପାଳ ଥାୱରଚାନ୍ଦ ଗେହଲଟ୍ ଜୁନ୍ ୩ ତାରିଖରେ କର୍ଣ୍ଣାଟକର ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବାକୁ ଡିକେ ଶିବକୁମାରଙ୍କୁ ନିମନ୍ତ୍ରଣ କରିଛନ୍ତି।
କର୍ଣ୍ଣାଟକରେ କଂଗ୍ରେସ କ୍ଷମତାରେ ଅଛି। କିନ୍ତୁ ପଦବୀକୁ ନେଇ ତିନି ବର୍ଷ ଧରି ବିବାଦ ଜାରି ରହିଛି। ପୂର୍ବରୁ ସିଦ୍ଧରମୈୟା କଂଗ୍ରେସ ସରକାରଙ୍କ ମୁଖ୍ୟମନ୍ତ୍ରୀ ପଦରେ ରହିଥିଲେ। ଦଳ ଭିତରେ ବହୁ ଦିନ ଧରି ଦାବି କରାଯାଉଥିଲା ଯେ, କ୍ଷମତା ପରିବର୍ତ୍ତନ ହେବ।
ସିଦ୍ଧରମୈୟା ଗୁରୁବାର ଇସ୍ତଫା ଦେଇଥିଲେ, ଯାହା ଶିବକୁମାରଙ୍କ ପାଇଁ ପଥ ପ୍ରଶସ୍ତ କରିଥିଲା। ରାଜ୍ୟପାଳ ଶୁକ୍ରବାର ତାଙ୍କ ଇସ୍ତଫା ଗ୍ରହଣ କରି କ୍ୟାବିନେଟକୁ ଭାଙ୍ଗି ଦେଇଥିଲେ। ନୂତନ ସରକାର ଗଠନ ପାଇଁ ଏବେ ପ୍ରସ୍ତୁତି ଆରମ୍ଭ ହୋଇଛି।