ନୂଆଦିଲ୍ଲୀ: ପଶ୍ଚିମବଙ୍ଗ ରାଜନୀତିରୁ ଏକ ଗୁରୁତ୍ୱପୂର୍ଣ୍ଣ ଖବର ଆସିଛି। ଲୋକସଭା ବାଚସ୍ପତିଙ୍କୁ ଏକ ଚିଠିରେ ଦସ୍ତଖତ କରିଥିବା ମମତା ବାନାର୍ଜୀଙ୍କ ତୃଣମୂଳ କଂଗ୍ରେସର ୧୯ ଜଣ ବିଦ୍ରୋହୀ ସାଂସଦଙ୍କ ନାମ ପ୍ରକାଶ ପାଇଛି। ଏହି ବିଦ୍ରୋହୀ ସାଂସଦଙ୍କ ତାଲିକାରେ କାକୋଲି ଘୋଷ, ଜଗଦୀଶ ଚନ୍ଦ୍ର ବସୁନିଆ ଏବଂ ଖଲିଲୁର ରହମାନ ଅନ୍ତର୍ଭୁକ୍ତ।
ଟିଏମସି ବିଦ୍ରୋହୀ ଶିବିରରେ ସାଂସଦ ୟୁସୁଫ ପଠାନ, ଆବୁ ତାହିର ଖାନ, ପାର୍ଥ ଭୌମିକ, ବାପି ହଲଦର, ସୟାନି ଘୋଷ, ମିତାଲି ବାଗ, ଦୀପକ ଅଧିକାରୀ, କାଲିପଦା ସୋରେନ, ଜୁନ ମାଲିୟା, ଅରୂପ ଚକ୍ରବର୍ତ୍ତୀ, ଡାଃ ଶର୍ମିଳା ସରକାର, ଶତ୍ରୁଘ୍ନ ସିହ୍ନା, ଆସିତ କୁମାର ମଲ, ଶତାବ୍ଧି ରାୟ ଏବଂ ରଚନା ବାନାର୍ଜୀ ଅନ୍ତର୍ଭୁକ୍ତ।
ଏହି ସମୟରେ ତୃଣମୁଲ କଂଗ୍ରେସ (ଟିଏମସି) ନେତା କଲ୍ୟାଣ ବାନାର୍ଜୀ ଏବଂ କିର୍ତ୍ତୀ ଆଜାଦ ମଙ୍ଗଳବାର ଦିନ ଦଳର ବିଦ୍ରୋହୀ ସାଂସଦଙ୍କ ଉପରେ ଘୋର ଆକ୍ରମଣ କରିଥିଲେ। ସେମାନେ ବିଦ୍ରୋହୀ ନେତାମାନଙ୍କୁ ରାଜନୈତିକ ନୈତିକତା ଅଭାବ, ବିଜେପି ସହ ସମ୍ପର୍କ ଥିବା ଏବଂ ସଙ୍କଟ ସମୟରେ ଦଳୀୟ କର୍ମୀଙ୍କୁ ତ୍ୟାଗ କରିଥିବା ଅଭିଯୋଗ କରିଛନ୍ତି। କଲ୍ୟାଣ ବାନାର୍ଜୀ ପ୍ରଶ୍ନ କରିଛନ୍ତି ଯେ, ଯଦି ବିଦ୍ରୋହୀ ସାଂସଦମାନେ ସେମାନଙ୍କ ପରି ସମର୍ଥନ ପାଇବାର ଦାବି କରନ୍ତି, ତେବେ ସେମାନେ କାହିଁକି ଆନୁଷ୍ଠାନିକ ଭାବରେ ବିଜେପିରେ ଯୋଗ ଦେଉନାହାଁନ୍ତି। ସେ କହିଛନ୍ତି ଯେ, ବିଜେପି ସେମାନଙ୍କୁ ଗ୍ରହଣ କରିବ ନାହିଁ।
କାକୋଲି ଘୋଷ ଦସ୍ତିଦାରଙ୍କ ନେତୃତ୍ୱରେ ବିଦ୍ରୋହୀ ଗୋଷ୍ଠୀ ପ୍ରାୟ ୨୦ ଜଣ ସାଂସଦଙ୍କ ସମର୍ଥନକୁ ଉଲ୍ଲେଖ କରି ଲୋକସଭା ବାଚସ୍ପତିଙ୍କୁ NDA ପ୍ରତି ସମର୍ଥନ ଘୋଷଣା କରିବାକୁ ଏକ ଚିଠି ଲେଖିବା ପରେ ଏହି ବିବୃତ୍ତି ଦେଇଛି। ପୂର୍ବତନ ତୃଣମୂଳ କଂଗ୍ରେସ ରାଜ୍ୟସଭା ସଦସ୍ୟ ସୁଖେନ୍ଦୁ ଶେଖର ରାୟଙ୍କ ଉଦାହରଣ ଦେଇ ବାନାର୍ଜୀ କହିଛନ୍ତି ଯେ, ସେ ଦଳ ବିରୁଦ୍ଧରେ ଅଭିଯୋଗ ଆଣିବା ପରେ ଇସ୍ତଫା ଦେଇ ନୈତିକତା ପ୍ରଦର୍ଶନ କରିଛନ୍ତି। ବିଦ୍ରୋହୀ ସାଂସଦମାନେ ମଧ୍ୟ ସେହିପରି କରିବା ଉଚିତ।
କଲ୍ୟାଣ ବାନାର୍ଜୀ ବିଦ୍ରୋହୀ ଗୋଷ୍ଠୀ ଦ୍ୱାରା ଜାରି କରାଯାଇଥିବା କଥିତ ଚିଠିର ସତ୍ୟତା ଉପରେ ପ୍ରଶ୍ନ ଉଠାଇ କହିଛନ୍ତି ଯେ, ଏତେ ଗୁରୁତ୍ୱପୂର୍ଣ୍ଣ ଦଲିଲ କାହିଁକି ସାର୍ବଜନୀନ କରାଯାଇ ନାହିଁ। ଟିଏମସି ନେତାମାନେ ଅଭିଯୋଗ କରିଛନ୍ତି ଯେ, ବିଦ୍ରୋହୀ ସାଂସଦମାନେ ବିଜେପି ସହିତ ସହଯୋଗ କରୁଛନ୍ତି। ସେମାନେ କହିଛନ୍ତି ଯେ, ଏହି ନେତାମାନେ ଶୁଭେନ୍ଦୁ ଅଧିକାରୀଙ୍କ ଉପସ୍ଥିତିରେ କେନ୍ଦ୍ରମନ୍ତ୍ରୀ ଭୂପେନ୍ଦ୍ର ଯାଦବଙ୍କୁ ଭେଟିଛନ୍ତି, ଯାହା ସେମାନଙ୍କର ଉଦ୍ଦେଶ୍ୟ ସ୍ପଷ୍ଟ କରେ।