ହାଇଦ୍ରାବାଦ: ପିଲାମାନଙ୍କ ପାଇଁ ସୁରକ୍ଷିତ ଓ ସ୍ୱାସ୍ଥ୍ୟକର ପରିବେଶର ପ୍ରତିଶ୍ରୁତି ଦେଇ ଆୟୋଜିତ ହୋଇଥିବା ଏକ ଗ୍ରୀଷ୍ମ ଶିବିରର ଚମକପୂର୍ଣ୍ଣ ବିଜ୍ଞାପନ ପଛର ସତ୍ୟ ସାମ୍ନାକୁ ଆସିବା ପରେ ଗ୍ରାହକ ଅଦାଲତ ଆୟୋଜକମାନଙ୍କୁ କଡ଼ା ଝଟକା ଦେଇଛନ୍ତି। ପିଲାମାନଙ୍କ ପାନୀୟ ଜଳରେ ଝିଟିପିଟି ଓ କୀଟପତଙ୍ଗ ମିଳିବା, ଅପରିଷ୍କାର ଖାଦ୍ୟ ଏବଂ ଅପର୍ଯ୍ୟାପ୍ତ ସୁରକ୍ଷା ବ୍ୟବସ୍ଥା ଅଭିଯୋଗକୁ ଗୁରୁତ୍ୱର ସହ ନେଇ ହାଇଦ୍ରାବାଦ ଜିଲ୍ଲା ଗ୍ରାହକ ବିବାଦ ସମାଧାନ କମିଶନ ଫି ଫେରସ୍ତ ସହ କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି।
ତେଲେଙ୍ଗାନାର ରଙ୍ଗା ରେଡ୍ଡି ଜିଲ୍ଲାରେ ଆୟୋଜିତ ଏହି ଆବାସିକ ଗ୍ରୀଷ୍ମ ଶିବିରରେ ୮ରୁ ୧୮ ବର୍ଷ ବୟସର ପିଲାମାନଙ୍କ ପାଇଁ ଏସି ଆବାସ, ପୁଷ୍ଟିକର ଖାଦ୍ୟ, ୨୪ ଘଣ୍ଟିଆ ଚିକିତ୍ସା ସୁବିଧା, କଡ଼ା ସୁରକ୍ଷା ବ୍ୟବସ୍ଥା ଓ ପିତାମାତାଙ୍କ ସହ ଜରୁରୀ ଯୋଗାଯୋଗର ଆଶ୍ୱାସନ ଦିଆଯାଇଥିଲା। ଏହି ପ୍ରତିଶ୍ରୁତି ଉପରେ ଭରସା କରି ତିନି ଜଣ ପିଲାଙ୍କ ପରିବାର ମୋଟ ୧.୬୬ ଲକ୍ଷ ଟଙ୍କା ଫି ଦେଇଥିଲେ।
କିନ୍ତୁ ଶିବିରରେ ପହଞ୍ଚିବା ପରେ ପରିସ୍ଥିତି ସମ୍ପୂର୍ଣ୍ଣ ଭିନ୍ନ ଥିବା ଅଭିଯୋଗ ହୋଇଥିଲା।
ପିତାମାତାଙ୍କ ଅଭିଯୋଗ ଅନୁଯାୟୀ, ପିଲାମାନଙ୍କ ପାନୀୟ ଜଳରେ ଝିଟିପିଟି ଓ କୀଟପତଙ୍ଗ ମିଳିଥିଲା। ପୁଷ୍ଟିକର ଖାଦ୍ୟ ବଦଳରେ ବାରମ୍ବାର ଇନଷ୍ଟାଣ୍ଟ ନୁଡୁଲ୍ସ ପରିବେଷଣ କରାଯାଉଥିଲା। ଅସୁସ୍ଥ ହୋଇପଡ଼ିଥିବା ପିଲାମାନଙ୍କୁ ଉପଯୁକ୍ତ ଚିକିତ୍ସା ସେବା ମଧ୍ୟ ମିଳିନଥିଲା। ଏପରିକି ଜରୁରୀ ପରିସ୍ଥିତିରେ ମଧ୍ୟ ସେମାନଙ୍କୁ ନିଜ ପିତାମାତାଙ୍କ ସହ କଥା ହେବାକୁ ଦିଆଯାଇନଥିବା ଅଭିଯୋଗ ହୋଇଛି।
ପିଲାମାନଙ୍କ ଅସୁସ୍ଥତା ଓ ଅବ୍ୟବସ୍ଥା ସମ୍ପର୍କରେ ଜାଣିବା ପରେ ପିତାମାତାମାନେ ଶିବିର ପରିଦର୍ଶନ କରିଥିଲେ। ସେଠାରେ ସୁରକ୍ଷା ଓ ପରିଚାଳନା ବ୍ୟବସ୍ଥାର ଅନେକ ତ୍ରୁଟି ଦେଖି ସେମାନେ ପିଲାମାନଙ୍କୁ ଫେରାଇ ଆଣିଥିଲେ ଏବଂ ଫି ଫେରସ୍ତ ଦାବି କରିଥିଲେ। ଆୟୋଜକମାନେ ଟଙ୍କା ଫେରାଇବାକୁ ମନା କରିବା ପରେ ମାମଲା ଗ୍ରାହକ ଅଦାଲତକୁ ଯାଇଥିଲା।
ସମସ୍ତ ପ୍ରମାଣ ଓ ଯୁକ୍ତି ଶୁଣିବା ପରେ ଗ୍ରାହକ ଅଦାଲତ ଆୟୋଜକମାନଙ୍କୁ ୧.୬୬ ଲକ୍ଷ ଟଙ୍କା ଫି ୧୨ ପ୍ରତିଶତ ବାର୍ଷିକ ସୁଧ ସହ ଫେରସ୍ତ କରିବାକୁ ନିର୍ଦ୍ଦେଶ ଦେଇଛନ୍ତି। ଏହା ସହ ତିନି ଜଣ ପିଲାଙ୍କୁ ୫୦ ହଜାର ଟଙ୍କା ଲେଖାଏ କ୍ଷତିପୂରଣ, ଅର୍ଥାତ୍ ମୋଟ ୧.୫୦ ଲକ୍ଷ ଟଙ୍କା ପ୍ରଦାନ କରିବାକୁ ରାୟ ଦେଇଛନ୍ତି।
ଏଥିସହ ଆଇନଗତ ଖର୍ଚ୍ଚ ବାବଦକୁ ୧୫ ହଜାର ଟଙ୍କା ଦେବା ଏବଂ ୪୫ ଦିନ ମଧ୍ୟରେ ସମସ୍ତ ରାଶି ପରିଶୋଧ କରିବାକୁ ଆଦେଶ ଦିଆଯାଇଛି।
ଏହି ରାୟ କେବଳ ଗୋଟିଏ ଗ୍ରୀଷ୍ମ ଶିବିର ବିରୋଧରେ କାର୍ଯ୍ୟାନୁଷ୍ଠାନ ନୁହେଁ, ବରଂ ପିଲାମାନଙ୍କ ସୁରକ୍ଷା ଓ ସ୍ୱାସ୍ଥ୍ୟ ସହ ଅବହେଳା କରୁଥିବା ସଂସ୍ଥାମାନଙ୍କ ପାଇଁ ଏକ କଡ଼ା ସନ୍ଦେଶ। ଚକଚକିଆ ବିଜ୍ଞାପନ ଓ ବଡ଼ ବଡ଼ ପ୍ରତିଶ୍ରୁତି ପଛରେ ଲୁଚିଥିବା ବାସ୍ତବତାକୁ ଯାଞ୍ଚ କରିବା ଏବଂ ପିଲାଙ୍କ ସୁରକ୍ଷାକୁ ସର୍ବୋଚ୍ଚ ପ୍ରାଥମିକତା ଦେବାକୁ ଏହି ଘଟଣା ଆଉଥରେ ସତର୍କ କରିଛି।