ଭୁବନେଶ୍ଵର : ସୌମ୍ୟରଞ୍ଜନ ସ୍ୱାଇଁ ମୃତ୍ୟୁ ମାମଲାରେ ତଦନ୍ତ ଯେତେ ଆଗକୁ ବଢ଼ୁଛି, ସେତେ ନୂଆ ନୂଆ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସୁଛି। କ୍ରାଇମବ୍ରାଞ୍ଚର ପ୍ରାଥମିକ ତଦନ୍ତ ରିପୋର୍ଟରେ ବରିଷ୍ଠ ଆଇପିଏସ ଅଧିକାରୀ ଦୟାଲ ଗଙ୍ଗୱାରଙ୍କ ବିରୋଧରେ ସଙ୍ଗିନ ଅଭିଯୋଗ ଉଠିଛି। ରିପୋର୍ଟ ଅନୁସାରେ, କେବଳ ସୌମ୍ୟରଞ୍ଜନ ନୁହେଁ, ବରଂ ୮ରୁ ଅଧିକ କନଷ୍ଟେବଲଙ୍କୁ ସେ ଘରୋଇ ଏବଂ ବ୍ୟକ୍ତିଗତ କାମରେ ନିୟୋଜିତ କରୁଥିଲେ।
ତଦନ୍ତରେ ଏହା ମଧ୍ୟ ସାମ୍ନାକୁ ଆସିଛି ଯେ, କେତେକ କନଷ୍ଟେବଲଙ୍କୁ ସରକାରୀ ଡ୍ୟୁଟି ବଦଳରେ ଘରୋଇ କାର୍ଯ୍ୟ କରିବାକୁ କୁହାଯାଉଥିଲା। ଏହି ଅଭିଯୋଗ ଦୀର୍ଘଦିନ ଧରି ଚାଲିଆସୁଥିବା ବେଳେ ସୌମ୍ୟରଞ୍ଜନଙ୍କ ମୃତ୍ୟୁ ପରେ ଘଟଣା ଗୁରୁତର ମୋଡ଼ ନେଇଛି। ସୌମ୍ୟଙ୍କ ପରିବାର ପକ୍ଷରୁ ମାନସିକ ନିର୍ଯାତନା ଏବଂ ବ୍ୟକ୍ତିଗତ କାମରେ ଖଟାଯାଉଥିବା ଅଭିଯୋଗ ଆଣିବା ପରେ ତଦନ୍ତ ଆରମ୍ଭ ହୋଇଥିଲା।
କ୍ରାଇମବ୍ରାଞ୍ଚ ରିପୋର୍ଟର ଏହି ଖୁଲାସା ପରେ ଦୟାଲ ଗଙ୍ଗୱାରଙ୍କ ଅଡୁଆ ବଢ଼ିଯାଇଛି। ପୂର୍ବରୁ ତାଙ୍କୁ ADG (କମ୍ୟୁନିକେସନ) ପଦରୁ ହଟାଇ ଗୃହ ବିଭାଗର OSD ଭାବେ ବଦଳି କରାଯାଇଥିଲା। ଗତକାଲି ମୁଖ୍ୟମନ୍ତ୍ରୀ ତାଙ୍କୁ ନିଲମ୍ବନ କରିଥିବାବେଳେ, ଏବେ ତଦନ୍ତର ପରବର୍ତ୍ତୀ ପର୍ଯ୍ୟାୟକୁ ନେଇ ଚର୍ଚ୍ଚା ବଢ଼ିଛି।
ସୌମ୍ୟରଞ୍ଜନ ସ୍ୱାଇଁଙ୍କ ମୃତ୍ୟୁ ମାମଲା ଏବେ କେବଳ ଏକ ଅସ୍ୱାଭାବିକ ମୃତ୍ୟୁ ଘଟଣାରେ ସୀମିତ ନାହିଁ। ଏହା ପୁଲିସ ବ୍ୟବସ୍ଥା ଭିତରେ କ୍ଷମତାର ଦୁରୁପଯୋଗ, ଅଧସ୍ତନ କର୍ମଚାରୀଙ୍କ ପ୍ରତି ବ୍ୟବହାର ଏବଂ କାର୍ଯ୍ୟ ସଂସ୍କୃତିକୁ ନେଇ ଗମ୍ଭୀର ପ୍ରଶ୍ନ ଉଠାଇଛି। ତଦନ୍ତର ଅନ୍ତିମ ରିପୋର୍ଟ ପରେ ଆହୁରି ବଡ଼ ଖୁଲାସା ହେବାର ସମ୍ଭାବନା ରହିଛି।