ଭୁବନେଶ୍ୱର: ଚଳିତ ଶିକ୍ଷାବର୍ଷରେ ଯୁକ୍ତ ୩ (UG) ନାମଲେଖା ପାଇଁ ଆବେଦନ ସଂଖ୍ୟା ବଢ଼ିଥିବାରୁ ଉଚ୍ଚଶିକ୍ଷା ବିଭାଗ ବଡ଼ ପଦକ୍ଷେପ ନେଇଛି। ଅଧିକ ସଂଖ୍ୟକ ଛାତ୍ରଛାତ୍ରୀଙ୍କୁ ଉଚ୍ଚଶିକ୍ଷାରେ ସୁଯୋଗ ଦେବା ଲକ୍ଷ୍ୟରେ ରାଜ୍ୟର ବିଭିନ୍ନ କଲେଜରେ ମୋଟ ୧୦ ହଜାର ୩୭୨ଟି ଅତିରିକ୍ତ ସିଟ୍ ବୃଦ୍ଧି କରାଯାଇଛି।
ବିଭାଗୀୟ ସୂଚନା ଅନୁଯାୟୀ, ଷ୍ଟେଟ୍ ପବ୍ଲିକ ୟୁନିଭର୍ସିଟିଗୁଡ଼ିକରେ ୧,୨୧୬ଟି ସିଟ୍ ବଢ଼ାଯାଇଛି। ସେହିପରି ସରକାରୀ କଲେଜଗୁଡ଼ିକରେ ସର୍ବାଧିକ ୪,୬୮୪ଟି ସିଟ୍ ବୃଦ୍ଧି କରାଯାଇଛି, ଯାହା ଅଧିକ ସଂଖ୍ୟକ ଛାତ୍ରଛାତ୍ରୀଙ୍କୁ ନାମଲେଖାର ସୁଯୋଗ ଦେବ।
ଏହାସହ ୪୮୮ଟି ବର୍ଗ (ଡିଗ୍ରୀ) କଲେଜରେ ୩,୪୧୬ଟି ସିଟ୍ ବୃଦ୍ଧି କରାଯାଇଥିବା ବେଳେ ୬୬୨ଟି ଅନୁଦାନପ୍ରାପ୍ତ କଲେଜରେ ଅତିରିକ୍ତ ୧,୦୫୬ଟି ସିଟ୍ ଯୋଡ଼ାଯାଇଛି। ଏହି ନିଷ୍ପତ୍ତି ଫଳରେ ନାମଲେଖା ପ୍ରକ୍ରିୟାରେ ଚାପ କମିବା ସହ ଅଧିକ ଯୋଗ୍ୟ ଛାତ୍ରଛାତ୍ରୀ ଉଚ୍ଚଶିକ୍ଷାର ସୁଯୋଗ ପାଇବେ ବୋଲି ଆଶା କରାଯାଉଛି।
ଉଚ୍ଚଶିକ୍ଷା ବିଭାଗର ଏହି ପଦକ୍ଷେପକୁ ଛାତ୍ରଛାତ୍ରୀ ଓ ଅଭିଭାବକମାନେ ସ୍ୱାଗତ କରିଛନ୍ତି। ବିଶେଷକରି ଯେଉଁ ଛାତ୍ରଛାତ୍ରୀମାନେ ସିଟ୍ ଅଭାବ ଯୋଗୁଁ ନାମଲେଖା ସୁଯୋଗ ହରାଇବା ଆଶଙ୍କାରେ ଥିଲେ, ସେମାନଙ୍କ ପାଇଁ ଏହା ଏକ ବଡ଼ ଆଶ୍ଵସ୍ତି ଭାବେ ଉଭାହୋଇଛି ।