ଖୋର୍ଦ୍ଧାର ବାଲୁଗାଁ ନିକଟ ବେଲପଡ଼ା ଛକ ନିକଟରେ ଏକ ସଡକ ଦୁର୍ଘଟଣାରେ ଦୁଇ ଜଣ ପ୍ରାଣ ହରାଇଛନ୍ତି । ଖୋର୍ଦ୍ଧା ବାଲୁଗାଁ୧୬ ନମ୍ବର ଜାତୀୟ ରାଜପଥରେ ଦୁଇଟି ଟ୍ରକ୍ ପରସ୍ପର ସହ ଧକ୍କା ହେବାରୁ ଡ୍ରାଇଭର ଓ ହେଲପର୍ ପ୍ରାଣ ହରାଇଛନ୍ତି । ସୂଚନାଯୋଗ୍ୟ, ଆଜି ଭୋର ୪ଟା ସମୟରେ ଏହି ଘଟଣା ଘଟିିଛି । ବେଲପଡ଼ା ଛକ ନିକଟସ୍ଥ ରାଜପଥ ପାର୍ଶ୍ବରେ ଏକ ପଥର ବୋଝେଇ ଟ୍ରକ୍ ଖରାପ ହେବା କାରଣରୁ ଛିଡା ହୋଇଥିବାବେଳେ ଏହି ସମୟରେ ଅନ୍ୟ ଏକ ଧାନ ବୋଝେଇ ଟ୍ରକ୍ ଏହି ଟ୍ରକ୍ଟିକୁ ପଛରୁ ଧକ୍କା ଦେଇଥିଲା । ଧକ୍କା ଦେବା ସମୟରେ ପଥର ବୋଝଇ ଟ୍ରକ୍ର ଡ୍ରାଇଭର୍ ଓ ହେଲପର୍ଙ୍କ ମୃତ୍ୟୁ ହୋଇଛି । ମୃତକ ଦ୍ବୟ ହେଲେ ମୁନା ପାତ୍ର ଓ ସୁଦର୍ଶନ ବେହେରା । ମୁନା ପାତ୍ର ଟ୍ରକ୍ର ଡ୍ରାଇଭର ଓ ସେ ଖୋର୍ଦ୍ଧା ଜିଲ୍ଲା ଟାଙ୍ଗୀ ଅଞ୍ଚଳର ଜଣାପଡିଥିବାବେଳେ ମୃତ ସୁଦର୍ଶନ ବେହେରା ହେଉଛନ୍ତି ସେହି ଟ୍ରକର୍ ହେଲପର୍ । ତାଙ୍କ ଘର ଖୋର୍ଦ୍ଧା ଜିଲ୍ଲା ଚଣ୍ଡେଶ୍ବର ଅଞ୍ଚଳରେ । ଘଟଣାସ୍ଥଳରେ ବାଣପୁର ପୁଲିସ୍ ପହଞ୍ଚି ମୃତଦେହକୁ ଜବତ କରି ଅପମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ।
