ଖୋର୍ଦ୍ଧା: ଦୈନନ୍ଦିନ ଜୀବନରେ ଯୋଗ ଅଭ୍ୟାସ ଏକାନ୍ତ ଜରୁରୀ। ପ୍ରତ୍ୟେକ ଦିନ ଆସନ, ପ୍ରାଣାୟମ କରିବା ଦ୍ୱାରା ବାର୍ଦ୍ଧକ୍ୟ ସମୟରେ ଶରୀର ସ୍ୱାସ୍ଥ୍ୟ ରହିଥାଏ। ବର୍ତ୍ତମାନ ଭାରତ ବର୍ଷରେ ୬୦ ବର୍ଷରୁ ଉର୍ଦ୍ଧ୍ବ ଲୋକ ବଢ଼ିବାକୁ ଲାଗିଛନ୍ତି। ମାନସିକ ଶାରୀରିକ ସୁସ୍ଥ ସହିତ ଶାନ୍ତି ଜୀବନ ଯାପନ ପାଇଁ ସମସ୍ତଙ୍କ ପାଇଁ ଯୋଗ ମୌଳିକ ଆବଶ୍ୟକତା ହୋଇ ଯାଇଛି। ଏଣୁ ଜାତି, ଧର୍ମ, ବର୍ଣ୍ଣ, ଲିଙ୍ଗ, ଭାଷା ଓ ବୟସ ନିର୍ବିଶେଷରେ ସୁସ୍ଥ ଶରୀର ଓ ନିରାମୟ ଜୀବନ ଯାପନ ପାଇଁ ଯୋଗ ସମସ୍ତଙ୍କ “ଧ୍ୟାନ” ହେଉ ବୋଲି ଆଜି ବିଜୁପଟ୍ଟନାୟକ ବହୁମୁଖି ଇଣ୍ଡୋର୍ ଷ୍ଟାଡିୟମ, ଖୋର୍ଦ୍ଧା ଠାରେ ଜିଲ୍ଲାସ୍ତରୀୟ ଅନ୍ତର୍ଜାତୀୟ ଯୋଗ ଦିବସ ପାଳନରେ ମୁଖ୍ୟ ଅତିଥି ଭାବେ ଓଡ଼ିଶାର ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ, ଓଡ଼ିଶା ସରକାର ଯୋଗ ଦେଇ ପ୍ରଦୀପ ପ୍ରଜ୍ଜ୍ୱଳନ ପୂର୍ବକ ଉଦ୍ଘାଟନ କରି ଉପରୋକ୍ତ ବିଷୟ ପ୍ରକାଶ କରିଛନ୍ତି।
ସମ୍ମାନୀୟ ଅତିଥି ଭାବେ ମାନ୍ୟବର ବିଧାୟକ, ଖୋର୍ଦ୍ଧା ତଥା ଜିଲ୍ଲା ଯୋଜନାବୋର୍ଡ ଅଧ୍ୟକ୍ଷ ପ୍ରଶାନ୍ତ କୁମାର ଜଗଦେବ ଯୋଗଦେଇ ଅନ୍ତର୍ଜାତୀୟ ଯୋଗ ଦିବସ ଉପଲକ୍ଷେ ଜିଲ୍ଲାବାସୀଙ୍କୁ ଅଭିନନ୍ଦନ ଜଣାଇ କହିଲେ ଯୋଗ ସବୁ ଔଷଧ ଠାରୁ ଶ୍ରେଷ୍ଠ ଔଷଧ ଅଟେ। ଯୋଗ ଶରୀରକୁ ସୁସ୍ଥ ରଖିବା ସହ ଧ୍ୟାନ ଯୋଗ ଆତ୍ମା ପରମାତ୍ମାଙ୍କ ସହ ସଂଯୋଗ କରାଇଥାଏ ଯ ଦ୍ଵାରା ବିଶ୍ଵର କଲ୍ୟାଣ ସାଧିତ ହୁଏ। ଯୋଗକୁ ସମସ୍ତେ ଆପଣେଇଲେ ବିଶ୍ୱ ହସି ଉଠିବ ବୋଲି ସେ ବକ୍ତବ୍ୟ ରଖିଥିଲେ।
ସଭାପତି ଭାଷଣରେ ଅତିରିକ୍ତ ଜିଲ୍ଲାପାଳ, ସାଧାରଣ, ପ୍ରତାପ ଚନ୍ଦ୍ର ବେଉରା ଯୋଗଦେଇ କହିଲେ ପ୍ରାଚୀନ ସଭ୍ୟତାର ମୁକ ସାକ୍ଷୀ ଯୋଗ ଅଟେ। ସେ ସମୟରେ ଯୋଗ ଓ ଧ୍ୟାନ ଦ୍ଵାରା ମୁନି ଋଷି ମାନେ ସମସ୍ତ ବିଷୟରେ ଅବଗତ ହୋଇ ପାରୁଥିଲେ। ମନୁଷ୍ୟ ସୁସ୍ଥ ରହିବା ପାଇଁ ଯୋଗ ସବୁଠାରୁ ବଡ଼ ଔଷଧ ବୋଲି ସେ ବକ୍ତବ୍ୟରେ ଉତ୍ଥାପନ କରି ସମସ୍ତେ ଓ ସବୁବର୍ଗର ଲୋକେ ଯୋଗ ଅଭ୍ୟାସ କରିବାକୁ ପରାମର୍ଶ ଦେଇଥିଲେ।
ଜିଲ୍ଲା ଭାଜପା ସଭାପତି ବିଶ୍ବରଂଜନ ବଡ଼ଜେନା, ନିର୍ବାହୀ ଅଧିକାରୀ ଖୋର୍ଦ୍ଧା ପୌରପରିଷଦ ,କାବେରୀ ମୁଦୁଲି, ଜିଲ୍ଲା କ୍ରୀଡ଼ା ଅଧିକାରୀ ଗୀତାଞ୍ଜଳି ପଣ୍ଡା , ସାମ୍ବାଦିକ ରାମ ନାରାୟଣ ଦାଶ ମଞ୍ଚାସୀନ ଥିଲେ।
ସେହିପରି ଉପଜିଲ୍ଲାପାଳ, ଖୋର୍ଦ୍ଧା, ସ୍ଵସ୍ତିକ ସଂକଳ୍ପ ସାହୁ, ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଦିଲ୍ଲୀପ ହିଆଳ, ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ଲକ୍ଷ୍ମଣ କୁମାର ବେହେରା, ଖୋର୍ଦ୍ଧା ପୌର ପରିଷଦ ଅଧ୍ୟକ୍ଷା, କନକ ଲକ୍ଷ୍ମୀ ମହାନ୍ତି, ବୁଦ୍ଧିଜୀବୀ ନିକୁଞ୍ଜ ପଟ୍ଟନାୟକ,ଯୋଗ ମହୋତ୍ସବ ସମିତି କର୍ମକର୍ତ୍ତା କେଦାର ନାଥ ସାହୁ ଯୋଗଦେଇଥିଲେ। ଯୋଗ ଗୁରୁ ବରୁଣ କୁମାର କବିରାଜ ଯୋଗାଭ୍ୟାସ କରାଇଥିବା ବେଳେ ଗୁରୁଜଙ୍ଗ ସରସ୍ଵତୀ ଶିଶୁ ମନ୍ଦିର ସହ ଆଚାର୍ଯ୍ୟ ସୌଦାମିନୀ ସାହୁ ସହଯୋଗ କରିଥିଲେ।
ଅନ୍ୟ ମାନଙ୍କ ମଧ୍ୟରେ ଯୋଗ ପ୍ରେମୀ, ଛାତ୍ର ଛାତ୍ରୀ, ଯୁବକ ଯୁବତୀ, ବୃଦ୍ଧ ବୃଦ୍ଧା, ଗଣ ମାଧ୍ୟମ ପ୍ରତିନିଧି ବୃନ୍ଦ ଯୋଗଦେଇଥିଲେ। ମୁଖ୍ୟ ଅତିଥି ସମସ୍ତଙ୍କୁ ଯୋଗ ଅଭ୍ୟାସ ଶପଥ ପାଠ କରାଇଥିଲେ। ଅତି ଆନନ୍ଦ ଉଲ୍ଲାସ ମଧ୍ୟରେ କ୍ରୀଡ଼ା ଓ ଯୁବ ସେବା ବିଭାଗ, ଓଡ଼ିଶା ସରକାର, ଯୋଗ ମହୋତ୍ସବ ସମିତି, ଓଡ଼ିଶା ସରକାର ଏବଂ ଜିଲ୍ଲା ପ୍ରଶାସନ, ଖୋର୍ଦ୍ଧା ଙ୍କ ମିଳିତ ଆନୁକୁଲ୍ୟରେ କାର୍ଯ୍ୟକ୍ରମ ସମାପନ ହୋଇଥିଲା।