ଜଗତସିଂହପୁର: ଜଗତସିଂହପୁର ଜିଲ୍ଲାର ବନ୍ଦର ଥାନା ଅନ୍ତର୍ଗତ ଫୁଲପାଟଣା ଗାଁରେ ନବନିର୍ମିତ ଗ୍ରାମଦେବୀ ମନ୍ଦିରରେ ବିଗ୍ରହ ପ୍ରତିଷ୍ଠାକୁ କେନ୍ଦ୍ର କରି ଦୁଇ ଗୋଷ୍ଠୀ ମଧ୍ୟରେ ତୀବ୍ର ବିବାଦ ଦେଖାଦେଇଛି। ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇପଡ଼ିବା ପରେ ପ୍ରଶାସନ ପକ୍ଷରୁ ମନ୍ଦିର ପରିସରରେ ଭାରତୀୟ ନାଗରିକ ସୁରକ୍ଷା ସଂହିତା (BNSS) ର ଧାରା ୧୬୩ ଜାରି କରାଯାଇଛି। ସେହିପରି ଆଇନଶୃଙ୍ଖଳା ବଜାୟ ରଖିବା ପାଇଁ ଗାଁରେ ଦୁଇ ପ୍ଲାଟୁନ ପୁଲିସ୍ ଫୋର୍ସ ମୁତୟନ କରାଯାଇଛି।
ଫୁଲପାଟଣା ଗାଁରେ ନବନିର୍ମିତ ଗ୍ରାମଦେବୀ ମନ୍ଦିରର ପ୍ରତିଷ୍ଠା ଉତ୍ସବ ଓ ଯଜ୍ଞ କାର୍ଯ୍ୟକ୍ରମ ଚାଲିଥିବା ବେଳେ ନୂତନ ବିଗ୍ରହ ସ୍ଥାପନକୁ ନେଇ ବିବାଦ ଉପୁଜିଥିଲା। ଗାଁର ଏକ ଗୋଷ୍ଠୀ ପାରମ୍ପରିକ ଭାବେ ପୂଜା ପାଇ ଆସୁଥିବା ଗ୍ରାମଦେବୀ କୁତାମଚଣ୍ଡୀଙ୍କ ନୂତନ ବିଗ୍ରହ ସ୍ଥାପନ କରିବା ସପକ୍ଷରେ ରହିଥିଲେ। ଅନ୍ୟପକ୍ଷରେ, ଆଉ ଏକ ଗୋଷ୍ଠୀ ସେହି ମନ୍ଦିରରେ ମା’ କାଳୀଙ୍କ ବିଗ୍ରହ ପ୍ରତିଷ୍ଠା କରିବାକୁ ଜୋରଦାର ଉଦ୍ୟମ କରିଥିଲେ।
ଏହି ପ୍ରସଙ୍ଗକୁ ନେଇ ଦୁଇ ଗୋଷ୍ଠୀ ମଧ୍ୟରେ ମତଭେଦ ଦେଖାଦେବା ସହ ଉତ୍ତେଜନା ବଢ଼ିଥିଲା। ଉଭୟ ପକ୍ଷ ନିଜ ନିଜ ଦାବିରେ ଅଟଳ ରହିବାରୁ ପରିସ୍ଥିତି ଜଟିଳ ହୋଇପଡ଼ିଥିଲା।
ପରିସ୍ଥିତି ଅବନତି ଆଡ଼କୁ ଗତି କରୁଥିବା ଆଶଙ୍କାରେ ଜିଲ୍ଲା ପ୍ରଶାସନ ତୁରନ୍ତ ହସ୍ତକ୍ଷେପ କରିଥିଲା। ଜଗତସିଂହପୁର ଉପଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ମନ୍ଦିର ପରିସର ଓ ଆଖପାଖ ଅଞ୍ଚଳରେ ଧାରା ୧୬୩ ଲାଗୁ କରାଯାଇଛି। ଏହା ଅନୁସାରେ କୌଣସି ଗୋଷ୍ଠୀ କିମ୍ବା ଲୋକଙ୍କ ସମାବେଶ ଉପରେ କଟକଣା ଜାରି ହୋଇଛି।
ସେହିପରି କୌଣସି ଅପ୍ରୀତିକର ଘଟଣାକୁ ଏଡ଼ାଇବା ପାଇଁ ଗାଁରେ ଦୁଇ ପ୍ଲାଟୁନ ପୁଲିସ୍ ଫୋର୍ସ ମୁତୟନ କରାଯାଇଛି। ବରିଷ୍ଠ ପୁଲିସ୍ ଅଧିକାରୀମାନେ ମଧ୍ୟ ପରିସ୍ଥିତି ଉପରେ ନଜର ରଖିଛନ୍ତି।
ଧାର୍ମିକ ଆସ୍ଥା ଓ ପରମ୍ପରା ସହ ଜଡ଼ିତ ଏହି ପ୍ରସଙ୍ଗ ଗାଁରେ ଚାପା ଉତ୍ତେଜନା ସୃଷ୍ଟି କରିଛି। ମନ୍ଦିର ପ୍ରତିଷ୍ଠା ଉତ୍ସବ ମଧ୍ୟରେ ବିବାଦ ଉପୁଜିବା ଫଳରେ ସମଗ୍ର ଅଞ୍ଚଳରେ ଚର୍ଚ୍ଚା ଜୋର ଧରିଛି। ଗାଁର ବରିଷ୍ଠ ନାଗରିକ ଓ ସମାଜର ପ୍ରମୁଖ ବ୍ୟକ୍ତିମାନେ ଉଭୟ ପକ୍ଷକୁ ଶାନ୍ତି ଓ ସଦ୍ଭାବନା ବଜାୟ ରଖିବାକୁ ଅନୁରୋଧ କରିଛନ୍ତି।
ପ୍ରଶାସନ ପକ୍ଷରୁ ଉଭୟ ଗୋଷ୍ଠୀଙ୍କ ସହ ଆଲୋଚନା କରି ସମସ୍ୟାର ଶାନ୍ତିପୂର୍ଣ୍ଣ ସମାଧାନ ପାଇଁ ପ୍ରୟାସ ଚାଲିଛି। ପରସ୍ପର ମଧ୍ୟରେ ସହମତି ଭିତ୍ତିରେ ନିଷ୍ପତ୍ତି ନେବାକୁ ପ୍ରଶାସନ ପରାମର୍ଶ ଦେଇଛି।
ଏପର୍ଯ୍ୟନ୍ତ ଗାଁରେ ପରିସ୍ଥିତି ନିୟନ୍ତ୍ରଣରେ ଥିବାବେଳେ ପୁଲିସ୍ ସତର୍କ ଅବସ୍ଥାରେ ରହିଛି। ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି ଯେ, ଆଇନଶୃଙ୍ଖଳା ଭଙ୍ଗ କରିବାକୁ ଉଦ୍ୟମ କରୁଥିବା କୌଣସି ବ୍ୟକ୍ତି କିମ୍ବା ଗୋଷ୍ଠୀ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।