ନୂଆଦିଲ୍ଲୀ: ଭାରତୀୟ କ୍ରିକେଟ୍ ଦଳ ଖୁବ୍ ଶୀଘ୍ର ୟୁକେ ଗସ୍ତ କରିବାକୁ ଯାଉଛି। ସେହି ଗସ୍ତ ପୂର୍ବରୁ ଟିମ୍ ଇଣ୍ଡିଆକୁ ଝଟକା ଲାଗିଛି। କାରଣ ଅଲରାଉଣ୍ଡର ନୀତିଶ କୁମାର ରେଡ୍ଡି ଆଘାତ ଯୋଗୁଁ ଆୟର୍ଲାଣ୍ଡ ଏବଂ ଇଂଲଣ୍ଡ ବିପକ୍ଷ ସିରିଜରୁ ବାଦ ପଡ଼ିଛନ୍ତି। ତାଙ୍କ ସ୍ଥାନରେ ଅଲରାଉଣ୍ଡର ସୂର୍ଯ୍ୟାଂଶ ଶେଡଗେଙ୍କୁ ଟି-୨୦ ଦଳରେ ସାମିଲ କରାଯାଇଛି।
ବିସିସିଆଇ ଏକ ସରକାରୀ ବିବୃତ୍ତି ଜାରି କରି କହିଛି ଯେ, ଆଫଗାନିସ୍ତାନ ବିପକ୍ଷ ତୃତୀୟ ଏକଦିବସୀୟ ପରେ ନୀତିଶଙ୍କ କ୍ୱାଡ୍ରିସେପ୍ସ ମାଂସପେଶୀ ସମସ୍ୟା ହୋଇଥିଲା। ଡାକ୍ତରୀ ଦଳ ଦ୍ୱାରା ପରୀକ୍ଷା ପରେ ନୀତିଶଙ୍କୁ ଚିକିତ୍ସା ପରାମର୍ଶ ଦିଆଯାଇଥିଲା, ଯାହା ତାଙ୍କୁ ଆୟର୍ଲାଣ୍ଡ ଏବଂ ଇଂଲଣ୍ଡ ଟି-୨୦ ସିରିଜରୁ ଓହରି ଯିବାକୁ ବାଧ୍ୟ କରିଥିଲା।
ସୂର୍ଯ୍ୟାଂଶ ଶେଡଗେ ସମ୍ପ୍ରତି ତ୍ରିରାଷ୍ଟ୍ରୀୟ ସିରିଜରେ ଭାରତ ଏ ପାଇଁ ଖେଳିଥିଲେ। ସେ ପାଞ୍ଚଟି ମ୍ୟାଚ୍ ରେ ୧୪୭ ରନ୍ କରିଥିଲେ। ସେ ଶ୍ରୀଲଙ୍କା ଏ ବିପକ୍ଷରେ ମଧ୍ୟ ୭୨ ରନ୍ କରିଥିଲେ, ଯାହା ସମଗ୍ର ଟୁର୍ଣ୍ଣାମେଣ୍ଟର ତାଙ୍କର ଏକମାତ୍ର ଅର୍ଦ୍ଧଶତକ ଥିଲା। ସେ ତ୍ରିରାଷ୍ଟ୍ରୀୟ ସିରିଜରେ ଦୁଇଟି ୱିକେଟ୍ ମଧ୍ୟ ନେଇଥିଲେ। ସୂର୍ଯ୍ୟାଂଶ ଶେଡଗେ ଜଣେ ବ୍ୟାଟିଂ ଅଲରାଉଣ୍ଡର ଏବଂ ଡାହାଣ ହାତ ମଧ୍ୟମ ଗତି ବୋଲର।
ହାର୍ଦ୍ଦିକ ପାଣ୍ଡ୍ୟା ବର୍ତ୍ତମାନ ଆହତ ହେତୁ ଟିମ୍ ଇଣ୍ଡିଆରୁ ବାହାରେ ଅଛନ୍ତି। ତାଙ୍କ ଅନୁପସ୍ଥିତିରେ ନୀତିଶଙ୍କୁ ଭାରତର ପ୍ଲେଇଂ ଇଲେଭେନରେ ଲଗାତାର ସୁଯୋଗ ମିଳୁଛି। ତାଙ୍କ ଆଘାତ ଟିମ୍ ଇଣ୍ଡିଆ ପାଇଁ ଏକ ବଡ଼ ଝଟକା। ସୂର୍ଯ୍ୟାଂଶଙ୍କୁ ଆୟର୍ଲାଣ୍ଡ ଏବଂ ଇଂଲଣ୍ଡ ପିଚ୍ରେ ଆଶାଠାରୁ ଅଧିକ ବୋଲିଂ କରିବାକୁ ପଡ଼ିପାରେ।
ଭାରତର ଇଂଲଣ୍ଡ ଗସ୍ତ ସୂଚୀ
ଭାରତୀୟ ଦଳ ପ୍ରଥମେ ଆୟର୍ଲାଣ୍ଡ ଯାତ୍ରା କରିବ, ଯେଉଁଠାରେ ଜୁନ୍ ୨୬ ଏବଂ ୨୮ ତାରିଖରେ ଦୁଇ ଦଳ ମଧ୍ୟରେ ଦୁଇଟି ଟି୨୦ ମ୍ୟାଚ୍ ଖେଳାଯିବ। ତା’ପରେ ଟିମ୍ ଇଣ୍ଡିଆ ଇଂଲଣ୍ଡ ଯାତ୍ରା କରିବ, ଯେଉଁଠାରେ ସେମାନେ ପାଞ୍ଚଟି ଟି୨୦ ମ୍ୟାଚ୍ ଏବଂ ତିନୋଟି ଦିନିକିଆ ଖେଳିବେ। ଟିମ୍ ଇଣ୍ଡିଆର ଇଂଲଣ୍ଡ ଗସ୍ତ ଜୁଲାଇ ୧ ତାରିଖରୁ ଆରମ୍ଭ ହୋଇ ଜୁଲାଇ ୧୯ ତାରିଖ ପର୍ଯ୍ୟନ୍ତ ଚାଲିବ।