ପୂର୍ବତନ ଅର୍ଥମନ୍ତ୍ରୀ ପି ଚିଦାମ୍ବରମ୍ଙ୍କୁ ଗତକାଲି ରାତିରେ ଗିରଫ କରିଥିଲା ସିବିଆଇ । ଏହାର ପ୍ରତିବାଦରେ ଆଜି କଂଗ୍ରେସ ପକ୍ଷରୁ ଏକ ପ୍ରେସ୍ ମିଟ୍ କରାଯାଇଥିଲା । ଏହି ପ୍ରେସ୍ମିଟ୍ରେ ମୋଦି ସରକାର ଗଣତନ୍ତ୍ରର ହତ୍ୟା କରିଛନ୍ତି ବୋଲି କଂଗ୍ରେସ ମୁଖପାତ୍ର ରଣଦୀପ ସୁର୍ଜେଓ୍ବାଲା ପ୍ରକାଶ କରିଥିଲେ । ଘଟଣାର 9 ବର୍ଷ ପରେ ଅଭିଯୋଗ ଦାଖଲ କରାଯାଇଥିଲା ଏବଂ 11 ବର୍ଷ ପରେ ଜଣେ ବରିଷ୍ଠ ନେତାଙ୍କୁ ଗିରଫ କରାଯିବା ଅଯୌକ୍ତିକ ବୋଲି ସୁର୍ଜେଓ୍ବାଲା କହିଛନ୍ତି । ରାଜନୈତିକ ପ୍ରତିଶୋଧ ପରାୟଣତାକୁ ପୂରଣ କରିବା ପାଇଁ ବିଜେପି ଚିଦାମ୍ବରମ୍ଙ୍କୁ ଟାର୍ଗେଟ୍ କରିଛି । 40 ବର୍ଷ ଧରି ଜନସେବାରେ ରହିଥିବା ଜଣେ ରାଜନୈତିକ ନେତାଙ୍କୁ ବିନା କୌଣସି ପ୍ରମାଣ ଆଧାରରେ ଗିରଫ କରିଛନ୍ତି ସରକାର । ଲାଞ୍ଚ ପ୍ରଦାନ କରିଥିବା ଅଧିକାରୀ କିମ୍ବା କମ୍ପାନୀ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ ବରଂ ମନ୍ତ୍ରୀଙ୍କ ବିରୋଧରେ ସିଧାସଳଖ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଜେଲ୍ରେ ବନ୍ଦୀ ରହିଥିବା ଜଣେ ମହିଳା ଯିଏକି ନିଜ ଝିଅକୁ ହତ୍ୟା କରିଛନ୍ତି ତାଙ୍କ ବୟାନ ଆାଧାରରେ 40 ବର୍ଷ ଜନସେବା କରିଥିବା ଜଣେ ନେତାଙ୍କୁ ଗିରଫ କରାଯିବା ସମ୍ପୂର୍ଣ୍ଣ ଭୁଲ ନିଷ୍ପତ୍ତି ବୋଲି ସୁର୍ଜେଓ୍ବାଲା ପ୍ରକାଶ କରିଛନ୍ତି ।
