ରାଉରକେଲା: ସୁନ୍ଦରଗଡ଼ ଜିଲ୍ଲାର ରାଉରକେଲାରେ ସଡ଼କ ଦୁର୍ଘଟଣାରେ ରାଉରକେଲା ଇସ୍ପାତ କାରଖାନା (ଆରଏସପି)ର ଜଣେ କର୍ମଚାରୀଙ୍କ ମୃତ୍ୟୁ ଘଟିଛି। ଆଜି ସକାଳ ପ୍ରାୟ ସାଢେ ୫ଟା ସମୟରେ ଏ-ସିଫ୍ଟ ଡ୍ୟୁଟିକୁ ଯାଉଥିବା ବେଳେ ଏକ ଟ୍ରକ୍ ଧକ୍କା ଦେବାରୁ ଏହି ଅଘଟଣ ଘଟିଛି।
ମୃତକଙ୍କ ପରିଚୟ ଜଳଦା ସି ବ୍ଲକ୍ର ବାସିନ୍ଦା ଲିଓନାର୍ଡ ଲାକ୍ରା (୫୮) ଭାବେ ଜଣାପଡ଼ିଛି। ସେ ରାଉରକେଲା ଇସ୍ପାତ କାରଖାନାର ନ୍ୟୁ ହଟ୍ ଷ୍ଟ୍ରିପ୍ ମିଲ୍ ବିଭାଗରେ କାର୍ଯ୍ୟରତ ଥିଲେ।
ସୂଚନା ଅନୁଯାୟୀ, ଲିଓନାର୍ଡ ଲାକ୍ରା ପ୍ରତିଦିନ ପରି ଆଜି ମଧ୍ୟ ବାଇକରେ କାର୍ଯ୍ୟସ୍ଥଳକୁ ଯାଉଥିଲେ। ସେ ଏଲ୍ ଆଣ୍ଡ ଟି ଗେଟ୍ ସମ୍ମୁଖରେ ୧୪୩ ନମ୍ବର ଜାତୀୟ ରାଜପଥ ଦେଇ ଆରଏସପି ପରିସରକୁ ପ୍ରବେଶ କରୁଥିବା ବେଳେ ଏକ ଟ୍ରକ୍ ତାଙ୍କ ବାଇକକୁ ଧକ୍କା ଦେଇଥିଲା। ଦୁର୍ଘଟଣାରେ ସେ ଘଟଣାସ୍ଥଳରେ ଗୁରୁତର ଆହତ ହୋଇଥିଲେ ଏବଂ ପରବର୍ତ୍ତୀ ସମୟରେ ତାଙ୍କର ମୃତ୍ୟୁ ଘଟିଥିଲା।
ଘଟଣାର ସୂଚନା ପାଇ ଜଳଦା ଫାଣ୍ଡି ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ରାଉରକେଲା ସରକାରୀ ହସ୍ପିଟାଲକୁ ପଠାଇଛି।