ଭୁବନେଶ୍ୱର: ଅତ୍ୟାଧୁନିକ ପ୍ରଯୁକ୍ତିବିଦ୍ୟା ଓ ମେଡିକାଲ୍ ସ୍ବାସ୍ଥ୍ୟସେବାର ଅନନ୍ୟ ସମନ୍ବୟ ପୂର୍ବକ ଓଡ଼ିଶା ଏବଂ ପୂର୍ବ ଭାରତର ସାର୍ବଜନୀନ ସ୍ୱାସ୍ଥ୍ୟସେବା ଇକୋସିଷ୍ଟମକୁ ଏକ ପ୍ରମୁଖ ପ୍ରୋତ୍ସାହନ ସ୍ୱରୂପ, ଏମ୍ସ ଭୁବନେଶ୍ୱର ୧୦୦ଟି ଉନ୍ନତ ରୋବୋଟିକ୍-ସହାୟତା ଅସ୍ତ୍ରୋପଚାର ସଫଳତାର ସହିତ ସମାପ୍ତ କରି ଏକ ଐତିହାସିକ ମାଇଲଖୁଣ୍ଟ ହାସଲ କରିଛି।
ଏହି ବିଶେଷ ସଫଳତା ଏମ୍ସ ଭୁବନେଶ୍ୱରକୁ ଓଡ଼ିଶାର ପ୍ରଥମ ସରକାରୀ ସ୍ୱାସ୍ଥ୍ୟସେବା ପ୍ରତିଷ୍ଠାନ ଭାବରେ ମାନ୍ୟତା ପ୍ରଦାନ କରିଛି। ସମାଜର ସାଧାରଣ ନାଗରିକଙ୍କୁ ଏହି ସେବା ଉଚ୍ଚସ୍ତରୀୟ ଶଲ୍ୟଚିକିତ୍ସା ସେବା ପ୍ରଦାନ କରୁଛି।
ଏମ୍ସ ଭୁବନେଶ୍ୱରରେ ରୋବୋଟିକ୍ ସର୍ଜରୀ କାର୍ଯ୍ୟକ୍ରମ ଜେନେରାଲ ସର୍ଜରୀ, ସର୍ଜିକାଲ୍ ଗ୍ୟାଷ୍ଟ୍ରୋଏଣ୍ଟେରୋଲୋଜି, ୟୁରୋଲୋଜି, ପ୍ରସୂତି ଏବଂ ସ୍ତ୍ରୀ ରୋଗ, ଏବଂ ରୋବୋଟିକ୍ ବାରିଆଟ୍ରିକ୍ ସର୍ଜରୀ ଏବଂ ଜଟିଳ ଶିଶୁ ଶଲ୍ୟଚିକିତ୍ସା କ୍ଷେତ୍ରରେ ଅତ୍ୟନ୍ତ ଆହ୍ବାନପୂର୍ଣ୍ଣ ମାମଲାଗୁଡ଼ିକୁ ସଫଳତାର ସହିତ ସମ୍ପନ୍ନ କରୁଛି।
ହାତ ପାହାନ୍ତାରେ ଅତ୍ୟାଧୁନିକ ପ୍ରଯୁକ୍ତିବିଦ୍ୟା ସହାୟତାରେ ଚିକିତ୍ସାସେବା ଯୋଗାଇଦେବାର ପ୍ରମାଣ ହେଉଛି ଏମ୍ସ ଭୁବନେଶ୍ବରରେ ୧୦୦ଟି ରୋବୋଟିକ୍ ଅସ୍ତ୍ରୋପଚାର। ଏମ୍ସ ଭୁବନେଶ୍ୱରର ଜନସାଧାରଣଙ୍କୁ ଉତ୍ତମ ସ୍ବାସ୍ଥ୍ୟସେବା ପ୍ରଦାନ କରିବାର ପ୍ରତିବଦ୍ଧତାର ଏହା ଏକ ବିଶେଷ ପ୍ରମାଣ ବୋଲି ମତବ୍ୟକ୍ତ କରିଛନ୍ତି ଏମ୍ସ ଭୁବନେଶ୍ୱର କାର୍ଯ୍ୟନିର୍ବାହୀ ନିର୍ଦ୍ଦେଶକ ଏବଂ ସିଇଓ ଡ. ଆଶୁତୋଷ ବିଶ୍ୱାସ। ଏହି ଅବସରରେ ସମସ୍ତଙ୍କୁ ଅଭିନନ୍ଦନ ଜ୍ଞାପନ କରିଥିଲେ ଡ. ବିଶ୍ବାସ।
ଏମ୍ସ ଭୁବନେଶ୍ବରରେ ଏହି ସେବା ଆରମ୍ଭ ହେବା ପୂର୍ବରୁ, ଉନ୍ନତ ରୋବୋଟିକ୍ ପ୍ରକ୍ରିୟା ଆବଶ୍ୟକ କରୁଥିବା ରୋଗୀମାନଙ୍କ ପାଇଁ ଓଡ଼ିଶାରେ ସରକାରୀ କ୍ଷେତ୍ରରେ କୌଣସି ବିକଳ୍ପ ନଥିଲା। ଏହି ସେବା ପାଇବା ପାଇଁ ସେମାନେ ଗୁରୁତର ଆର୍ଥିକ ସଙ୍କଟ ସହିତ ଚେନ୍ନାଇ, ହାଇଦ୍ରାବାଦ କିମ୍ବା ନୂଆଦିଲ୍ଲୀ ଭଳି ସହର ଉପରେ ନିର୍ଭରଶୀଳ ଥିଲେ। ଘରୋଇ ଏବଂ କର୍ପୋରେଟ୍ ହସ୍ପିଟାଲଗୁଡ଼ିକରେ, ଏହି ପ୍ରକ୍ରିୟାଗୁଡ଼ିକ ସାଧାରଣତଃ ଲକ୍ଷ ଲକ୍ଷ ଟଙ୍କା ଆବଶ୍ୟକ କରିଥାଏ। ଏମ୍ସ ଭୁବନେଶ୍ୱରରେ, ରୋଗୀମାନେ ଏବେ ଏହି ଅତ୍ୟାଧୁନିକ ପ୍ରଯୁକ୍ତିବିଦ୍ୟାକୁ ସୁଲଭ ସରକାରୀ ଦରରେ ପାଇପାରୁଛନ୍ତି।
ଏନେଇ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ଡିନ୍ (ଏକାଡେମିକ୍) ଡ. ଦିଲ୍ଲୀପ କୁମାର ପରିଡ଼ା, ମେଡିକାଲ୍ ଅଧୀକ୍ଷକ ଡ. ପ୍ରଭାସ ରଞ୍ଜନ ତ୍ରିପାଠୀ, ଓଟି କମିଟି ଅଧ୍ୟକ୍ଷ ଏବଂ ଶିଶୁ ଶଲ୍ୟଚିକିତ୍ସା ମୁଖ୍ୟ ଡ. ମନୋଜ କୁମାର ମହାନ୍ତି, ରୋବୋଟିକ୍ ସର୍ଜରୀ କାର୍ଯ୍ୟକ୍ରମର ନୋଡାଲ୍ ଅଫିସର ଏବଂ ୟୁରୋଲୋଜି ବିଭାଗ ମୁଖ୍ୟ ଡ. ପ୍ରଶାନ୍ତ କୁମାର ନାୟକ, ଡିଡିଏ ଲେଫ୍ଟନାଣ୍ଟ କର୍ଣ୍ଣେଲ ଅଭିଜିତ ସରକାର, ବରିଷ୍ଠ ଅଧ୍ୟାପକ ଅଧ୍ୟାପିକା, ନର୍ସିଂ ଅଧିକାରୀ ଏବଂ କର୍ମଚାରୀ ଉପସ୍ଥିତ ଥିଲେ।