ଚେନ୍ନାଇ: ସୁପ୍ରିମକୋର୍ଟ ତାମିଲନାଡୁରେ ଗୋହତ୍ୟା ଉପରେ ସମ୍ପୂର୍ଣ୍ଣ ନିଷେଧ ଲାଗୁ କରିବା ପାଇଁ ମାଡ୍ରାସ ହାଇକୋର୍ଟର ଆଦେଶକୁ ସ୍ଥଗିତ ରଖିଛନ୍ତି। ରାଜ୍ୟ ସରକାର ଏହି ଆଦେଶ ବିରୁଦ୍ଧରେ ଆବେଦନ କରିଥିଲେ। ରାଜ୍ୟ ନିୟମାବଳୀକୁ ଉଦ୍ଧୃତ କରି ଏହା ଯୁକ୍ତି ଦର୍ଶାଇଛି ଯେ, ୧୦ ବର୍ଷରୁ ଅଧିକ ବୟସର ଗାଈ ହତ୍ୟା ଉପରେ କୌଣସି ଆଇନଗତ ପ୍ରତିବନ୍ଧକ ନାହିଁ।
ସୂଚନା ମୁତାବକ, ତାମିଲନାଡୁ ସରକାରଙ୍କ ଆବେଦନର ଶୁଣାଣି କରି ବିଚାରପତି ବିକ୍ରମ ନାଥ ଏବଂ ସନ୍ଦୀପ ମେହେଟ୍ଟାଙ୍କ ଖଣ୍ଡପୀଠ ରାଜ୍ୟ ସରକାରଙ୍କ ଆବେଦନ ଉପରେ ନୋଟିସ୍ ଜାରି କରି ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ହାଇକୋର୍ଟର ନିଷ୍ପତ୍ତି ଉପରେ ସ୍ଥଗିତାଦେଶ ଦେଇଥିଲେ।
ଉଲ୍ଲେଖଯୋଗ୍ୟ ଯେ, ମଇ ୨୭ ତାରିଖରେ ମାଡ୍ରାସ ହାଇକୋର୍ଟ ତାଙ୍କ ଆଦେଶରେ ସମ୍ବିଧାନର ଧାରା ୪୮ ଏବଂ ୧୯୭୬ ମସିହାରେ ଗୋହତ୍ୟା ନିଷେଧ କରିଥିବା ଆଦେଶକୁ ଉଲ୍ଲେଖ କରି ରାଜ୍ୟ ସରକାରଙ୍କୁ ବକରିଦ ସମେତ ଯେକୌଣସି ଦିନ ଗାଈ ଏବଂ ବାଛୁରୀ ହତ୍ୟା ନିଷେଧ କରିବାକୁ ନିର୍ଦ୍ଦେଶ ଦେଇଥିଲେ।
ସୁପ୍ରିମକୋର୍ଟଙ୍କ ସଦ୍ୟତମ ଆଦେଶ ପରେ ହାଇକୋର୍ଟଙ୍କ ଆଦେଶ ଆଉ କାର୍ଯ୍ୟକାରୀ ହେବ ନାହିଁ। ମାମଲାର ପରବର୍ତ୍ତୀ ଶୁଣାଣିରେ ସୁପ୍ରିମକୋର୍ଟ ନିର୍ଣ୍ଣୟ କରିବେ ଯେ, ମାଡ୍ରାସ ହାଇକୋର୍ଟର ନିର୍ଦ୍ଦେଶ ଆଇନ ଏବଂ ସମ୍ବିଧାନ ଅନୁଯାୟୀ ଥିଲା କି ନାହିଁ?