ନୂଆଦିଲ୍ଲୀ: ତୃଣମୂଳ କଂଗ୍ରେସ ମୁଖ୍ୟ ମମତା ବାନାର୍ଜୀଙ୍କୁ ଜୁଲାଇ ୨୧ ତାରିଖରେ ହେବାକୁ ଥିବା ଏକ ଦଳୀୟ କାର୍ଯ୍ୟକ୍ରମରେ କଂଗ୍ରେସ ନିମନ୍ତ୍ରଣ କରିଛି। ବଙ୍ଗଳା କଂଗ୍ରେସ ଏହା ମଧ୍ୟ କହିଛି ଯେ, ମମତା ବାନାର୍ଜୀ ପ୍ରାୟ ତିନି ଦଶନ୍ଧି ପୂର୍ବେ କଂଗ୍ରେସ ଛାଡିବାର ତାଙ୍କର ନିଷ୍ପତ୍ତି ଏକ ଭୁଲ ଥିଲା ବୋଲି ସ୍ୱୀକାର କରିବା ଉଚିତ। କଂଗ୍ରେସର ବଙ୍ଗଳା ୟୁନିଟ୍ ସଭାପତି ଶୁଭଙ୍କର ସରକାର ମମତାଙ୍କୁ ଏହି ବାର୍ତ୍ତା ଦେଇଛନ୍ତି।
ସୂଚନା ଅନୁଯାୟୀ, ସହିଦ ମୀନାରରେ “ଶହୀଦ ଦିବସ” କାର୍ଯ୍ୟକ୍ରମର ପ୍ରସ୍ତୁତି ସମୀକ୍ଷା କରିବା ପରେ ଶ୍ରୀଯୁକ୍ତ ସରକାର କହିଛନ୍ତି ଯେ, ମମତା ବାନାର୍ଜୀ ୨୧ ଜୁଲାଇ ୧୯୯୩ ଆନ୍ଦୋଳନର ଐତିହାସିକ ଗୁରୁତ୍ୱକୁ ମାନ୍ୟତା ଦେବା ଉଚିତ ଏବଂ ଏହାର ଐତିହ୍ୟକୁ ପୁନଃଲିଖନ କରିବାକୁ ଚେଷ୍ଟା କରିବା ଉଚିତ ନୁହେଁ।
ସେ କହିଛନ୍ତି ଯେ, “ଯଦି ମମତା ବାନାର୍ଜୀଙ୍କ ପ୍ରକୃତ ସାହସ ଅଛି, ତେବେ ସେ ଇତିହାସକୁ ବିକୃତ କରିବା ଉଚିତ ନୁହେଁ। ତୃଣମୂଳ ସୁପ୍ରିମୋ ସ୍ୱୀକାର କରିବା ଉଚିତ ଯେ, ସେ ଅତୀତରେ ଏକ ଭୁଲ ରାଜନୈତିକ ନିଷ୍ପତ୍ତି ନେଇଥିଲେ। ସହିଦ ମୀନାରରେ ଆମ କାର୍ଯ୍ୟକ୍ରମରେ ଆସି ସହିଦମାନଙ୍କୁ ଶ୍ରଦ୍ଧାଞ୍ଜଳି ଦେବାକୁ ତାଙ୍କୁ ସ୍ୱାଗତ।”
ଶୁଭଙ୍କର ସରକାର କହିଥିଲେ ଯେ, ୨୧ ଜୁଲାଇ ୧୯୯୩ର ଆନ୍ଦୋଳନ ଯୁବ କଂଗ୍ରେସର ବ୍ୟାନର ତଳେ ସଂଗଠିତ ହୋଇଥିଲା ଏବଂ କଂଗ୍ରେସ ସହିତ ଏହାର ସମ୍ପର୍କ ଇତିହାସରୁ ଲିଭାଇ ଦିଆଯାଇପାରିବ ନାହିଁ। ସେ କହିଥିଲେ ଯେ, “ଏହି ଆନ୍ଦୋଳନ ଇତିହାସର ଏକ ଅଂଶ ଏବଂ ଏହାକୁ ଅସ୍ୱୀକାର କରିବାର କୌଣସି ସ୍ଥାନ ନାହିଁ। ଯେଉଁ ନେତା ତାଙ୍କ ରାଜନୈତିକ ଅତୀତକୁ ସମ୍ମାନ କରନ୍ତି, ସେ ଲୋକଙ୍କଠାରୁ ଅଧିକ ସମ୍ମାନ ପାଆନ୍ତି।”
ଶ୍ରୀଯୁକ୍ତ ସରକାର କହିଛନ୍ତି ଯେ, ଯଦି ମମତା ବାନାର୍ଜୀ ଏହି ବର୍ଷ ଜୁଲାଇ ୨୧ କାର୍ଯ୍ୟକ୍ରମରେ ଯୋଗ ଦିଅନ୍ତି ଏବଂ ସ୍ୱୀକାର କରନ୍ତି ଯେ, କଂଗ୍ରେସ ଛାଡିବା ତାଙ୍କର ନିଷ୍ପତ୍ତି ଏକ ରାଜନୈତିକ ଭୁଲ ଥିଲା, ତେବେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ।
କଂଗ୍ରେସ କାହିଁକି ସହିଦ ଦିବସ ପାଳନ କରେ?
ଏହା ଉଲ୍ଲେଖନୀୟ ଯେ, ୨୧ ଜୁଲାଇ ୧୯୯୩ରେ ମମତା ବାନାର୍ଜୀଙ୍କ ନେତୃତ୍ୱରେ ଯୁବ କଂଗ୍ରେସ ରାଲିରେ ପୋଲିସ ଗୁଳିରେ ୧୩ ଜଣଙ୍କ ମୃତ୍ୟୁ ହୋଇଥିଲା। ଡିସେମ୍ବର ୧୯୯୭ରେ କଂଗ୍ରେସ ଛାଡି ତୃଣମୂଳ କଂଗ୍ରେସ ଗଠନ କରିଥିବା ମମତା ବାନାର୍ଜୀ ପ୍ରତିବର୍ଷ ବିଶାଳ ରାଲି ଆୟୋଜନ କରି ସହିଦ ଦିବସ ପାଳନ କରିଆସୁଛନ୍ତି।