ନୂଆଦିଲ୍ଲୀ: ବିଗତ ୧୨ ବର୍ଷ ମଧ୍ୟରେ ‘ନୀଳ ବିପ୍ଳବ’ ଏବଂ ‘ପ୍ରଧାନମନ୍ତ୍ରୀ ମତ୍ସ୍ୟ ସମ୍ପଦ ଯୋଜନା’ ଅଧୀନରେ ମତ୍ସ୍ୟପାଳନ ଓ ଜଳକୃଷି କ୍ଷେତ୍ରର ବିକାଶ ପାଇଁ ଭାରତ ସରକାର ଓଡ଼ିଶା ସରକାରଙ୍କ ବିଭିନ୍ନ ପ୍ରସ୍ତାବକୁ ମଞ୍ଜୁର କରିଛନ୍ତି। ବାଲେଶ୍ୱର ଜିଲ୍ଲା ସମେତ ରାଜ୍ୟର ବିଭିନ୍ନ ସ୍ଥାନରେ କାର୍ଯ୍ୟକାରୀ ହେବାକୁ ଥିବା ଏହି ପ୍ରକଳ୍ପଗୁଡ଼ିକର ମୋଟ ଅଟକଳ ବ୍ୟୟ ୧,୫୬୭.୯୬ କୋଟି ଟଙ୍କା, ଯେଉଁଥିରୁ କେନ୍ଦ୍ର ସରକାରଙ୍କ ଅଂଶ ୫୪୯.୫୮ କୋଟି ଟଙ୍କା। ରାଜ୍ୟ ସରକାରଙ୍କଠାରୁ ପ୍ରାପ୍ତ ପ୍ରସ୍ତାବ ଆଧାରରେ ମତ୍ସ୍ୟପାଳନ, ପଶୁପାଳନ ଏବଂ ଦୁଗ୍ଧ ଉତ୍ପାଦନ ମନ୍ତ୍ରଣାଳୟ ଏହି ଅନୁମୋଦନ ପ୍ରଦାନ କରିଛି।
ଏହା ବ୍ୟତୀତ, ମତ୍ସ୍ୟପାଳନ ଏବଂ ଭିତ୍ତିଭୂମି ବିକାଶ ପାଣ୍ଠି ଅଧୀନରେ ଓଡ଼ିଶା ପାଇଁ ୭୮୪.୩୨ କୋଟି ଟଙ୍କାର ମୋଟ ବ୍ୟୟ ଅଟକଳ ଏବଂ ୨୮୬.୩୯ କୋଟି ଟଙ୍କାର ସୀମିତ ସୁଧ ରିହାତି ବିଶିଷ୍ଟ ୧୩ଟି ପ୍ରକଳ୍ପ ଅନୁମୋଦିତ ହୋଇଛି। ଏଥିମଧ୍ୟରୁ ବାଲେଶ୍ୱର ଜିଲ୍ଲାରେ କାର୍ଯ୍ୟକାରୀ କରିବା ପାଇଁ ୮.୨୬ କୋଟି ଟଙ୍କାର ୨ଟି ପ୍ରକଳ୍ପ ମଞ୍ଜୁର କରାଯାଇଛି। ବାଲେଶ୍ୱର ଜିଲ୍ଲା ସମେତ ସମଗ୍ର ଓଡ଼ିଶାରେ ମତ୍ସ୍ୟପାଳନ ଏବଂ ଜଳକୃଷି କ୍ଷେତ୍ରର ବିକାଶ ପାଇଁ ରାଜ୍ୟ ସରକାରଙ୍କ ଦ୍ୱାରା ‘ମୁଖ୍ୟମନ୍ତ୍ରୀ ମତ୍ସ୍ୟଜୀବୀ କଲ୍ୟାଣ ଯୋଜନା’ କାର୍ଯ୍ୟକାରୀ କରାଯାଉଛି ବୋଲି ଓଡ଼ିଶା ସରକାର ସୂଚନା ଦେଇଛନ୍ତି।
୨୦୧୪-୧୫ ରୁ ୨୦୨୫-୨୬ ମଧ୍ୟରେ ନୀଳ ବିପ୍ଳବ ଏବଂ ପ୍ରଧାନମନ୍ତ୍ରୀ ମତ୍ସ୍ୟ ସମ୍ପଦ ଯୋଜନା ଅଧୀନରେ ବାଲେଶ୍ୱର ଜିଲ୍ଲାରେ ହାତକୁ ନିଆଯାଇଥିବା ମୁଖ୍ୟ କାର୍ଯ୍ୟକଳାପଗୁଡ଼ିକ ମଧ୍ୟରେ ୪୯.୯୪ କୋଟି ଟଙ୍କା ବ୍ୟୟରେ ଚାନ୍ଦିପୁର ମାଛଧରା ପୋତାଶ୍ରୟର ବିକାଶ; ୭୮.୨୦ କୋଟି ଟଙ୍କା ବ୍ୟୟରେ ବସ୍ତାଠାରେ ଏକ ଅତ୍ୟାଧୁନିକ ପାଇକାରୀ ମାଛ ବଜାର ପ୍ରତିଷ୍ଠା; ପାଞ୍ଚଟି ଜଳବାୟୁ ସହନଶୀଳ ଉପକୂଳବର୍ତ୍ତୀ ମତ୍ସ୍ୟଜୀବୀ ଗ୍ରାମର ବିକାଶ; ଛଅଟି ସୀତଳ ଭଣ୍ଡାର ବା ବରଫ କଳ ୟୁନିଟ୍ ସ୍ଥାପନ; ୨.୫୭ କୋଟି ଟଙ୍କା ବ୍ୟୟରେ ବାହାବଳପୁର ଉପକୂଳରେ ଭାରତୀୟ ପାମ୍ପାନୋର ସମୁଦ୍ର କେଜ୍ କଲଚର ପ୍ରଦର୍ଶନ କାର୍ଯ୍ୟକାରୀ କରିବା; ୧୦୭ ହେକ୍ଟର ଲବଣାକ୍ତ ଜଳସ୍ରୋତ ଅଞ୍ଚଳକୁ ଜଳକୃଷି ଅଧୀନକୁ ଆଣିବା; ଏବଂ ତିନୋଟି ଫିନଫିସ୍ ହ୍ୟାଚେରୀ ଓ ଗୋଟିଏ ସ୍କାମ୍ପି ହ୍ୟାଚେରୀ ସ୍ଥାପନ ଅନ୍ତର୍ଭୁକ୍ତ। ଏହା ବ୍ୟତୀତ ବାଲେଶ୍ୱରକୁ ସ୍କାମ୍ପିର ଉତ୍ପାଦନ ଏବଂ ପ୍ରସଂସ୍କରଣ କ୍ଲଷ୍ଟର ଭାବରେ ଘୋଷଣା କରାଯାଇଛି।
ଓଡ଼ିଶା ସରକାରଙ୍କ ରିପୋର୍ଟ ଅନୁଯାୟୀ, ୨୦୧୪-୧୫ ମସିହାରୁ ବିଭିନ୍ନ ମତ୍ସ୍ୟପାଳନ ବିକାଶ ଯୋଜନା ଅଧୀନରେ ବାଲେଶ୍ୱର ଜିଲ୍ଲା ପାଇଁ ମୋଟ ୨୫୦.୭୧ କୋଟି ଟଙ୍କା ଆବଣ୍ଟନ କରାଯାଇଛି, ଯେଉଁଥିରୁ ୨୧୪.୪୫ କୋଟି ଟଙ୍କା (୮୬%) ବିନିଯୋଗ ହୋଇସାରିଛି। ବାଲେଶ୍ୱର ଜିଲ୍ଲାରେ ମତ୍ସ୍ୟପାଳନ ଏବଂ ଜଳକୃଷିର ବିକାଶ ପାଇଁ କାର୍ଯ୍ୟକାରୀ ହୋଇଥିବା କାର୍ଯ୍ୟକଳାପ, ଆବଣ୍ଟିତ ପାଣ୍ଠି ଏବଂ ବିଭିନ୍ନ ଯୋଜନା ଅଧୀନରେ ବିନିଯୋଗର ବର୍ଷୱାରୀ ବିବରଣୀ ସନ୍ଦର୍ଭ ପାଇଁ ଅନୁବନ୍ଧ-୧ ରେ ପ୍ରଦାନ କରାଗଲା।