ସାଲେପୁର: ଭାରତ ସରକାରଙ୍କ ସୂଚନା ଓ ପ୍ରସାରଣ ମନ୍ତ୍ରଣାଳୟ ଅଧୀନସ୍ଥ କେନ୍ଦ୍ରୀୟ ସଞ୍ଚାର ବ୍ୟୁରୋ (ସିବିସି), ଆଞ୍ଚଳିକ କାର୍ଯ୍ୟାଳୟ, ଭୁବନେଶ୍ୱର ପକ୍ଷରୁ ମଙ୍ଗଳବାର କଟକ ଜିଲ୍ଲାର ସାଲେପୁର ସ୍ୱୟଂଶାସିତ ମହାବିଦ୍ୟାଳୟରେ ‘ନିଶାମୁକ୍ତ ଭାରତ ଅଭିଯାନ’ ଉପରେ ଏକ ସଚେତନତା କାର୍ଯ୍ୟକ୍ରମ ଆୟୋଜିତ ହୋଇଯାଇଛି। ଯୁବପିଢ଼ିଙ୍କୁ ନିଶାଦ୍ରବ୍ୟ ସେବନର କ୍ଷତିକାରକ ପ୍ରଭାବ ସମ୍ପର୍କରେ ସଚେତନ କରିବା ଏବଂ ନିଶାମୁକ୍ତ ସମାଜ ଗଠନ ପାଇଁ ସାମୂହିକ ଦାୟିତ୍ୱବୋଧ ସୃଷ୍ଟି କରିବା ଏହି କାର୍ଯ୍ୟକ୍ରମର ମୂଳ ଉଦ୍ଦେଶ୍ୟ ଥିଲା।
ଉପସ୍ଥିତ ଛାତ୍ରଛାତ୍ରୀଙ୍କୁ ସମ୍ବୋଧିତ କରି ସିବିସି ଏବଂ ପତ୍ର ସୂଚନା କାର୍ଯ୍ୟାଳୟ (ପିଆଇବି), ଭୁବନେଶ୍ୱରର ଅତିରିକ୍ତ ମହାନିର୍ଦ୍ଦେଶକ ଅଖିଳ କୁମାର ମିଶ୍ର କହିଥିଲେ, ନିଶାଦ୍ରବ୍ୟ ସେବନ କେବଳ ବ୍ୟକ୍ତିଗତ ସମସ୍ୟା ନୁହେଁ, ବରଂ ପରିବାର, ସମାଜ ଓ ଦେଶର ଭବିଷ୍ୟତକୁ ପ୍ରଭାବିତ କରୁଥିବା ଏକ ଗୁରୁତର ସାମାଜିକ ସମସ୍ୟା। ସେ ଯୁବପିଢ଼ିଙ୍କୁ ‘ନିଶାମୁକ୍ତ ଭାରତ ଅଭିଯାନ’ର ସକ୍ରିୟ ସହଯୋଗୀ ହୋଇ ନିଶାମୁକ୍ତ ଭାରତ ଗଠନରେ ନିଜର ଅବଦାନ ରଖିବାକୁ ଆହ୍ୱାନ ଦେଇଥିଲେ।
ଏହି ଅବସରରେ କଟକ ଜିଲ୍ଲା ଅବକାରୀ ଅଧୀକ୍ଷକ କରୁଣା ଶଙ୍କର ତିୱାରୀ ନିଶାଦ୍ରବ୍ୟ ସେବନର ସାମାଜିକ ଓ ସ୍ୱାସ୍ଥ୍ୟଗତ କୁପ୍ରଭାବ ସମ୍ପର୍କରେ ଆଲୋକପାତ କରିଥିଲେ। ନିଶାଦ୍ରବ୍ୟ ଏବଂ ମନକୁ ପ୍ରଭାବିତ କରୁଥିବା ପଦାର୍ଥର ବେଆଇନ କାରବାର ଓ ସେବନକୁ ରୋକିବା ପାଇଁ ଅବକାରୀ ବିଭାଗ ପକ୍ଷରୁ ଗ୍ରହଣ କରାଯାଉଥିବା ପଦକ୍ଷେପ ସମ୍ପର୍କରେ ସେ ସୂଚନା ଦେଇଥିଲେ ଏବଂ ଯୁବପିଢ଼ିଙ୍କୁ ନିଶାମୁକ୍ତ ଭାରତ ଗଠନରେ ସକ୍ରିୟ ଭାଗୀଦାର ହେବାକୁ ଆହ୍ୱାନ କରିଥିଲେ।
ସାଲେପୁର ସ୍ୱୟଂଶାସିତ ମହାବିଦ୍ୟାଳୟର ଅଧ୍ୟକ୍ଷା ଡ. ମନୋଜା ମଞ୍ଜରୀ ସ୍ୱାଇଁ ସିବିସି ଭୁବନେଶ୍ୱର ପକ୍ଷରୁ ଏପରି କାର୍ଯ୍ୟକ୍ରମ ଆୟୋଜନକୁ ପ୍ରଶଂସା କରିବା ସହ ସଚେତନତା ସୃଷ୍ଟି ଏବଂ ଦାୟିତ୍ୱବାନ ନାଗରିକ ଗଠନରେ ଶିକ୍ଷାନୁଷ୍ଠାନର ଭୂମିକା ଉପରେ ଗୁରୁତ୍ୱାରୋପ କରିଥିଲେ।
ବରିଷ୍ଠ ଆଇନଜୀବୀ ସଦାଶିବ ଦାସ ନିଶାଦ୍ରବ୍ୟ ସମ୍ପର୍କିତ ଅପରାଧର ଆଇନଗତ ପରିଣାମ ସମ୍ପର୍କରେ ବିସ୍ତୃତ ଆଲୋଚନା କରିବା ସହ ଆତ୍ମଶୃଙ୍ଖଳା ଓ ସଠିକ୍ ନିଷ୍ପତ୍ତି ଗ୍ରହଣର ଆବଶ୍ୟକତା ଉପରେ ଜୋର ଦେଇଥିଲେ। ବରିଷ୍ଠ ସାମ୍ବାଦିକ ଅକ୍ଷୟ କୁମାର ଦାସ ଯୁବପିଢ଼ିଙ୍କୁ ସୁସ୍ଥ ଓ ନିଶାମୁକ୍ତ ଜୀବନଶୈଳୀ ପ୍ରତି ଅନୁପ୍ରାଣିତ କରିବାରେ ପରିବାର, ଶିକ୍ଷାନୁଷ୍ଠାନ ଏବଂ ଗଣମାଧ୍ୟମର ଭୂମିକା ସମ୍ପର୍କରେ ମତବ୍ୟକ୍ତ କରିଥିଲେ।
କାର୍ଯ୍ୟକ୍ରମର ଅଂଶବିଶେଷ ଭାବେ ଉପସ୍ଥିତ ସମସ୍ତେ ‘ନିଶାମୁକ୍ତ ଭାରତ’ ଶପଥ ପାଠ କରି ନିଶାମୁକ୍ତ ଭାରତ ଗଠନରେ ନିଜର ସକ୍ରିୟ ଅବଦାନ ରଖିବାକୁ ସଂକଳ୍ପ ନେଇଥିଲେ। ଏହି ଅବସରରେ ଅଭିଯାନ ଅଧୀନରେ ଆୟୋଜିତ ପ୍ରବନ୍ଧ, ବିତର୍କ ଓ କୁଇଜ୍ ପ୍ରତିଯୋଗିତାର ବିଜେତାମାନଙ୍କୁ ମଧ୍ୟ ସମ୍ମାନିତ କରାଯାଇଥିଲା।
ସିବିସି ଭୁବନେଶ୍ୱର କାର୍ଯ୍ୟାଳୟ ମୁଖ୍ୟ ଏମ୍. ପି. ଜେନା ସ୍ୱାଗତ ଭାଷଣ ପ୍ରଦାନ କରିବା ସହ ଧନ୍ୟବାଦ ଅର୍ପଣ କରିଥିଲେ। କ୍ଷେତ୍ର ପ୍ରଚାର ଅଧିକାରୀ ସସ୍ମିତା ପାଇକରାୟ କାର୍ଯ୍ୟକ୍ରମ ପରିଚାଳନା କରିଥିଲେ।
ଏହି ସଚେତନତା କାର୍ଯ୍ୟକ୍ରମରେ ସିବିସି ଭୁବନେଶ୍ୱରର ତାଲିକାଭୁକ୍ତ ଏବଂ ବରିଷ୍ଠ କଳାକାରମାନଙ୍କ ଦ୍ୱାରା ବିଷୟଭିତ୍ତିକ ଯାଦୁ ପ୍ରଦର୍ଶନ ଓ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା। ସୃଜନଶୀଳ ଯୋଗାଯୋଗ ମାଧ୍ୟମରେ ‘ନିଶାମୁକ୍ତ ଭାରତ ଅଭିଯାନ’ର ବାର୍ତ୍ତାକୁ ଉପସ୍ଥିତ ଦର୍ଶକଙ୍କ ନିକଟରେ ପ୍ରସାର କରାଯାଇଥିଲା।