ଜି-୭ ସମ୍ମିଳନୀ ଅଂଶଗ୍ରହଣ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଫ୍ରାନ୍ସ ଗସ୍ତ କରିଛନ୍ତି । ଆଜି ଫ୍ରାନ୍ସଠାରେ ଭାରତୀୟ ସମୁଦାୟଙ୍କୁ ସମ୍ବୋଧନ କରିଛନ୍ତି । ୨୦୧୯ ଲୋକସଭା ନିର୍ବାଚନରେ ପ୍ରବଳ ବହୁମତ ପରେ ପ୍ରଧାନମନ୍ତ୍ରୀ ମୋଦି ପ୍ରଥମ ଥର ପାଇଁ ପ୍ରବାସୀ ଭାରତୀୟଙ୍କୁ ସମ୍ବୋଧନ କରିଛନ୍ତି । ଏହା ସହିତ ଆଗାମୀ ପାଞ୍ଚ ବର୍ଷର ଭିଜନ ମଧ୍ୟ ରଖିଛନ୍ତି । ମୋଦି ଭାରତ ଓ ଫ୍ରାନ୍ସର ବନ୍ଧୁତ୍ବ ଅତୁଟ ବୋଲି କହିଛନ୍ତି । ଏମିତି କୌଣସି ନିଷ୍ପତ୍ତି ନାହିଁ ଯେଉଁଥିରେ ଦୁଇ ଦେଶ ଉଭୟଙ୍କୁ ସମର୍ଥନ କରିନାହାନ୍ତି । ଏକ ଭଲ ବନ୍ଧୁର ଅର୍ଥ ହେଉଛି ସୁଖ ହେଉ କି ଦୁଃଖ ପ୍ରତ୍ୟେକ ପରିସ୍ଥିତିରେ ସାଥ୍ ଦେବା ବୋଲି କହିଛନ୍ତି ମୋଦି। ଭାରତରେ ଫ୍ରାନ୍ସର ଫୁଟବଲ୍ ଟିମ୍ର ପ୍ରଶଂସକ କମ୍ ନାହାନ୍ତି । ଫ୍ରାନ୍ସ ଫୁଟବଲ୍ ଟିମ୍ ବିଶ୍ବକପ୍ ଜିତିଲେ, ଭାରତ ଏହାର ଉତ୍ସବ ମନାଉଛି । ଫୁଟ୍ବଲପ୍ରେମୀ ଫ୍ରାନ୍ସବାସୀ ଗୋଲ୍ର ଗୁରୁତ୍ବ ବୁଝନ୍ତି । ଆମେ ଏମିତି ଗୋଲ୍ ରଖିଛୁ, ଯାହା ଆଗରୁ ଅସମ୍ଭବ କୁହାଯାଉଥିଲା। ଭାରତ ନବ ଭାରତରେ ନିର୍ମାଣରେ ଭାରତ ଅଗ୍ରସର ହେଉଛି । ଏହି ନୂଆ ଭାରତରେ ଭ୍ରଷ୍ଟାଚାର, ତିନି ତଲାକ୍, ପରିବାରବାଦକୁ ଦୃଢ ବିରୋଧ କରିଛି । ଦୁନିଆର ସବୁଠୁ ସ୍ବାସ୍ଥ୍ୟ ଯୋଜନା ‘ଆୟୁଷ୍ମାନ ଯୋଜନା’ ପ୍ରଣୟନ କରିଛି । ସେହିପରି ଜନଧନ ଯୋଜନା ଆଧାରରେ ଅଧିକ ବ୍ୟାଙ୍କ ଖାତା ଖୋଲାଯାଇଛି । ୨୦୩୦ଭିତରେ ଭାରତକୁ ସମ୍ପୂର୍ଣ୍ଣ ଟିବି ମୁକ୍ତ କରିବାକୁ ପ୍ରଚେଷ୍ଟା ଜାରି ରହିଛି ବୋଲି କହିଛନ୍ତି ମୋଦି । ମୋଦି ଭାରତୀୟ ସମୁଦାୟଙ୍କୁ ସମ୍ବୋଧନ କରି ତାଙ୍କ ସରକାରର ଉପଲବ୍ଧି ବିଷୟରେ କହିଛନ୍ତି । ଭାରତରେ ଏବେ ଅସ୍ଥାୟୀ ବୋଲି କିଛି ନାହିଁ । ତାକୁ ବାହାର କରି ଫିଙ୍ଗି ଦେଇଛୁ । ମାତ୍ର ୭୫ ଦିନର ସରକାରରେ ମହତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି । ପରିବାରବାଦ, ଭ୍ରଷ୍ଟାଚାରକୁ ଛାଡ଼ି ଏବେ ନୂଆ ଭାରତ ସ୍ୱପ୍ନରେ ଆଗେଇ ଚାଲିଛୁ । ପରିବାରବାଦ, ଭ୍ରଷ୍ଟାଚାର, ଭାଇ-ପୁତୁରାବାଦ, ଆତଙ୍କବାଦ ଉପରେ ଯେଉଁଭଳି ଲଗାମ ଦିଆଯାଇଛି ତାହା କେବେ ହୋଇ ନ ଥିଲା । ନୂଆ ଭାରତରେ ଅଟକିବା କିମ୍ବା ଥକିବା ଭଳି ପ୍ରସଙ୍ଗର ପ୍ରଶ୍ନ ଉଠୁନାହିଁ ।
