ନୂଆଦିଲ୍ଲୀ: କଲମ୍ବୋରେ ଖେଳାଯାଇଥିବା ଏକ ଅଭ୍ୟାସ ମ୍ୟାଚ୍ରେ ଭାରତୀୟ ଦଳ ଶ୍ରୀଲଙ୍କା ଏକାଦଶକୁ ୬ ୱିକେଟରେ ପରାସ୍ତ କରିଛି। ଟିମ୍ ଇଣ୍ଡିଆକୁ ବିଜୟ ପାଇଁ ୨୦୭ ରନ୍ର ଲକ୍ଷ୍ୟ ଦିଆଯାଇଥିଲା। ଶୁଭମନ ଗିଲ୍ ଏବଂ ଯଶସ୍ୱୀ ଜୟସୱାଲ ପ୍ରଥମ ୱିକେଟ୍ ପାଇଁ ଶତକୀୟ ଭାଗୀଦାରି କରି ଏକ ଚମତ୍କାର ଆରମ୍ଭ କରିଥିଲେ। ଗିଲ୍ ୪୪ ରନ୍ରେ ଆଉଟ୍ ହୋଇଥିଲେ, ସେ ୫୪ ବଲ୍ର ଇନିଂସ୍ରେ ୭ ଚୌକା ମାରିଥିଲେ। ପଡ଼ିଆରେ ତାଙ୍କର ଆଗମନ ଟିମ୍ ଇଣ୍ଡିଆ ପାଇଁ ଭଲ ଖବର ଥିଲା, କାରଣ ସେ ଆଙ୍ଗୁଠି ଆଘାତ ଯୋଗୁଁ ପ୍ରଥମ ଇନିଂସ୍ରେ ବ୍ୟାଟିଂ କରି ନଥିଲେ। ଅଭ୍ୟାସ ମ୍ୟାଚ୍ରେ ତାଙ୍କ ସ୍ଥାନରେ କେଏଲ୍ ରାହୁଲ ନେତୃତ୍ଵ ନେଇଥିଲେ।
ଆଜି ତୃତୀୟ ଦିନରେ ଭାରତ ୩୫୭ ରନ୍ରେ ପ୍ରଥମ ଇନିଂସ୍ ଘୋଷଣା କରିଥିଲା। ଶ୍ରୀଲଙ୍କା ଏକାଦଶ ପ୍ରଥମ ଇନିଂସ୍ ଆଧାରରେ ୬ ରନ୍ର ଅଗ୍ରଣୀ ଥିଲା। ଦ୍ୱିତୀୟ ଇନିଂସ୍ରେ ଓପନର୍ ନିଶାନ ଫର୍ଣ୍ଣାଣ୍ଡୋ ରିଟାୟାର୍ ହର୍ଟ ପୂର୍ବରୁ ଶ୍ରୀଲଙ୍କା ପାଇଁ ୬୩ ରନ୍ କରିଥିଲେ। ଦ୍ୱିତୀୟ ଇନିଂସ୍ରେ ଗୁରନୁର ବ୍ରାର ଏବଂ ରବିନ୍ଦ୍ର ଜାଡେଜା ଭାରତ ପାଇଁ ଦୁଇଟି ଲେଖାଏଁ ୱିକେଟ୍ ନେଇଥିଲେ। ଭାରତକୁ ଜିତିବା ପାଇଁ ୨୦୭ ରନର ଲକ୍ଷ୍ୟ ଦିଆଯାଇଥିଲା।
ତୃତୀୟ ତଥା ଅନ୍ତିମ ଦିନର ଶେଷ ଓଭର ବାକି ଥିଲା ଏବଂ ଭାରତକୁ ଜିତିବା ପାଇଁ ୧୬ ରନ୍ ଆବଶ୍ୟକ ଥିଲା। ମହମ୍ମଦ ସିରାଜ ପ୍ରଥମ ତିନୋଟି ବଲ୍ରେ ତିନୋଟି ଛକା ମାରି ମ୍ୟାଚ୍ ଜିତାଇଥିଲେ। ସିରାଜ ୧୫ ବଲ୍ରେ ୩୨ ରନ୍ କରିଥିଲେ ଏହି ଇନିଂସରେ ୪ଟି ଛକା ମାରିଥିଲେ। ତଥାପି, ଭାରତର ବିଜୟ ରେକର୍ଡ କରାଯିବ ନାହିଁ। ବାସ୍ତବରେ ଏହା ଏକ ଅଭ୍ୟାସ ମ୍ୟାଚ୍ ଥିଲା, ଯେଉଁଥିରେ ଖେଳାଳିଙ୍କ ପ୍ରଦର୍ଶନ ଏବଂ ଦଳର ବିଜୟ ଗଣନା କରାଯାଏ ନାହିଁ।
ବୋଲରଙ୍କ ପ୍ରଦର୍ଶନ କିପରି ଥିଲା?
ଦ୍ଵିତୀୟ ଇନିଂସରେ ଭାରତ ପାଇଁ ଆଉ ଏକ ଭଲ କଥା ହେଉଛି ଯେ, ଦ୍ରୁତ ବୋଲରମାନେ ମଧ୍ୟ ୱିକେଟ୍ ନେଇଥିଲେ। ମହମ୍ମଦ ସିରାଜ ଏବଂ ପ୍ରସିଦ୍ଧ କୃଷ୍ଣ ପ୍ରତ୍ୟେକେ ଗୋଟିଏ ଲେଖାଏଁ ୱିକେଟ୍ ନେଇଥିଲେ। ପ୍ରଥମ ଇନିଂସରେ ଉଭୟେ କୌଣସି ୱିକେଟ୍ ନେଇପାରି ନ ଥିଲେ। ପ୍ରଥମ ଇନିଂସରେ ଗୋଟିଏ ୱିକେଟ୍ ନେଇଥିବା ଗୁରନୁର ବ୍ରାର ଦ୍ୱିତୀୟ ଇନିଂସରେ ଦୁଇଟି ୱିକେଟ୍ ନେଇଥିଲେ।
ସ୍ପିନରମାନଙ୍କ ମଧ୍ୟରେ କେବଳ ରବିନ୍ଦ୍ର ଜାଡେଜା ଦ୍ୱିତୀୟ ଇନିଂସରେ ଦୁଇଟି ୱିକେଟ୍ ନେଇଥିଲେ। ଜାଡେଜା ମଧ୍ୟ ପ୍ରଥମ ଇନିଂସରେ ଦୁଇଟି ୱିକେଟ୍ ନେଇଥିଲେ। ପ୍ରଥମ ଇନିଂସରେ କୁଲଦୀପ ଯାଦବ ଏବଂ ମାନବ ସୁଥାର ଦୁଇଟି ଲେଖାଏଁ ୱିକେଟ୍ ନେଇଥିଲେ।