କେନ୍ଦୁଝର: ଦୁଇ ଦିନ ଧରି ଲାଗି ରହିଥିବା ପ୍ରବଳ ବର୍ଷା ଯୋଗୁଁ କେନ୍ଦୁଝର ଜିଲ୍ଲାରେ ବନ୍ୟା ଆଶଙ୍କା ବଢ଼ିଛି। ଲଗାଣ ବର୍ଷାର ପ୍ରଭାବରେ ଜିଲ୍ଲାର ବିଭିନ୍ନ ନଦୀର ଜଳସ୍ତର ଦ୍ରୁତଗତିରେ ବଢ଼ୁଥିବା ବେଳେ ପାଟଣା ଓ ଆନନ୍ଦପୁରରେ ବୈତରଣୀ ବିପଦ ସଙ୍କେତ ଉପରେ ପ୍ରବାହିତ ହେଉଛି।
ବୈତରଣୀର ଜଳସ୍ତର କ୍ରମାଗତ ଭାବେ ବଢ଼ୁଥିବାରୁ ନଦୀକୂଳିଆ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି। ଆନନ୍ଦପୁର ରିଙ୍ଗ୍ବନ୍ଧରେ ପୂର୍ବରୁ ସୃଷ୍ଟି ହୋଇଥିବା ଘାଇର ମରାମତି କାର୍ଯ୍ୟରେ ବିଳମ୍ବ ହେବାରୁ ପୁଣି ସେହି ସ୍ଥାନରେ ପାଣି ପଶିବା ଆରମ୍ଭ କରିଛି। ଏହା ସ୍ଥାନୀୟ ଲୋକଙ୍କ ଚିନ୍ତା ବଢ଼ାଇଛି।
ସେହିପରି ଯୋଡ଼ା, ଚମ୍ପୁଆ ଓ ଆନନ୍ଦପୁର ଅଞ୍ଚଳରେ ମଧ୍ୟ ଜଳସ୍ତର ବଢ଼ିଛି। ପରିସ୍ଥିତିକୁ ଦୃଷ୍ଟିରେ ରଖି ପ୍ରଶାସନ ସଜାଗ ରହିଥିବା ବେଳେ ବିପଦସଙ୍କୁଳ ଅଞ୍ଚଳରୁ ଲୋକଙ୍କୁ ସୁରକ୍ଷିତ ଭାବେ ସ୍ଥାନାନ୍ତର କରାଯାଇ ବନ୍ୟା ଆଶ୍ରୟସ୍ଥଳୀରେ ରଖାଯାଇଛି।
ଅନ୍ୟପଟେ, ଯୋଡ଼ା ପୌରାଞ୍ଚଳରେ ସୁନା ନଦୀର ପାଣି ପଶିବା ଫଳରେ ସହରର ବିଭିନ୍ନ ଅଞ୍ଚଳ ଜଳମଗ୍ନ ହୋଇଛି। ନଦୀକୂଳ ମାର୍କେଟ ଅଞ୍ଚଳ, ମହିଳା ମହାବିଦ୍ୟାଳୟ ନିକଟବର୍ତ୍ତୀ ଅଞ୍ଚଳ ଓ ବାଚୁ ହଟିଂ ଅଞ୍ଚଳର ରାସ୍ତା ଉପରେ ବନ୍ୟାଜଳ ପ୍ରବାହିତ ହେଉଛି।
ବଡ଼ବିଲ ସହରର ବିଭିନ୍ନ ୱାର୍ଡରେ ମଧ୍ୟ ଜଳ ଜମିଥିବା ବେଳେ ଭଦ୍ରାସାହି ରାସ୍ତାର ସେରେଣ୍ଡା ନିକଟରେ ରାଜ୍ୟ ରାଜପଥ ଉପରେ ବନ୍ୟାଜଳ ଲହଡ଼ି ମାରୁଛି। ଲଗାଣ ବର୍ଷା ଜାରି ରହିଲେ ସ୍ଥିତି ଆହୁରି ଗମ୍ଭୀର ହେବା ଆଶଙ୍କା ରହିଛି।