ଖୋରଧା/ଟାଙ୍ଗି: ଶିକ୍ଷା କ୍ଷେତ୍ରରେ ଉଲ୍ଲେଖନୀୟ ଅବଦାନ, ନିଷ୍ଠା ଓ ସମର୍ପିତ ସେବା ପାଇଁ ଖୋରଧା ଜିଲ୍ଲା ଟାଙ୍ଗି ବ୍ଲକର କୃତୀ ଶିକ୍ଷୟିତ୍ରୀ ଲକ୍ଷ୍ମୀପ୍ରିୟା ସାହୁଙ୍କୁ ଏକ ବଡ଼ ସମ୍ମାନ ମିଳିଛି।
ସ୍ଵାଧୀନତା ଦିବସ ଅବସରରେ ଭୁବନେଶ୍ବର ସ୍ଥିତ ଲୋକ ଭବନଠାରେ ରାଜ୍ୟପାଳଙ୍କ ସମ୍ମାନଜନକ ‘ଆଟ୍ ହୋମ୍’ କାର୍ଯ୍ୟକ୍ରମରେ ସେ ଯୋଗଦେଇ ସମଗ୍ର ଖୋରଧା ଜିଲ୍ଲା ତଥା ଟାଙ୍ଗି ଅଞ୍ଚଳ ପାଇଁ ଗୌରବ ଆଣି ଦେଇଛନ୍ତି। ଚଳିତ ବର୍ଷ ରାଜ୍ୟ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ସମଗ୍ର ଓଡ଼ିଶାରୁ ମାତ୍ର ୧୫ ଜଣ କୃତୀ ଶିକ୍ଷକ-ଶିକ୍ଷୟିତ୍ରୀଙ୍କୁ ସମ୍ମାନଜନକ କାର୍ଯ୍ୟକ୍ରମ ପାଇଁ ମନୋନୀତ କରାଯାଇଥିଲା।
ଅଗଷ୍ଟ ୧୫ ତାରିଖ ସଂନ୍ଧ୍ୟାରେ ଲୋକ ଭବନ ପରିସରରେ ଅନୁଷ୍ଠିତ ଏହି ଉତ୍ସବରେ ଲକ୍ଷ୍ମୀପ୍ରିୟା ସାହୁ ମହାମହିମ ରାଜ୍ୟପାଳଙ୍କ ଆତିଥ୍ୟ ଗ୍ରହଣ କରିଥିଲେ। ଏଥି ସହ ରାଜ୍ୟର ବିଭିନ୍ନ କ୍ଷେତ୍ରରୁ ଆସିଥିବା ବରିଷ୍ଠ ପ୍ରଶାସକ, ମାନ୍ୟଗଣ୍ୟ ବ୍ୟକ୍ତି ଓ ବିଶିଷ୍ଟ ବ୍ୟକ୍ତିତ୍ବଙ୍କ ସହ ଭାବ ବିନିମୟ କରିବାର ସୁଯୋଗ ପାଇଥିଲେ।
ପ୍ରକାଶ ଥାଉକି, ପୂର୍ବରୁ ମଧ୍ୟ ଶ୍ରେଷ୍ଠ ଶିକ୍ଷାଦାନ ପାଇଁ ସେ ‘ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର’ରେ ସମ୍ମାନିତ ହୋଇସାରିଛନ୍ତି। ବିଦ୍ୟାଳୟରେ ଗୁଣାତ୍ମକ ଶିକ୍ଷା ପ୍ରଦାନ, ଛାତ୍ରଛାତ୍ରୀଙ୍କ ସର୍ବାଙ୍ଗୀନ ବିକାଶ ଏବଂ ସୃଜନଶୀଳ ଶିକ୍ଷଣ ପଦ୍ଧତି ପ୍ରୟୋଗ କରିବାରେ ତାଙ୍କର ସ୍ଵତନ୍ତ୍ର ପରିଚୟ ରହିଛି। ତାଙ୍କର ଏହି ବିଶେଷ ଉପଲବ୍ଧି ଖବର ପ୍ରଚାରିତ ହେବା ପରେ ଟାଙ୍ଗି ବ୍ଳକ ତଥା ଖୋରଧା ଜିଲ୍ଲାର ବହୁ ଶିକ୍ଷାବିତ, ବୁଦ୍ଧିଜୀବୀ, ସହକର୍ମୀ ଓ ସ୍ଥାନୀୟ ବାସିନ୍ଦା ତାଙ୍କୁ ଭୂୟସୀ ପ୍ରଶଂସା କରିବା ସହ ଶୁଭେଚ୍ଛାର ସୁଅ ଛୁଟାଇଛନ୍ତି। ସେ ତାଙ୍କ ପୈତୃକ ମାଟି ବାଣପୁର ଅଞ୍ଚଳ ପାଇଁ ମଧ୍ୟ ଗର୍ବ ଓ ଗୌରବ ଆଣିପାରିଛନ୍ତି।