ଟୋକିଓ: ରବିବାର ସକାଳେ ୫.୯ ତୀବ୍ରତାର ଭୂମିକମ୍ପରେ ଥରି ଉଠିଛି ପୂର୍ବ ଜାପାନ। ଟୋକିଓ ସମେତ ଆଖପାଖ ଅଞ୍ଚଳରେ ଜୋରଦାର ଝଟକା ଅନୁଭୂତ ହୋଇଥିବା ବେଳେ ଅତିକମରେ ୨୩ ଜଣ ଆହତ ହୋଇଛନ୍ତି। ତେବେ ଅଧିକାଂଶ ଆହତଙ୍କ ଅବସ୍ଥା ସାମାନ୍ୟ ଥିବା ଅଧିକାରୀମାନେ କହିଛନ୍ତି। ଭୂମିକମ୍ପ ପରେ କୌଣସି ସୁନାମି ଆଶଙ୍କା ଜାରି କରାଯାଇନାହିଁ।
ଜାପାନ ପାଣିପାଗ ସଂସ୍ଥା ଅନୁଯାୟୀ, ଦକ୍ଷିଣ ଇବାରାକି ପ୍ରିଫେକ୍ଚରରେ ଭୂମିକମ୍ପର କେନ୍ଦ୍ରସ୍ଥଳ ଥିଲା ଏବଂ ଏହା ଭୂପୃଷ୍ଠରୁ ପ୍ରାୟ ୭୦ କିଲୋମିଟର ଗଭୀରରେ ଘଟିଥିଲା। ଆମେରିକାର ଭୂତତ୍ତ୍ୱ ସର୍ବେକ୍ଷଣ (USGS) ଏହାର ପ୍ରାରମ୍ଭିକ ତୀବ୍ରତା ୫.୮ ରେକର୍ଡ କରିଛି।
ଭୂମିକମ୍ପରେ ସାଇତାମା ଓ କାନାଗାୱାରେ ୯ ଜଣ ଲେଖାଏଁ, ଚିବାରେ ୪ ଜଣ ଏବଂ ଇବାରାକିରେ ଜଣେ ଆହତ ହୋଇଛନ୍ତି। ଅଧିକାଂଶ ଲୋକ ସେତେବେଳେ ଶୋଇଥିବାରୁ ହଠାତ୍ ଝଟକାରେ ବିଛଣାରୁ ପଡ଼ିଯିବା କିମ୍ବା ଫର୍ଣ୍ଣିଚର ଓ ଦ୍ୱାରରେ ଧକ୍କା ଖାଇ ଆହତ ହୋଇଥିବା ଜଣାପଡ଼ିଛି। ୟୋକୋହାମାରେ ଜଣେ ୮୦ ବର୍ଷୀୟା ମହିଳା ବିଛଣାରୁ ପଡ଼ି ଅଣ୍ଟାରେ ଗୁରୁତର ଆଘାତ ପାଇଥିବା ସୂଚନା ମିଳିଛି।
ଭୂମିକମ୍ପ ପରେ ଟୋକିଓରୁ ନାରିତା ବିମାନବନ୍ଦରକୁ ଯାଉଥିବା ଏକ୍ସପ୍ରେସ୍ ଟ୍ରେନ୍ ସେବା ପ୍ରଭାବିତ ହୋଇଥିଲା। ଉତ୍ତର-ପୂର୍ବ ଅଞ୍ଚଳର କିଛି ଲୋକାଲ୍ ଟ୍ରେନ୍ ମଧ୍ୟ ବିଳମ୍ବିତ ହୋଇଥିଲା। ତେବେ ପୂର୍ବ ଜାପାନ ରେଳବାଇ ଅନୁଯାୟୀ, ଶିଙ୍କାନସେନ୍ ବୁଲେଟ୍ ଟ୍ରେନ୍ ସେବା ସ୍ୱାଭାବିକ ଭାବେ ଚାଲିଥିଲା।
ଭୂମିକମ୍ପର ପ୍ରଭାବରେ ପୂର୍ବ ଟୋକିଓର କୋଟୋ ୱାର୍ଡରେ ଏକ ଭୂତଳ ଜଳ ପାଇପ୍ ଫାଟିଯାଇଥିଲା। ଫଳରେ ରାସ୍ତାରେ ପାଣି ପ୍ରବାହିତ ହୋଇଥିଲା। ପରେ କର୍ମଚାରୀମାନେ ପାଇପ୍ ମରାମତି କରି ଲିକ୍ ବନ୍ଦ କରିଥିଲେ।
ଭୂମିକମ୍ପ ଯୋଗୁଁ ଟୋକିଓର ପ୍ରାୟ ୪୬୦ ଘରରେ ବିଦ୍ୟୁତ୍ ସରବରାହ ବନ୍ଦ ହୋଇଥିଲା। ତେବେ ରବିବାର ସକାଳ ସୁଦ୍ଧା ବିଦ୍ୟୁତ୍ ସେବା ପୁନଃସ୍ଥାପିତ ହୋଇଥିବା ଟେପକୋ ପାୱାର ଗ୍ରୀଡ୍ ପକ୍ଷରୁ କୁହାଯାଇଛି।
ଭୂମିକମ୍ପ ପରେ ମୋବାଇଲ୍ ଫୋନ୍ରେ ଜରୁରୀକାଳୀନ ଭୂମିକମ୍ପ ସତର୍କତା ଜାରି ହୋଇଥିଲା। ଟୋକିଓ ସମେତ ମିଟୋ ଓ ସାଇତାମାରେ ମଧ୍ୟ ଶକ୍ତିଶାଳୀ ଝଟକା ଅନୁଭୂତ ହୋଇଥିଲା। ତେବେ ଅଧିକାଂଶ ଅଞ୍ଚଳରେ ସାଧାରଣ ଜନଜୀବନ ବିଶେଷ ପ୍ରଭାବିତ ହୋଇନଥିବା ଜଣାପଡ଼ିଛି।
ଭୂମିକମ୍ପ ପରେ ସମ୍ଭାବ୍ୟ କ୍ଷୟକ୍ଷତିର ଆକଳନ ଏବଂ ପରିସ୍ଥିତି ଉପରେ ନଜର ରଖିବା ପାଇଁ ଜାପାନ ସରକାର ଏକ ଟାସ୍କ ଫୋର୍ସ ଗଠନ କରିଛନ୍ତି। ପ୍ରଭାବିତ ଅଞ୍ଚଳରେ ଉଦ୍ଧାର ଓ ରିଲିଫ୍ ବ୍ୟବସ୍ଥା ସମ୍ପର୍କରେ ପ୍ରଶାସନ ନଜର ରଖିଛି।