ଭୁବନେଶ୍ବର: ରାଜ୍ୟର ବିସ୍ଥାପିତ ଓ ପ୍ରଭାବିତ ପରିବାରଙ୍କ ପୁନର୍ବାସ ଏବଂ ଥଇଥାନ ପାଇଁ ମିଳୁଥିବା ବିଭିନ୍ନ ଅନୁଦାନ ରାଶିରେ ବୃଦ୍ଧି କରିଛନ୍ତି ଓଡ଼ିଶା ସରକାର। ପୁନର୍ବାସ ଓ ଥଇଥାନ ନୀତି, ୨୦୦୬ର ଧାରା ୧୩ ଅନୁଯାୟୀ ସରକାର ପୁନର୍ବାସ ଅନୁଦାନର ବିଭିନ୍ନ ଆର୍ଥିକ ହାରରେ ୧୦ମ ଦ୍ୱିବାର୍ଷିକ ସଂଶୋଧନ କରିଛନ୍ତି। ନୂଆ ହାର ୨୦୨୬ ଏପ୍ରିଲ ୧ରୁ ଲାଗୁ ହୋଇଛି ଏବଂ ୨୦୨୮ ମାର୍ଚ୍ଚ ୩୧ ପର୍ଯ୍ୟନ୍ତ ବଳବତ୍ତର ରହିବ।
ସଂଶୋଧିତ ହାର ଅନୁଯାୟୀ, ପୁନର୍ବାସ କଲୋନି ବାହାରେ ସ୍ୱ-ପୁନର୍ବସତି ପାଇଁ ମିଳୁଥିବା ସହାୟତା ୧,୧୩,୧୨୮ ଟଙ୍କାରୁ ବଢ଼ି ୧,୧୬,୫୫୦ ଟଙ୍କା କରାଯାଇଛି। ସେହିପରି ଘର ନିର୍ମାଣ ସହାୟତା ୩,୩୯,୩୮୩ ଟଙ୍କାରୁ ବଢ଼ି ୩,୪୯,୬୫୦ ଟଙ୍କା ହୋଇଛି।
ଶିଳ୍ପ ପ୍ରକଳ୍ପ ଯୋଗୁଁ ବିସ୍ଥାପିତ ପରିବାରଙ୍କୁ ନିଯୁକ୍ତି ବଦଳରେ ଦିଆଯାଉଥିବା ଏକକାଳୀନ ଆର୍ଥିକ ସହାୟତାରେ ମଧ୍ୟ ସଂଶୋଧନ କରାଯାଇଛି। ନୂଆ ହାର ଅନୁସାରେ ବର୍ଗ-୧ ପାଇଁ ୧୧,୬୫,୫୦୦ ଟଙ୍କା, ବର୍ଗ-୨ ପାଇଁ ୬,୯୯,୩୦୦ ଟଙ୍କା, ବର୍ଗ-୩ ପାଇଁ ୪,୬୬,୨୦୦ ଟଙ୍କା ଏବଂ ବର୍ଗ-୪ ଓ ୫ ପାଇଁ ୨,୩୩,୧୦୦ ଟଙ୍କା ଧାର୍ଯ୍ୟ କରାଯାଇଛି।
ଖଣି ପ୍ରକଳ୍ପ ଯୋଗୁଁ ବିସ୍ଥାପିତ ପରିବାରଙ୍କୁ ନିଯୁକ୍ତି ବଦଳରେ ମିଳୁଥିବା ଏକକାଳୀନ ଆର୍ଥିକ ସହାୟତା ମଧ୍ୟ ସଂଶୋଧିତ ହୋଇଛି। ବର୍ଗ-୧ ପାଇଁ ୧୧,୬୫,୫୦୦ ଟଙ୍କା, ବର୍ଗ-୨ ପାଇଁ ୬,୯୯,୩୦୦ ଟଙ୍କା, ବର୍ଗ-୩ ପାଇଁ ୪,୬୬,୨୦୦ ଟଙ୍କା ଏବଂ ବର୍ଗ-୪, ୫ ଓ ୬ ପାଇଁ ୨,୩୩,୧୦୦ ଟଙ୍କା ଧାର୍ଯ୍ୟ ହୋଇଛି।
ବିସ୍ଥାପିତଙ୍କ କୃଷିଜମି ପାଇଁ ମିଳୁଥିବା ସହାୟତା ରାଶିରେ ମଧ୍ୟ ବୃଦ୍ଧି କରାଯାଇଛି। ଜଳସେଚିତ ଜମି ପାଇଁ ଏକର ପିଛା ଅନୁଦାନ ୨,୨୬,୨୫୫ ଟଙ୍କାରୁ ବଢ଼ି ୨,୩୩,୧୦୦ ଟଙ୍କା ହୋଇଛି। ଅଣଜଳସେଚିତ ଜମି ପାଇଁ ଏକର ପିଛା ଅନୁଦାନ ୧,୧୩,୧୨୮ ଟଙ୍କାରୁ ବଢ଼ି ୧,୧୬,୫୫୦ ଟଙ୍କା କରାଯାଇଛି।
ବିସ୍ଥାପିତ ପରିବାରଙ୍କୁ ଦିଆଯାଉଥିବା ରକ୍ଷଣାବେକ୍ଷଣ ଭତ୍ତା ମଧ୍ୟ ବଢ଼ିଛି। ମାସିକ ୪,୫୨୫ ଟଙ୍କାରୁ ୪,୬୬୨ ଟଙ୍କା କରାଯାଇଛି। ଅସ୍ଥାୟୀ ସେଡ୍ ପାଇଁ ସହାୟତା ୨୨,୬୨୬ ଟଙ୍କାରୁ ୨୩,୩୧୦ ଟଙ୍କା ଏବଂ ପରିବହନ ଭତ୍ତା ୪,୫୨୫ ଟଙ୍କାରୁ ୪,୬୬୨ ଟଙ୍କାକୁ ବୃଦ୍ଧି କରାଯାଇଛି।
ସରକାରଙ୍କ ଏହି ସଂଶୋଧିତ ଅନୁଦାନ ହାର ୨୦୨୬ ଏପ୍ରିଲ ୧ରୁ ୨୦୨୮ ମାର୍ଚ୍ଚ ୩୧ ପର୍ଯ୍ୟନ୍ତ ବଳବତ୍ତର ରହିବ। ଏହି ସଂଶୋଧନ ପାଇଁ ଅର୍ଥ ବିଭାଗର ସହମତି ମିଳିଛି।
ରାଜ୍ୟ ସରକାରଙ୍କ ନିର୍ଦ୍ଦେଶ ଅନୁଯାୟୀ ସଂଶୋଧିତ ଅନୁଦାନ ହାର ସମ୍ପର୍କରେ ସମସ୍ତ ସମ୍ପୃକ୍ତ ବିଭାଗ, ରାଜସ୍ୱ ଡିଭିଜନାଲ କମିସନର, ଜିଲ୍ଲାପାଳ, ରାଜସ୍ୱ କର୍ତ୍ତୃପକ୍ଷ ଓ ଅନ୍ୟ ସମ୍ପୃକ୍ତ ସଂସ୍ଥାକୁ ଅବଗତ କରାଯାଇଛି। ଏହାଦ୍ୱାରା ପ୍ରକଳ୍ପ ଯୋଗୁଁ ବିସ୍ଥାପିତ ଓ ପ୍ରଭାବିତ ପରିବାରଙ୍କ ପୁନର୍ବାସ ପ୍ରକ୍ରିୟାରେ ଆର୍ଥିକ ସହାୟତା ଅଧିକ ସୁବ୍ୟବସ୍ଥିତ ହେବା ସହ ସେମାନଙ୍କୁ ଅଧିକ ସହାୟତା ମିଳିବ।