ବୁଏନୋସ ଆଇରେସ: ଆର୍ଜେଣ୍ଟିନାର କିମ୍ବଦନ୍ତୀ ଫୁଟବଲ ଖେଳାଳି ଲିଓନେଲ ମେସି ଅନ୍ତର୍ଜାତୀୟ ଫୁଟବଲରୁ ସବୁଦିନ ପାଇଁ ଅବସର ଗ୍ରହଣ କରିଛନ୍ତି। ବିଶ୍ୱକପ ଫାଇନାଲରେ ସ୍ପେନ ଠାରୁ ମିଳିଥିବା ପରାଜୟ ଏବଂ ନିଜ ପିତାଙ୍କୁ ହରାଇବାର ଗଭୀର ଦୁଃଖ ପରେ ମେସି ନିଜର ଆଧିକାରିକ ଇନଷ୍ଟାଗ୍ରାମ ଆକାଉଣ୍ଟରେ ଏକ ଭାବବିହ୍ୱଳ ପୋଷ୍ଟ ଲେଖି ଅବସର ଘୋଷଣା କରିଛନ୍ତି। ନିଜ ପୋଷ୍ଟରେ ମେସି ଲେଖିଛନ୍ତି ଯେ, ସ୍ପେନ ବିପକ୍ଷ ଫାଇନାଲ ମ୍ୟାଚରେ ହାରିବାର ଦୁଇଦିନ ପରେ ହିଁ ସେ ଏହି କଷ୍ଟକର ନିଷ୍ପତ୍ତି ନେଇଥିଲେ। କିନ୍ତୁ ନିକଟରେ ତାଙ୍କ ପିତାଙ୍କ ନିଧନ ପରେ ତାଙ୍କର ଏହି ନିଷ୍ପତ୍ତି ଆହୁରି ପକ୍କା ହୋଇଯାଇଥିଲା। ଏହି ନିଷ୍ପତ୍ତି ନେବା ଅତ୍ୟନ୍ତ କଷ୍ଟକର ଥିଲା ଏବଂ ଆଜି ମଧ୍ୟ ସେ ଦୁଃଖରେ ଭାଙ୍ଗି ପଡ଼ୁଛନ୍ତି, କିନ୍ତୁ ଏହା ହିଁ ସଠିକ ସମୟ। ନିଜ ଦେଶର ଜର୍ସି ପାଇଁ ସେ ସର୍ବଦା ନିଜର ସବୁକିଛି ଉତ୍ସର୍ଗ କରିଦେଇଛନ୍ତି।
୩୯ ବର୍ଷୀୟ ମେସି ଆଗକୁ ଲେଖିଛନ୍ତି ଯେ ତାଙ୍କ ବୟସ ଏବଂ ସମୟ ଦୁହେଁ ଶେଷ ଅବସ୍ଥାରେ ପହଞ୍ଚିଛନ୍ତି। ତାଙ୍କ ପାଖରେ ଆର୍ଜେଣ୍ଟିନା ଦଳକୁ ଦେବା ପାଇଁ ଆଉ କିଛି ବାକି ନାହିଁ। ଏହା ବ୍ୟତୀତ ଦେଶରେ ଅନେକ ପ୍ରତିଭାବାନ ଯୁବ ଖେଳାଳି ଅଛନ୍ତି, ଯେଉଁମାନେ ଏହି ସୁଯୋଗର ପ୍ରକୃତ ହକଦାର। ୨୦ ବର୍ଷର ଏହି ଦୀର୍ଘ ଏବଂ ସୁନ୍ଦର ଯାତ୍ରାରେ ତାଙ୍କୁ ଯେଉଁ ଅଶେଷ ଭଲପାଇବା ମିଳିଛି, ସେଥିପାଇଁ ସେ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି। ଏବେ ସେ ପଡ଼ିଆରୁ ନୁହେଁ, ବରଂ ଗ୍ୟାଲେରୀରେ ବସି ସମସ୍ତଙ୍କ ଭଳି ଦଳକୁ ଉତ୍ସାହିତ କରିବେ। ଦୁଃଖ ସହିତ ହେଲେ ବି ଗର୍ବର ସହ ସେ ବିଦାୟ ନେଉଛନ୍ତି, କାରଣ ସେ ନିଜ ଦେଶକୁ ଏପରି ମୁହୂର୍ତ୍ତ ଦେଇଛନ୍ତି ଯାହା କେବେ ସ୍ୱପ୍ନରେ ସୁଦ୍ଧା ଭାବିହେଉନଥିଲା। ସେ ନିଜ ପରିବାର, ପ୍ରଶିକ୍ଷକ, ସାଥୀ ଖେଳାଳି ଏବଂ ଈଶ୍ୱରଙ୍କୁ କୃତଜ୍ଞତା ଜଣାଇଛନ୍ତି।
ମେସି ଆର୍ଜେଣ୍ଟିନା ପାଇଁ ସର୍ବାଧିକ ଗୋଲ କରିଥିବା ଏବଂ ସର୍ବାଧିକ ମ୍ୟାଚ ଖେଳିଥିବା ଖେଳାଳି। ୨୦୦୫ରେ ଆର୍ଜେଣ୍ଟିନା ପାଇଁ ଅନ୍ତର୍ଜାତୀୟ ପଦାର୍ପଣ କରିବା ପରେ ସେ ଜାତୀୟ ଦଳ ପକ୍ଷରୁ ୨୦୭ଟି ମ୍ୟାଚ ଖେଳି ୧୨୫ଟି ଗୋଲ କରିଥିବା ବେଳେ ତାଙ୍କ ନାମରେ ୬୮ଟି ଗୋଲ ସହାୟତା ମଧ୍ୟ ରହିଛି। ସେ ନିଜ ଦେଶ ପକ୍ଷରୁ ୬ଟି ବିଶ୍ୱକପରେ ପ୍ରତିନିଧିତ୍ୱ କରିଛନ୍ତି। ୨୦୨୨ରେ କାତାରରେ ଆର୍ଜେଣ୍ଟିନାକୁ ତୃତୀୟ ଥର ପାଇଁ ବିଶ୍ୱକପ ବିଜେତା କରାଇବା ସହ ୩୬ ବର୍ଷର ଟାଇଟଲ ମରୁଡ଼ିର ଅନ୍ତ ଘଟାଇଥିଲେ। ସେହିପରି ୨୦୨୧ରେ ମେସି କୋପା ଆମେରିକା ଜିତି ଆର୍ଜେଣ୍ଟିନାର ୨୮ ବର୍ଷର ଟ୍ରଫି ମରୁଡ଼ିର ମଧ୍ୟ ଅନ୍ତ କରିଥିଲେ। ବ୍ୟବସାୟିକ କ୍ଲବ ଫୁଟବଲରେ ଇଣ୍ଟର ମିଆମି ପକ୍ଷରୁ ଖେଳୁଥିବା ମେସି ଦକ୍ଷିଣ ଆମେରିକା ଫୁଟବଲ ଇତିହାସରେ ସର୍ବାଧିକ ଗୋଲ କରିଥିବା ପୁରୁଷ ଖେଳାଳି ଭାବେ ଇତିହାସ ରଚିଛନ୍ତି।