ଭୁବନେଶ୍ବର: ବାଲେଶ୍ୱର ଜିଲ୍ଲା ସିମୁଳିଆ ଥାନା ଅନ୍ତର୍ଗତ ଅଡା ଛକ ନିକଟରେ ପୋଲିସ ଏବଂ ଅପରାଧୀଙ୍କ ମଧ୍ୟରେ ଗୁଳି ବିନିମୟ ହୋଇଛି। ଏଥିରେ ରାଜ୍ୟର ଅନ୍ୟତମ ଦୁର୍ଦ୍ଦାନ୍ତ ଅପରାଧୀ ଲୋକେଶ ସିଂ ଆହତ ହୋଇଥିବା ବେଳେ ଘଟଣାସ୍ଥଳରୁ ତାର ଅନ୍ୟ ସହଯୋଗୀମାନେ ଫେରାର ହୋଇଯିବାରେ ସଫଳ ହୋଇଛନ୍ତି। ପୋଲିସ ଗୁଳିରେ ଆହତ ଲୋକେଶକୁ ତୁରନ୍ତ ଉଦ୍ଧାର କରାଯାଇ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ବାଲେଶ୍ୱର ଆରକ୍ଷୀ ଅଧୀକ୍ଷକ ପ୍ରତ୍ୟୁଷ ଦିବାକର ଏକ ସାମ୍ବାଦିକ ସମ୍ମିଳନୀରେ ଏହି ସମ୍ପର୍କରେ ବିସ୍ତୃତ ସୂଚନା ପ୍ରଦାନ କରିଛନ୍ତି।
ମିଳିଥିବା ସୂଚନା ଅନୁସାରେ, ଗୁରୁବାର ରାତି ପ୍ରାୟ ୧.୩୦ରୁ ୨ଟା ମଧ୍ୟରେ ସିମୁଳିଆ ପୋଲିସ ନିୟମିତ ରାତ୍ରିକାଳୀନ ପାଟ୍ରୋଲିଂ କରୁଥିଲା। ଏହି ସମୟରେ ଅଡା କେନାଲ ନିକଟରେ କିଛି ଦୁର୍ବୃତ୍ତ କୌଣସି ବଡ଼ ଧରଣର ଅପରାଧ ଘଟାଇବା ଉଦ୍ଦେଶ୍ୟରେ ଏକତ୍ରିତ ହୋଇଥିବା ପୋଲିସକୁ ଗୁପ୍ତ ସୂଚନା ମିଳିଥିଲା। ପ୍ରାପ୍ତ ଖବର ଭିତ୍ତିରେ ପୋଲିସ ଟିମ୍ ତୁରନ୍ତ ଉକ୍ତ ସ୍ଥାନରେ ପହଞ୍ଚିବା ପରେ ଦୁଇଟି ମୋଟରସାଇକେଲରେ ପାଞ୍ଚ ଜଣ ସନ୍ଦିଗ୍ଧ ଅପରାଧୀ ଉପସ୍ଥିତ ଥିବା ଦେଖିବାକୁ ପାଇଥିଲେ। ପୋଲିସ ଗାଡ଼ିକୁ ଦେଖି ଦୁର୍ବୃତ୍ତମାନେ ସେଠାରୁ ଦ୍ରୁତ ଗତିରେ ଖସି ପଳାଇବାକୁ ଉଦ୍ୟମ କରିଥିଲେ। ପୋଲିସ ସେମାନଙ୍କୁ ପଛରୁ ଗୋଡ଼ାଇବାରୁ ଏକ ମୋଟରସାଇକେଲ୍ ସେଠାରୁ ଖସିଯିବାରେ ସଫଳ ହୋଇଥିବା ବେଳେ ଅନ୍ୟ ମୋଟରସାଇକେଲଟି ଭାରସାମ୍ୟ ହରାଇ ସ୍ଲିପ୍ ହୋଇଯାଇଥିଲା। ନିଜକୁ ପୋଲିସ କବଳରୁ ରକ୍ଷା କରିବା ପାଇଁ ବାଇକ୍ ପଛରେ ବସିଥିବା ଅପରାଧୀ ଲୋକେଶ ସିଂ ପୋଲିସ ଉପରକୁ ଗୋଟିଏ ରାଉଣ୍ଡ ଗୁଳି ଚାଳନା କରିଥିଲା। ଆତ୍ମରକ୍ଷା ପାଇଁ ପୋଲିସ ଟିମ୍ ପାଲଟା ଗୋଟିଏ ରାଉଣ୍ଡ ଗୁଳି ଚଳାଇଥିଲା, ଯାହା ଲୋକେଶର ଗୋଡ଼ରେ ବାଜିଥିଲା। ଗୁଳି ବାଜିବା ପରେ ଲୋକେଶ ସେଠାରେ ପଡ଼ିଯାଇଥିଲା ଏବଂ ବାଇକ୍ ଚଲାଉଥିବା ଅନ୍ୟ ଜଣେ ଦୁର୍ବୃତ୍ତ ଅନ୍ଧାରର ସୁଯୋଗ ନେଇ ଘଟଣାସ୍ଥଳରୁ ଫେରାର ହୋଇଯାଇଥିଲା।
ଘଟଣାସ୍ଥଳରୁ ଆହତ ଲୋକେଶକୁ ସିମୁଳିଆ ପୋଲିସ କାବୁ କରିବା ସହ ତା ନିକଟରୁ ଗୋଟିଏ ମୋଟରସାଇକେଲ୍, ଗୋଟିଏ ବନ୍ଧୁକ ଏବଂ ଜୀବନ୍ତ ଗୁଳି ଜବତ କରିଛି। ଆହତ ଲୋକେଶକୁ ଅଧିକ ଚିକିତ୍ସା ପାଇଁ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି, ଯେଉଁଠାରେ ପୋଲିସ କୋଡ଼ା ନଜର ରଖାଯାଇଛି। ଘଟଣାସ୍ଥଳରେ ସିମୁଳିଆ ପୋଲିସ କମ୍ବିଂ ଅପରେସନ୍ ଜାରି ରଖିବା ସହ ଅଞ୍ଚଳକୁ ଜଗି ରହିଛି। ବାଲେଶ୍ୱର ଆରକ୍ଷୀ ଅଧୀକ୍ଷକ ସୂଚନା ଦେଇଛନ୍ତି ଯେ, କୁଖ୍ୟାତ ଅପରାଧୀ ଲୋକେଶ ସିଂ ନାଁରେ ବାଲେଶ୍ୱର, ଭଦ୍ରକ ଏବଂ ଆଖପାଖ ଜିଲ୍ଲାର ବିଭିନ୍ନ ଥାନାରେ ୧୦ରୁ ଊର୍ଦ୍ଧ୍ୱ ସଙ୍ଗୀନ ମାମଲା ରହିଛି। ସେ ଦାଦାବଟି ଆଦାୟ, ଡକାୟତି, ରାସ୍ତା ଲୁଟ୍, ଜମିଜମା ବିବାଦ ଏବଂ ବେଆଇନ ଅସ୍ତ୍ରଶସ୍ତ୍ର ଆଇନ ଭଳି ଅନେକ ଅପରାଧିକ କାର୍ଯ୍ୟକଳାପରେ ସକ୍ରିୟ ଭାବେ ସମ୍ପୃକ୍ତ ଥିଲା। ୨୦୨୧ ମସିହା ପର୍ଯ୍ୟନ୍ତ ତାର ଅପରାଧିକ ରେକର୍ଡ ଅତ୍ୟନ୍ତ ଗମ୍ଭୀର ରହିଥିବା ବେଳେ ସେ ନିକଟରେ ଜେଲ୍ରୁ ଜାମିନରେ ବାହାରି ପୁନର୍ବାର ଅପରାଧ ଦୁନିଆରେ ସକ୍ରିୟ ହୋଇପଡ଼ିଥିଲା। ଏହି ଏନକାଉଣ୍ଟର ପରେ ଫେରାର ହୋଇଯାଇଥିବା ଅନ୍ୟ ୪ ଜଣ ସହଯୋଗୀଙ୍କ ପରିଚୟ ସ୍ପଷ୍ଟ ହୋଇସାରିଛି ଏବଂ ସେମାନଙ୍କୁ ଗିରଫ କରିବା ପାଇଁ ପୋଲିସର ସ୍ୱତନ୍ତ୍ର ଟିମ୍ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି। ଆହତ ଲୋକେଶ ସିଂ ଚିକିତ୍ସିତ ହୋଇ ସୁସ୍ଥ ହେବା ପରେ ତାକୁ ଅଧିକ ପଚରାଉଚରା କରାଯିବ। ଏହି ପଚରାଉଚରା ଦ୍ୱାରା ଆଞ୍ଚଳିକ ଅପରାଧିକ ସିଣ୍ଡିକେଟ୍, ଲୁଟ୍ ଘଟଣା ଏବଂ ସେମାନଙ୍କ ନିକଟରେ ଥିବା ଅସ୍ତ୍ରଶସ୍ତ୍ର ସମ୍ପର୍କରେ ଆହୁରି ଅନେକ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିବ ବୋଲି ବାଲେଶ୍ୱର ଆରକ୍ଷୀ ଅଧୀକ୍ଷକ ଆଶା ପ୍ରକାଶ କରିଛନ୍ତି।