ପାଟନା: ରବିବାର ଭୋର ସମୟରେ ବିହାରର ଆରା ରେଳ ଷ୍ଟେସନ ନିକଟରେ ମହାନନ୍ଦା ଏକ୍ସପ୍ରେସ୍ ଲାଇନଚ୍ୟୁତ ହେବାରୁ ଏକ ବଡ଼ ଟ୍ରେନ୍ ଦୁର୍ଘଟଣା ଅଳ୍ପକେ ଟଳିଛି। ପୂର୍ବ କେନ୍ଦ୍ରୀୟ ରେଳବାଇର ଦାନାପୁର ଡିଭିଜନ ଅନ୍ତର୍ଗତ ଏହି ଘଟଣାରେ ଟ୍ରେନ୍ର ଇଞ୍ଜିନ୍ ସହ ଦୁଇଟି ଜେନେରାଲ୍ କୋଚ୍ ଲାଇନଚ୍ୟୁତ ହୋଇଥିଲା। ତେବେ ଟ୍ରେନ୍ର ବେଗ କମ୍ ଥିବାରୁ କୌଣସି ଯାତ୍ରୀ ଆହତ ହୋଇନଥିବା ସୂଚନା ମିଳିଛି।
ସୂଚନା ଅନୁଯାୟୀ, ଆଲିପୁରଦ୍ୱାରରୁ ନୂଆ ଜଲପାଇଗୁଡ଼ି, କଟିହାର ଦେଇ ନୂଆଦିଲ୍ଲୀ ଯାଉଥିବା ୧୫୪୮୩ ନମ୍ବର ମହାନନ୍ଦା ଏକ୍ସପ୍ରେସ୍ ଭୋର ପ୍ରାୟ ୪ଟା ୧୦ ମିନିଟ୍ରେ ଆରା ଷ୍ଟେସନ ଛାଡ଼ିଥିଲା। ଷ୍ଟେସନଠାରୁ ପ୍ରାୟ ୨୦୦ ମିଟର ଦୂରରେ ପଶ୍ଚିମ ରେଳବାଇ କ୍ରସିଂ ନିକଟରେ ହଠାତ୍ ଇଞ୍ଜିନ୍ ଓ ଏହା ସହ ସଂଲଗ୍ନ ଦୁଇଟି ଜେନେରାଲ୍ କୋଚ୍ ଟ୍ରାକ୍ରୁ ଖସିଯାଇଥିଲା।
ସିଗ୍ନାଲ ତ୍ରୁଟି ଯୋଗୁଁ ଦୁର୍ଘଟଣା?
ପ୍ରାଥମିକ ସୂଚନା ଅନୁସାରେ, ମହାନନ୍ଦା ଏକ୍ସପ୍ରେସ୍କୁ ଦିଲ୍ଲୀ-ହାୱଡ଼ା ମୁଖ୍ୟ ଲାଇନ୍ରେ ଯିବାକୁ ଥିବା ବେଳେ ସିଗ୍ନାଲ ସାସାରାମ-ଆରା ଇଣ୍ଟରସିଟି ଲାଇନ୍ ଦିଗକୁ ସେଟ୍ ହୋଇଥିବା ଜଣାପଡ଼ିଛି। ଫଳରେ ଟ୍ରେନ୍ଟି ଭୁଲ୍ ଦିଗକୁ ଯିବା ସମୟରେ ଭାରସାମ୍ୟ ହରାଇ ଲାଇନଚ୍ୟୁତ ହୋଇଥିବା କୁହାଯାଉଛି।
ତେବେ ଏହି ଘଟଣା ପଛରେ ଯାନ୍ତ୍ରିକ ତ୍ରୁଟି ନା ମାନବୀୟ ଭୁଲ୍, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଘଟଣାର ପ୍ରକୃତ କାରଣ ଜାଣିବା ପାଇଁ ରେଳବାଇର ବୈଷୟିକ ଦଳ ଓ ସୁରକ୍ଷା ଅଧିକାରୀମାନେ ତଦନ୍ତ ଆରମ୍ଭ କରିଛନ୍ତି।
ଘଟଣାସ୍ଥଳରେ ରେଳବାଇର ବରିଷ୍ଠ ଅଧିକାରୀ
ଟ୍ରେନ୍ ଲାଇନଚ୍ୟୁତ ହେବା ଖବର ପାଇବା ପରେ ଦାନାପୁର ଡିଭିଜନର ବରିଷ୍ଠ ରେଳ ଅଧିକାରୀ, ରେଳ ସୁରକ୍ଷା ବଳ ଓ ବୈଷୟିକ ବିଶେଷଜ୍ଞମାନେ ଘଟଣାସ୍ଥଳରେ ପହଞ୍ଚିଥିଲେ। ଲାଇନଚ୍ୟୁତ କୋଚ୍ଗୁଡ଼ିକୁ ହଟାଇବା ଏବଂ ଟ୍ରାକ୍ର ମରାମତି ପାଇଁ ଏକ ଦୁର୍ଘଟଣା ସହାୟତା ଟ୍ରେନ୍ ମଧ୍ୟ ପଠାଯାଇଥିଲା।
ଦୁର୍ଘଟଣା ପରେ ଦିଲ୍ଲୀ-ହାୱଡ଼ା ମୁଖ୍ୟ ରେଳ ସେକ୍ସନର ଅପ୍ ଓ ଡାଉନ୍ ଲାଇନ୍ରେ ଟ୍ରେନ୍ ଚଳାଚଳ ଆଂଶିକ ଭାବେ ପ୍ରଭାବିତ ହୋଇଛି। ଅନେକ ଟ୍ରେନ୍କୁ ନିକଟସ୍ଥ ଷ୍ଟେସନଗୁଡ଼ିକରେ ଅଟକାଇ ରଖାଯାଇଥିବା ବେଳେ କିଛି ଟ୍ରେନ୍ର ରୁଟ୍ ପରିବର୍ତ୍ତନ ଓ ସମୟ ପୁନଃନିର୍ଦ୍ଧାରଣ କରାଯାଇଛି।
ଯାତ୍ରୀ ସୁରକ୍ଷିତ
ଆଶ୍ୱସ୍ତିର ବିଷୟ, ମହାନନ୍ଦା ଏକ୍ସପ୍ରେସ୍ର ବେଗ କମ୍ ଥିବାରୁ ଦୁର୍ଘଟଣାରେ କୌଣସି ଯାତ୍ରୀ ଆହତ ହୋଇନାହାନ୍ତି। ଟ୍ରେନ୍ରେ ଥିବା ଯାତ୍ରୀମାନଙ୍କୁ ନୂଆଦିଲ୍ଲୀ ପହଞ୍ଚାଇବା ପାଇଁ ରେଳବାଇ ପକ୍ଷରୁ ବିକଳ୍ପ ବ୍ୟବସ୍ଥା କରାଯାଉଛି।
ଲାଇନଚ୍ୟୁତ କୋଚ୍ଗୁଡ଼ିକୁ ହଟାଇବା ଓ ଟ୍ରାକ୍ ମରାମତି କାମ ଶେଷ ହେବା ପରେ ଏହି ରୁଟ୍ରେ ରେଳ ଚଳାଚଳ ସ୍ୱାଭାବିକ ହେବ ବୋଲି ରେଳବାଇ ପକ୍ଷରୁ କୁହାଯାଇଛି।