ନୂଆଦିଲ୍ଲୀ: ଦିଲ୍ଲୀ ବିଧାନସଭାକୁ ବୋମାରେ ଉଡ଼ାଇ ଦେବାକୁ ପୁଣି ମିଳିଛି ଧମକ । ଆଜି ସକାଳ ପ୍ରାୟ ୮.୩୯ ସମୟରେ ବିଧାନସଭା ବାଚସ୍ପତି ବିଜେନ୍ଦ୍ର ଗୁପ୍ତାଙ୍କ ଅଫିସିଆଲ ଇମେଲ୍ ଆଇଡି/ୱେବସାଇଟକୁ ଏହି ଧମକପୂର୍ଣ୍ଣ ବାର୍ତ୍ତା ଆସିଥିଲା । ବିଧାନସଭା ପରିସରକୁ ବୋମା ବିସ୍ଫୋରଣ କରି ଉଡ଼ାଇ ଦିଆଯିବ ବୋଲି ଇମେଲ୍ରେ ଉଲ୍ଲେଖ ରହିଥିଲା । ଧମକପୂର୍ଣ୍ଣ ଇମେଲ୍ ମିଳିବା ପରେ ବିଧାନସଭା ପରିସରରେ ଚାଞ୍ଚଲ୍ୟ ଖେଳିଯାଇଥିଲା । ସୁରକ୍ଷା ଏଜେନ୍ସି ଏବଂ ଦିଲ୍ଲୀ ପୋଲିସର ଏକ ବୋମା ନିରୋଧକ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚି ସମଗ୍ର ପରିସରକୁ ଘେରାବନ୍ଦୀ କରି ତନ୍ନ ତନ୍ନ କରି ଯାଞ୍ଚ ଆରମ୍ଭ କରିଥିଲେ । ଦୀର୍ଘସମୟର ବ୍ୟାପକ ସର୍ଚ୍ଚ ଅପରେସନ ପରେ କୌଣସି ସନ୍ଦିଗ୍ଧ ବସ୍ତୁ ମିଳିନଥିବାରୁ ଏହାକୁ ଏକ ଗୁଜବ ବୋଲି ପୋଲିସ ସ୍ପଷ୍ଟ କରିଛି । ପ୍ରାଥମିକ ସୂଚନା ଅନୁଯାୟୀ, ଏହି ଧମକପୂର୍ଣ୍ଣ ଇମେଲ୍ ପଛରେ ଏକ ଖଲିସ୍ତାନୀ ସଂଗଠନର ହାତ ଥିବା ସନ୍ଦେହ କରାଯାଉଛି । ଇମେଲଟି କେଉଁ ସୋର୍ସରୁ ପଠାଯାଇଛି, ସେ ନେଇ ସାଇବର ସେଲ୍ ଓ ପୋଲିସ ପକ୍ଷରୁ ଅଧିକ ତଦନ୍ତ ଜାରି ରହିଛି ।
