ବ୍ରହ୍ମପୁର / ଭୁବନେଶ୍ୱର: ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟ କ୍ୟାବିନେଟ୍ ବୈଠକରେ ୧୨ଟି ପ୍ରମୁଖ ବିଭାଗର ୧୮ଟି ଯୁଗାନ୍ତକାରୀ ପ୍ରସ୍ତାବ ଅନୁମୋଦିତ ହୋଇଥିବାରୁ ବ୍ରହ୍ମପୁର ଲୋକସଭା ସାଂସଦ ଡ. ପ୍ରଦୀପ କୁମାର ପାଣିଗ୍ରାହୀ ମୁଖ୍ୟମନ୍ତ୍ରୀ ଓ ତାଙ୍କ ମନ୍ତ୍ରୀପରିଷଦକୁ ହାର୍ଦ୍ଦିକ କୃତଜ୍ଞତା ଓ ସାଧୁବାଦ ଜଣାଇଛନ୍ତି। ଏହି ନିଷ୍ପତ୍ତିଗୁଡ଼ିକ ରାଜ୍ୟରେ ଶକ୍ତି ସୁରକ୍ଷା, କୃଷି ବିକାଶ, ଗ୍ରାମୀଣ ପାନୀୟ ଜଳ ଯୋଗାଣ ଏବଂ ସ୍ୱଚ୍ଛ ଶାସନ କ୍ଷେତ୍ରରେ ଏକ ନୂତନ ଯୁଗର ସୂତ୍ରପାତ କରିବ ବୋଲି ସେ ପ୍ରକାଶ କରିଛନ୍ତି।
ସାଂସଦ ଡ. ପାଣିଗ୍ରାହୀ କ୍ୟାବିନେଟ୍ର ପ୍ରମୁଖ ନିଷ୍ପତ୍ତିଗୁଡ଼ିକ ଉପରେ ଆଲୋକପାତ କରି କହିଛନ୍ତି:
ବିଦ୍ୟୁତ୍ ଭିତ୍ତିଭୂମିରେ ଐତିହାସିକ ନିବେଶ: ରାଜ୍ୟର ବିଦ୍ୟୁତ୍ ସଞ୍ଚାଳନ ବ୍ୟବସ୍ଥାର ଆଧୁନିକୀକରଣ ପାଇଁ ୧୫,୯୪୮.୭୦ କୋଟି ଟଙ୍କାର ବୃହତ ପୁଞ୍ଜିନିବେଶକୁ ମଞ୍ଜୁରୀ ମିଳିଛି। ରାଜ୍ୟରେ ପ୍ରଥମ ଥର ପାଇଁ ଖୁଣ୍ଟୁଣୀ, ଦୁବୁରୀ ଓ କୋଲାବିରାରେ ୭୬୫ କେଭି ଗ୍ରିଡ୍ ସବ୍ଷ୍ଟେସନ୍ ସ୍ଥାପନ ହେବା ସହ କାଂସବାହାଲ ଓ ତିତ୍ଲାଗଡ଼ରେ ୪୦୦ କେଭି ଏବଂ ଅନ୍ୟାନ୍ୟ ୧୦ଟି ୨୨୦ କେଭି ସବ୍ଷ୍ଟେସନ୍ ନିର୍ମାଣ ହେବ। ଏହାଦ୍ୱାରା ଓପିଟିସିଏଲ୍ର ଟ୍ରାନ୍ସଫର୍ମେସନ୍ କ୍ଷମତା ୨୯,୮୮୯ ଏମ୍ଭିଏରୁ ୬୩,୩୬୪ ଏମ୍ଭିଏକୁ ବୃଦ୍ଧି ପାଇବ। ବିଶେଷ କରି ବ୍ରହ୍ମପୁର ସମେତ ରାଜ୍ୟର ୪ଟି ନିୟନ୍ତ୍ରଣ କେନ୍ଦ୍ରରୁ ରିମୋଟ୍ ପରିଚାଳନା ବ୍ୟବସ୍ଥା ଦକ୍ଷିଣ ଓଡ଼ିଶାର ବିଦ୍ୟୁତ୍ ଭିତ୍ତିଭୂମିକୁ ଅଧିକ ସୁଦୃଢ଼ କରିବ।
ଚାଷୀଙ୍କ ପାଇଁ ଗଭୀର ନଳକୂପ ପ୍ରକଳ୍ପ: ଆଗାମୀ ୫ ବର୍ଷ (୨୦୨୬-୨୭ ରୁ ୨୦୩୦-୩୧) ମଧ୍ୟରେ ୨୬ଟି ଜିଲ୍ଲାର ୨୫୬ଟି ବ୍ଲକ୍ରେ ୮,୬୫୩.୦୪ କୋଟି ଟଙ୍କା ବ୍ୟୟରେ ୧.୫ ଲକ୍ଷ ସୌର ଓ ଅଣ-ସୌର ଗଭୀର ନଳକୂପ ସ୍ଥାପନ କରାଯାଇ ୭.୫ ଲକ୍ଷ ହେକ୍ଟର ଜମିରେ ଜଳସେଚନ ସୁବିଧା ସୃଷ୍ଟି କରାଯିବ।
‘ବସୁଧା’ ଯୋଜନାରେ ପାନୀୟ ଜଳ ସୁରକ୍ଷା: ଗ୍ରାମାଞ୍ଚଳର ବାଦ୍ ପଡ଼ିଥିବା ଜନବସତିଗୁଡ଼ିକୁ ବିଶୁଦ୍ଧ ପାଇପ୍ ପାନୀୟ ଜଳ ଯୋଗାଇବା ପାଇଁ ରାଜ୍ୟ ପାଣ୍ଠିରୁ ୫,୦୪୫ କୋଟି ଟଙ୍କାର ସଂଶୋଧିତ ‘ବସୁଧା’ ଯୋଜନାକୁ ମଞ୍ଜୁରୀ ମିଳିଛି।
ଓଡ଼ିଶା ଜନ ବିଶ୍ୱାସ ବିଲ୍-୨୦୨୬: ୧୧ଟି ବିଭାଗ ଅଧୀନରେ ଥିବା ୧୬ଟି ଆଇନର ୬୨ଟି ବ୍ୟବସ୍ଥାରେ ସଂଶୋଧନ ଆଣି କ୍ଷୁଦ୍ର, ବୈଷୟିକ ତଥା ପ୍ରକ୍ରିୟାଗତ ତ୍ରୁଟିକୁ ଅପରାଧମୁକ୍ତ କରାଯିବା ଏବଂ ଜେଲ୍ଦଣ୍ଡ ବଦଳରେ କେବଳ ସମାନୁପାତିକ ଜୋରିମାନା ବ୍ୟବସ୍ଥା ଲାଗୁ କରିବା ଏକ ବ୍ୟବସାୟ-ଅନୁକୂଳ ତଥା ସ୍ୱଚ୍ଛ ପଦକ୍ଷେପ।
‘ବୋଇତ’ ଯୋଜନାରେ ଐତିହ୍ୟ ଜଳସେଚନର ସଂରକ୍ଷଣ: ରାଜ୍ୟର ପୁରାତନ ଜଳସେଚନ ସଂରଚନାଗୁଡ଼ିକର ସଂରକ୍ଷଣ, ପୁନରୁଦ୍ଧାର ତଥା ପର୍ଯ୍ୟଟନର ବିକାଶ ପାଇଁ ୫ ବର୍ଷରେ ୬୫୦ କୋଟି ଟଙ୍କା ବ୍ୟୟବରାଦ ଏକ ଅଭିନବ ପଦକ୍ଷେପ।
ଶ୍ରୀଜଗନ୍ନାଥ ଜମିର ଡିଜିଟାଲାଇଜେସନ ଓ ଜନକଲ୍ୟାଣ: ଶ୍ରୀଜଗନ୍ନାଥ ମନ୍ଦିର ଜମି ପରିଚାଳନା ନିୟମାବଳୀ-୨୦୨୬ ମାଧ୍ୟମରେ ସ୍ୱଚ୍ଛତା, ଜିଆଇଏସ୍ ମ୍ୟାପିଂ ଏବଂ ଡିଜିଟାଲ୍ ବ୍ୟବସ୍ଥା କାର୍ଯ୍ୟକାରୀ କରାଯିବା ସହ ପେନ୍ସନ୍ ପ୍ରଦାନରେ ବର୍ଷକରୁ ଅଧିକ ବିଳମ୍ବ ହେଲେ ୭% ସୁଧ ପ୍ରଦାନ ଏବଂ ରାୟଗଡ଼ା ଓ ଆଖପାଖ ଅଞ୍ଚଳର ରାସ୍ତା ପ୍ରଶସ୍ତୀକରଣ ରାଜ୍ୟ ସରକାରଙ୍କ ସମ୍ବେଦନଶୀଳ ଶାସନର ପ୍ରମାଣ।
ସାଂସଦ ଡ. ପାଣିଗ୍ରାହୀ ଦୃଢ଼ୋକ୍ତି ପ୍ରକାଶ କରିଛନ୍ତି ଯେ ଏହି ସମସ୍ତ ବିକାଶମୂଳକ ଯୋଜନା ଓଡ଼ିଶାକୁ ଅର୍ଥନୈତିକ ଏବଂ ଭିତ୍ତିଭୂମି ଦୃଷ୍ଟିରୁ ଏକ ଅଗ୍ରଣୀ ରାଜ୍ୟରେ ପରିଣତ କରିବାରେ ମାଇଲଖୁଣ୍ଟ ସାବ୍ୟସ୍ତ ହେବ।