କଟକ: ବାଲିଅନ୍ତା ସୌମ୍ୟରଞ୍ଜନ ଭିଡ଼ ହତ୍ୟା ମାମଲାରେ କ୍ରାଇମବ୍ରାଞ୍ଚରେ ହାଜର ହୋଇଛନ୍ତି ମୃତ ସୌମ୍ୟଙ୍କ ବାପା । ପ୍ରାଥମିକ ଚାର୍ଜସିଟ୍ ଦାଖଲ ସତ୍ତ୍ୱେ ତଦନ୍ତ ପ୍ରକ୍ରିୟାକୁ ନେଇ ପରିବାର ପକ୍ଷରୁ ପୁଣି ପ୍ରଶ୍ନ ଉଠାଯାଇଛି । ନିରପେକ୍ଷ ତଦନ୍ତ ପାଇଁ ତଦନ୍ତକାରୀ ଅଫିସର (ଆଇଓ)ଙ୍କୁ ବଦଳାଇବା ସହ ଆପରାଧିକ ଷଡ଼ଯନ୍ତ୍ର ଏବଂ ଭିଡ଼ ହିଂସା ଭଳି କଠୋର ଦଫା ଯୋଡ଼ିବାକୁ ସେ କ୍ରାଇମବ୍ରାଞ୍ଚ ଡିଆଇଜିଙ୍କୁ ନିବେଦନ କରିଛନ୍ତି । ଏଡିଜି ଦୟାଲ ଗଙ୍ଗୱାରଙ୍କୁ ଭେଟି ମାମଲା ସମ୍ପର୍କିତ କିଛି ନୂଆ ତଥ୍ୟ କ୍ରାଇମବ୍ରାଞ୍ଚରେ ଦାଖଲ କରାଯାଇଥିବା ସୌମ୍ୟଙ୍କ ବାପା ସୂଚନା ଦେଇଛନ୍ତି । ଏହାସହ ଘଟଣା ଦିନ ନୀରବଦ୍ରଷ୍ଟା ସାଜିଥିବା ପୋଲିସ କର୍ମଚାରୀଙ୍କ ବିରୋଧରେ କାହିଁକି କାର୍ଯ୍ୟାନୁଷ୍ଠାନ ନିଆଯାଇନାହିଁ, ସେନେଇ ମଧ୍ୟ ସେ ଅସନ୍ତୋଷ ପ୍ରକାଶ କରିଛନ୍ତି ।
