ଜାମନଗର: ପ୍ରାୟ ଏକ ବର୍ଷ ପରେ, ହାତୀ ‘ମାଧୁରୀ’ ପାଇଁ ତାଙ୍କର ପୂର୍ବ ବାସସ୍ଥାନ – କୋହ୍ଲାପୁରର ନନ୍ଦନୀ ମଠକୁ ଫେରିବାର ରାସ୍ତା ପରିଷ୍କାର ହୋଇଛି। ଉଚ୍ଚ-ସ୍ତରୀୟ କମିଟିର ଅନୁମୋଦନ ପରେ ମାଧୁରୀକୁ କୋହ୍ଲାପୁରକୁ ଫେରାଇ ନିଆଯାଉଛି। ‘ବନତାରା’ ପକ୍ଷରୁ ପ୍ରକାଶ କରାଯାଇଛି ଯେ, ସେ ଏହି ନିଷ୍ପତ୍ତିକୁ ସମ୍ମାନ କରିବ ଏବଂ ଆଗକୁ ମଧ୍ୟ ମାଧୁରୀଙ୍କ ଯତ୍ନରେ ସହଯୋଗ ଜାରି ରଖିବ।
ଉଚ୍ଚ-ସ୍ତରୀୟ କମିଟିର ନିର୍ଦ୍ଦେଶକ୍ରମେ ୨୦୨୫ ମସିହା ଜୁଲାଇ ୩୦ ତାରିଖରେ ମାଧୁରୀକୁ ବନତାରାକୁ ଅଣାଯାଇଥିଲା। ବନତାରା ଅନୁଯାୟୀ, ସଂସ୍ଥା ମାଧୁରୀର କଷ୍ଟଡି ଦାବି କରିନଥିଲା, ବରଂ ସରକାରୀ ନିର୍ଦ୍ଦେଶ ପରେ ଏହାର ଯତ୍ନ ନେବାର ଦାୟିତ୍ୱ ଗ୍ରହଣ କରିଥିଲା। ପରବର୍ତ୍ତୀ ସମୟରେ, ସୁପ୍ରିମକୋର୍ଟଙ୍କ ନିର୍ଦ୍ଦେଶ କ୍ରମେ ଏହି ମାମଲାର ପୁନଃ ଶୁଣାଣି ହୋଇଥିଲା ଏବଂ ନନ୍ଦନୀ ମଠର ସୁବିଧାଗୁଡ଼ିକର ଯାଞ୍ଚ କରାଯାଇଥିଲା।
ମାଧୁରୀକୁ ନନ୍ଦନୀକୁ ଫେରିବା ପାଇଁ ଅନୁମତି ଦେବା ସମୟରେ, କମିଟି ଏହାର ସୁରକ୍ଷା ଏବଂ ସ୍ୱାସ୍ଥ୍ୟ ସମ୍ବନ୍ଧୀୟ ଅନେକ ସର୍ତ୍ତ ଧାର୍ଯ୍ୟ କରିଛି। ମାଧୁରୀକୁ କୌଣସି କାମରେ ଲଗାଯିବ ନାହିଁ କିମ୍ବା ଶୋଭାଯାତ୍ରା ବା ଅନ୍ୟ କୌଣସି ଉଦ୍ଦେଶ୍ୟରେ ବ୍ୟବହାର କରାଯିବ ନାହିଁ। ବାଧ୍ୟତାମୂଳକ ସର୍ତ୍ତ ମଧ୍ୟରେ ୨୪ ଘଣ୍ଟିଆ ଯତ୍ନ ଏବଂ ପ୍ରତି ୧୫ ଦିନରେ ସ୍ୱାସ୍ଥ୍ୟ ପରୀକ୍ଷା ଅନ୍ତର୍ଭୁକ୍ତ ରହିଛି।
ବନତାରା ସୂଚନା ଅନୁଯାୟୀ ଚିକିତ୍ସା ଏବଂ ପଶୁ ଚିକିତ୍ସକଙ୍କ ତତ୍ତ୍ୱାବଧାନରେ ମାଧୁରୀଙ୍କ ସ୍ୱାସ୍ଥ୍ୟ ସ୍ଥିର ହୋଇଥିଲେ ମଧ୍ୟ, ଏହାର ପୂର୍ବରୁ ରହିଥିବା ସ୍ୱାସ୍ଥ୍ୟଗତ ସମସ୍ୟା ଦୃଷ୍ଟିରୁ ନିୟମିତ ଯତ୍ନ ଜରୁରୀ ଅଟେ। ଏଥିପାଇଁ ନନ୍ଦନୀକୁ ଫେରିବା ପରେ ମଧ୍ୟ ବନତାରାର ପଶୁଚିକିତ୍ସକ ପ୍ରତି ୧୫ ଦିନରେ ଏହାର ସ୍ୱାସ୍ଥ୍ୟ ପରୀକ୍ଷା କରିବେ ଏବଂ ଆବଶ୍ୟକ ସ୍ଥଳରେ ଏହାର ଚିକିତ୍ସାରେ ସହାୟତା କରିବେ।
ବନତାରା ପକ୍ଷରୁ ମଧ୍ୟ ନନ୍ଦନୀରେ ମାଧୁରୀର ରହିବା ବ୍ୟବସ୍ଥାକୁ ଉନ୍ନତ କରିବାରେ ସହଯୋଗ କରାଯାଇଛି। ଏଥିମଧ୍ୟରେ ରହିଛି ଜରୁରୀ ଚିକିତ୍ସା ସୁବିଧା, ଉପକରଣ, ଔଷଧି ଏବଂ ଅନ୍ୟାନ୍ୟ ସାମଗ୍ରୀ। ସଂସ୍ଥା ପକ୍ଷରୁ ପ୍ରକାଶ କରାଯାଇଛି ଯେ ଆଗକୁ ମଧ୍ୟ ଆବଶ୍ୟକ ପଡିଲେ ଏହା ନନ୍ଦନୀ ମଠ ଓ ସ୍ଥାନୀୟ ଅଧିକାରୀଙ୍କ ସହାୟତା ପାଇଁ ପ୍ରସ୍ତୁତ ରହିବ।
ବନତାରା ପକ୍ଷରୁ କୁହାଯାଇଛି ଯେ ମାଧୁରୀ ଫେରିବାର ଫଇସଲାରେ ଏହାର ସ୍ୱାସ୍ଥ୍ୟ ଓ ସୁରକ୍ଷା ସବୁଠାରୁ ମହତ୍ତ୍ୱପୂର୍ଣ୍ଣ ରହିଛି। ସଂସ୍ଥା ପକ୍ଷରୁ ସୁପ୍ରିମକୋର୍ଟ, ବମ୍ବେ ହାଇକୋର୍ଟ, ଉଚ୍ଚ-କ୍ଷମତା ସମ୍ପନ୍ନ କମିଟି ଏବଂ ମହାରାଷ୍ଟ୍ର ଓ ଗୁଜୁରାଟ ସରକାରଙ୍କୁ କୃତଜ୍ଞତା ଜଣାଇ ପ୍ରକାଶ କରାଯାଇଛି ଯେ ମାଧୁରୀ ଯେଉଁଠାରେ ମଧ୍ୟ ରହୁ ନା କାହିଁକି, ଏହାର ଉତ୍ତମ ସ୍ୱାସ୍ଥ୍ୟ, ସୁରକ୍ଷା ଏବଂ ଦୀର୍ଘଜୀବନ ସର୍ବୋଚ୍ଚ ପ୍ରାଥମିକତା ହୋଇରହିବ।