ମୟୂରଭଞ୍ଜ: ମୟୂରଭଞ୍ଜର ରେଳ ବିକାଶକୁ ନେଇ ଦୀର୍ଘଦିନର ଦାବି ଏବେ ଧୀରେଧୀରେ ନୂଆ ଦିଗକୁ ଗତି କରୁଛି। ନୂଆ ରେଳ ସଂଯୋଗ ଏବଂ ରେଳ ଭିତ୍ତିଭୂମିର ବିକାଶ ନେଇ ଅଞ୍ଚଳବାସୀଙ୍କ ଆଶା ମଧ୍ୟରେ ରେଳ ବିଭାଗର ତତ୍ପରତା ଏବେ ଆଶା ସଞ୍ଚାର କରିଛି। ବିଶେଷକରି ଗୋରୁମହିଷାଣୀ-ବାଙ୍ଗିରିପୋଷି ଏବଂ ବାଦାମପାହାଡ଼-କେନ୍ଦୁଝର ମଧ୍ୟରେ ନୂଆ ରେଳ ସଂଯୋଗ ନେଇ ନିରୀକ୍ଷଣ ଆରମ୍ଭ ହେବା ଘଟଣାକୁ ଗୁରୁତ୍ୱର ସହ ଦେଖାଯାଉଛି।
ଏହି ପରିପ୍ରେକ୍ଷୀରେ ଆଜି ଦିଲ୍ଲୀ ରେଳ ବୋର୍ଡର ମୁଖ୍ୟ ଯନ୍ତ୍ରୀ, ଚକ୍ରଧରପୁର ଦକ୍ଷିଣ-ପୂର୍ବ ରେଳ ବିଭାଗର ଏଆରଏମ୍ ସମୀର ସୌରଭଙ୍କ ସମେତ ରେଳ ବୋର୍ଡର ଚିଫ୍ ଇଞ୍ଜିନିୟର ଓ ଅନ୍ୟ ବରିଷ୍ଠ ଅଧିକାରୀମାନେ ସ୍ୱତନ୍ତ୍ର ଟ୍ରେନ୍ ଯୋଗେ ମୟୂରଭଞ୍ଜର ବିଭିନ୍ନ ଅଞ୍ଚଳ ପରିଦର୍ଶନ କରିଛନ୍ତି।
ଅଧିକାରୀମାନେ ଗୋରୁମହିଷାଣୀ, ରାଇରଙ୍ଗପୁର ଓ ବାଦାମପାହାଡ଼ ସମେତ ବିଭିନ୍ନ ରେଳ ଷ୍ଟେସନ୍ ନିରୀକ୍ଷଣ କରିଛନ୍ତି। ନିରୀକ୍ଷଣ ସମୟରେ ରେଳ ଲାଇନ୍ର ସଂଯୋଗ, ଷ୍ଟେସନ୍ର ଭିତ୍ତିଭୂମି, ପ୍ଲାଟଫର୍ମର ସ୍ଥିତି ଏବଂ ଆଗାମୀ ନିର୍ମାଣ କାର୍ଯ୍ୟ ନେଇ ଅନୁଧ୍ୟାନ କରାଯାଇଥିବା ଜଣାପଡ଼ିଛି।
ରେଳ ସଂଯୋଗ ପ୍ରସ୍ତାବର ସବୁଠାରୁ ବଡ଼ ବିଶେଷତ୍ୱ ହେଉଛି ବାଦାମପାହାଡ଼ରୁ କେନ୍ଦୁଝର ମଧ୍ୟରେ ନୂଆ ଷ୍ଟେସନ୍ ନିର୍ମାଣ ଯୋଜନା। ଏହି ରେଳପଥରେ ମୋଟ ୬ଟି ନୂଆ ଷ୍ଟେସନ୍ ନିର୍ମାଣ ପାଇଁ ଯୋଜନା ଥିବା ସୂଚନା ମିଳିଛି।
ଏହି ଷ୍ଟେସନ୍ଗୁଡ଼ିକ ହେଲା – କଳସବନ୍ଧ, ଟାଙ୍ଗାବିଲା, ସିଙ୍ଗଡା, ଘୋଷଡା, ଚେମେଣା ଓ ଖିରେଇଟାଙ୍ଗରି। ଏହା ସହିତ ବାଦାମପାହାଡ଼ ଷ୍ଟେସନ୍ରେ ଆଉ ଦୁଇଟି ପ୍ଲାଟଫର୍ମ ନିର୍ମାଣ ପାଇଁ ଜାଗା ଚିହ୍ନଟ ହୋଇଥିବା ମଧ୍ୟ ଜଣାପଡ଼ିଛି।
ସେହିଭଳି ଗୋରୁମହିଷାଣୀରୁ ବାଙ୍ଗିରିପୋଷି ମଧ୍ୟରେ ମଧ୍ୟ ୬ଟି ନୂଆ ଷ୍ଟେସନ୍ ନିର୍ମାଣ ଯୋଜନା ରହିଥିବା ସୂଚନା ମିଳିଛି। ସେଗୁଡ଼ିକ ହେଲା – ନିଉ ରାଇରଙ୍ଗପୁର, ପାଟପୁର, ବାଙ୍କୀ, ବିଶୋଇ, ଚାରାବନ୍ଧ ଓ ଚାନ୍ଦବିଲ।
ନୂଆ ଷ୍ଟେସନ୍ ଓ ରେଳପଥ ନିର୍ମାଣ ହେଲେ ମୟୂରଭଞ୍ଜର ଅନେକ ଦୁର୍ଗମ ଅଞ୍ଚଳ ସିଧାସଳଖ ରେଳ ନେଟୱର୍କ ସହ ଯୋଡ଼ିହେବ। ଫଳରେ ଦୈନନ୍ଦିନ ଯାତାୟାତଠାରୁ ଆରମ୍ଭ କରି ଶିକ୍ଷା, ସ୍ୱାସ୍ଥ୍ୟ ଓ ବ୍ୟବସାୟିକ ଯୋଗାଯୋଗ କ୍ଷେତ୍ରରେ ମଧ୍ୟ ଲୋକଙ୍କୁ ବଡ଼ ସୁବିଧା ମିଳିପାରିବ।
ମୟୂରଭଞ୍ଜ ଓ ଏହାର ଆଖପାଖ ଅଞ୍ଚଳରେ ରେଳ ନେଟୱର୍କ ବିସ୍ତାର ହେଲେ ଏହା କେବଳ ଯାତାୟାତକୁ ସୁଗମ କରିବ ନାହିଁ, ବରଂ ଅଞ୍ଚଳର ଅର୍ଥନୀତିକୁ ମଧ୍ୟ ନୂଆ ଗତି ଦେଇପାରେ। ଶିଳ୍ପ, ବ୍ୟବସାୟ, ପର୍ଯ୍ୟଟନ ଓ ଖଣିଜ ସମ୍ପଦ ପରିବହନ କ୍ଷେତ୍ରରେ ନୂଆ ସୁଯୋଗ ସୃଷ୍ଟି ହେବାର ଆଶା ରହିଛି।
ବିଶେଷକରି ଦୁର୍ଗମ ଅଞ୍ଚଳଗୁଡ଼ିକ ରେଳ ନେଟୱର୍କ ସହ ଯୋଡ଼ିହେଲେ ସ୍ଥାନୀୟ ଲୋକଙ୍କ ପାଇଁ ବଜାର ଓ ରୋଜଗାରର ନୂଆ ସମ୍ଭାବନା ମଧ୍ୟ ଖୋଲିପାରେ।
ଦୀର୍ଘଦିନ ଧରି ମୟୂରଭଞ୍ଜବାସୀ ନୂଆ ରେଳ ସଂଯୋଗ ଓ ରେଳ ଭିତ୍ତିଭୂମି ବିକାଶ ପାଇଁ ଦାବି କରିଆସୁଛନ୍ତି। ଏବେ ରେଳ ବୋର୍ଡର ବରିଷ୍ଠ ଅଧିକାରୀଙ୍କ ନିରୀକ୍ଷଣ ଏହି ଦାବିକୁ ନୂଆ ଆଶା ଦେଇଛି।
ଗୋରୁମହିଷାଣୀ-ବାଙ୍ଗିରିପୋଷି ଏବଂ ବାଦାମପାହାଡ଼-କେନ୍ଦୁଝର ରେଳ ସଂଯୋଗ କାର୍ଯ୍ୟ ଆଗାମୀ ଦିନରେ ତ୍ୱରାନ୍ୱିତ ହେବ ବୋଲି ଆଶା ପ୍ରକାଶ ପାଇଛି। ତେବେ ନିରୀକ୍ଷଣ ପରେ ପ୍ରକଳ୍ପ କେତେ ଶୀଘ୍ର ଆଗକୁ ବଢ଼ୁଛି ଏବଂ ମୟୂରଭଞ୍ଜର ଦୀର୍ଘଦିନର ରେଳ ସ୍ୱପ୍ନ କେବେ ବାସ୍ତବ ରୂପ ନେଉଛି, ତାହା ଉପରେ ଏବେ ସମସ୍ତଙ୍କ ନଜର।