ନୂଆଦିଲ୍ଲୀ: ନୂଆଦିଲ୍ଲୀସ୍ଥିତ ଭାରତ ମଣ୍ଡପମ୍ଠାରେ ଆୟୋଜିତ ବ୍ରିକ୍ସ ଶିଖର ସମ୍ମିଳନୀ ୨୦୨୬ର ଦ୍ୱିତୀୟ ଦିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସଦସ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ସହନଶୀଳତା, ସାମର୍ଥ୍ୟ ଓ ସହଯୋଗ ବୃଦ୍ଧି ଉପରେ ଦୃଢ଼ ଗୁରୁତ୍ୱାରୋପ କରିଛନ୍ତି। ଏହି ଅବସରରେ ସେ ସାବଧାନ କରାଇ ଦେଇଛନ୍ତି ଯେ, ଗୁରୁତ୍ୱପୂର୍ଣ୍ଣ ଖଣିଜ ସମ୍ପଦ ଏବଂ ପ୍ରଯୁକ୍ତିବିଦ୍ୟାର ଅସ୍ତ୍ରୀକରଣ ବିଶ୍ୱର ସାମୂହିକ ପ୍ରଗତି ଓ ବିକାଶ ପଥରେ ବଡ଼ ପ୍ରତିବନ୍ଧକ ସୃଷ୍ଟି କରିପାରେ। ‘ସହନଶୀଳତା, ଉଦ୍ଭାବନ, ସହଯୋଗ ଏବଂ ସ୍ଥାୟିତ୍ୱ’ ଶୀର୍ଷକ ଆଲୋଚନା ସତ୍ରରେ ସେ ସମସ୍ତ ଦେଶକୁ ସାମିଲ କରି ପ୍ରଯୁକ୍ତିର ସମାବେଶୀ ବ୍ୟବହାର କରିବାକୁ ଆହ୍ୱାନ ଦେଇଛନ୍ତି।
ସମ୍ମିଳନୀର ଦ୍ୱିତୀୟ ଦିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯୋଗଦେଇ କାର୍ଯ୍ୟକ୍ରମର ପରିଚାଳନା କରିଛନ୍ତି। ଏହି ଦ୍ୱିତୀୟ ଦିବସରେ “ସହନଶୀଳତା, ଉଦ୍ଭାବନ, ସହଯୋଗ ଏବଂ ସ୍ଥାୟିତ୍ୱ: ସମାବେଶୀ ବିଶ୍ୱ ଅଭିବୃଦ୍ଧି ପାଇଁ ଭବିଷ୍ୟତର ରୂପରେଖ” ଶୀର୍ଷକ ଏକ ଗୁରୁତ୍ୱପୂର୍ଣ୍ଣ ମୁକ୍ତ ଆଲୋଚନା ସତ୍ର ଅନୁଷ୍ଠିତ ହୋଇଯାଇଛି। ଏହାସହିତ ଗତକାଲି ସମ୍ମିଳନୀର ପ୍ରଥମ ଦିନରେ ବ୍ରିକ୍ସ ନେତାମାନେ ସର୍ବସମ୍ମତି କ୍ରମେ ‘ନୂଆଦିଲ୍ଲୀ ଘୋଷଣାପତ୍ର’ ଗ୍ରହଣ କରିଥିଲେ, ଯାହାକୁ ପ୍ରଧାନମନ୍ତ୍ରୀ ମୋଦୀ ବ୍ରିକ୍ସର ବ୍ୟାପକ ପରିସର ଓ ସୁଦୃଢ଼ ଉଦ୍ଦେଶ୍ୟର ପ୍ରତିଫଳନ ବୋଲି ବର୍ଣ୍ଣନା କରିଛନ୍ତି। ଏହି ମୁକ୍ତ ଆଲୋଚନା ସତ୍ରକୁ ସମ୍ବୋଧିତ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସଦସ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ସାମର୍ଥ୍ୟ ଓ ସହଯୋଗ ବୃଦ୍ଧି ଉପରେ ଦୃଢ଼ ଗୁରୁତ୍ୱାରୋପ କରିଛନ୍ତି। ଏହି ଅବସରରେ ସେ ଚେତାବନୀ ଦେଇ କହିଛନ୍ତି ଯେ, ଗୁରୁତ୍ୱପୂର୍ଣ୍ଣ ଖଣିଜ ସମ୍ପଦ ଏବଂ ପ୍ରଯୁକ୍ତିବିଦ୍ୟାର ଅସ୍ତ୍ରୀକରଣ ବିଶ୍ୱର ସାମୂହିକ ପ୍ରଗତି ଓ ବିକାଶ ପଥରେ ବଡ଼ ପ୍ରତିବନ୍ଧକ ସୃଷ୍ଟି କରିପାରେ। ତେଣୁ ପ୍ରଯୁକ୍ତିବିଦ୍ୟାର ବ୍ୟବହାର ସମସ୍ତଙ୍କ ପାଇଁ ସମାବେଶୀ ଓ ସୁଲଭ ହେବା ଆବଶ୍ୟକ। ସମ୍ମିଳନୀରେ ଭାରତର ଅଧ୍ୟକ୍ଷତା ସହନଶୀଳତା, ଉଦ୍ଭାବନ, ସହଯୋଗ ଏବଂ ସ୍ଥାୟିତ୍ୱ ଭଳି ୪ଟି ମୁଖ୍ୟ ସ୍ତମ୍ଭ ଉପରେ ଆଧାରିତ ହୋଇଥିବା ବେଳେ ସମସ୍ତଙ୍କ ସହଯୋଗରେ ଏହା ଏକ ବିଜୟୀ ସହଭାଗିତାରେ ପରିଣତ ହୋଇଛି।
ପ୍ରଧାନମନ୍ତ୍ରୀ ନିଜ ବକ୍ତବ୍ୟରେ ଦର୍ଶାଇଛନ୍ତି ଯେ, ସାଂପ୍ରତିକ ବିଶ୍ୱରେ ବିବାଦ ଓ ଉତ୍ତେଜନା ବୃଦ୍ଧି ପାଉଥିବାରୁ ତାହାର ନକାରାତ୍ମକ ପ୍ରଭାବ ସାଧାରଣ ଜନତାଙ୍କ ଜୀବନଯାପନ ଉପରେ ପଡ଼ୁଛି। ମହାମାରୀ, ଜଳବାୟୁ ବିପର୍ଯ୍ୟୟ ଏବଂ ଯୋଗାଣ ଶୃଙ୍ଖଳା ବାଧାପ୍ରାପ୍ତ ହେବା ଦ୍ୱାରା ପ୍ରମାଣିତ ହୋଇଛି ଯେ, କୌଣସି ସଙ୍କଟ କେବଳ ଗୋଟିଏ ଅଞ୍ଚଳ ମଧ୍ୟରେ ସୀମିତ ହୋଇ ରହୁନାହିଁ। ଏହି ସମସ୍ୟାର ସମାଧାନ ପାଇଁ ସଂକ୍ରାମକ ରୋଗର ନିୟନ୍ତ୍ରଣ ପାଇଁ ସମାକଳିତ ପ୍ରାରମ୍ଭିକ ଚେତାବନୀ ବ୍ୟବସ୍ଥା, ବିପର୍ଯ୍ୟୟ ପରିଚାଳନା ପାଇଁ ତଥ୍ୟ ଏକତ୍ରୀକରଣ ମାର୍ଗଦର୍ଶିକା ଏବଂ ପରିବହନ ଯୋଗାଣ ଶୃଙ୍ଖଳା ସହଯୋଗ ଢାଞ୍ଚା ନିର୍ମାଣ କରାଯାଇଛି।
ଉଦ୍ଭାବନ ଓ କୃଷି କ୍ଷେତ୍ରକୁ ସୁଦୃଢ଼ କରିବା ପାଇଁ ବ୍ରିକ୍ସ ନବସୃଜନ ଜାଲ, ନବସୃଜନ ପାଣ୍ଠି ଏବଂ ଡିଜିଟାଲ କୃଷି ଜାଲ ସ୍ଥାପନ ପ୍ରସ୍ତାବ ଦିଆଯାଇଛି, ଯାହା ମାଧ୍ୟମରେ କୃତ୍ରିମ ବୁଦ୍ଧିମତ୍ତା ଓ ଭୂସୂଚନା ପ୍ରଯୁକ୍ତିକୁ କୃଷକଙ୍କ ଆବଶ୍ୟକତା ସହ ଯୋଡ଼ାଯିବ। ଏହାସହ ବ୍ୟବସାୟୀ, କୃଷକ, ଗବେଷକ, ମହିଳା, ଯୁବପିଢ଼ି ଓ ସାଧାରଣ ନାଗରିକଙ୍କୁ ଯୋଡ଼ିବା ପାଇଁ ‘ବ୍ରିକ୍ସ କନେକ୍ଟ’, କ୍ଷୁଦ୍ର, କ୍ଷୁଦ୍ରତମ ଓ ମଧ୍ୟମ ଉଦ୍ୟୋଗ ସହଯୋଗ ପୋର୍ଟାଲ ଏବଂ ସହରୀ ପରିବହନ କେନ୍ଦ୍ର ସ୍ଥାପିତ ହୋଇଛି। ପରିବେଶ ଓ ମାନବ ବିକାଶର ସନ୍ତୁଳନ ପାଇଁ ‘ସ୍ମାର୍ଟ ଗ୍ରିଡ୍ ଓ ଶକ୍ତି ସଂରକ୍ଷଣ’ ଉତ୍କର୍ଷ କେନ୍ଦ୍ର, କୃଷି-ପାରିସ୍ଥିତିକୀ କେନ୍ଦ୍ର ଏବଂ ଗୋଷ୍ଠୀ-ଆଧାରିତ ଜଳବାୟୁ ଅନୁକୂଳନ ନୀତି ପ୍ରସ୍ତୁତ କରାଯାଇଛି।
ଏହି ସମ୍ମିଳନୀ ଅବସରରେ ପ୍ରଧାନମନ୍ତ୍ରୀ ମୋଦୀ ଆଫ୍ରିକୀୟ ଓ ଏସୀୟ ରାଷ୍ଟ୍ରଗୁଡ଼ିକ ସହ ଦ୍ୱିପାକ୍ଷିକ ସମ୍ପର୍କକୁ ଅଧିକ ମଜବୁତ କରିବା ଉଦ୍ଦେଶ୍ୟରେ ବିଭିନ୍ନ ଦେଶର ଶୀର୍ଷ ନେତାଙ୍କ ସହ ଗୁରୁତ୍ୱପୂର୍ଣ୍ଣ ବୈଠକ କରିଛନ୍ତି। ସେ ଦକ୍ଷିଣ ଆଫ୍ରିକା ରାଷ୍ଟ୍ରପତି ସିରିଲ ରାମାଫୋସା, ମିଶର ରାଷ୍ଟ୍ରପତି ଆବଦେଲ ଫତାହ ଏଲ-ସିସି, କାଜାଖସ୍ତାନ ରାଷ୍ଟ୍ରପତି କାସିମ-ଜୋମାର୍ଟ ଟୋକାୟେଭ, ଫିଲିପାଇନ୍ସ ରାଷ୍ଟ୍ରପତି ଫର୍ଡିନାଣ୍ଡ ଆର ମାର୍କୋସ ଜୁନିୟର, ବୁରୁଣ୍ଡି ରାଷ୍ଟ୍ରପତି ଏଭାରିଷ୍ଟେ ନ୍ଦାୟିସିମିୟେ, ଉଗାଣ୍ଡା ଉପରାଷ୍ଟ୍ରପତି ଜେସିକା ଆଲୁପୋ ଏବଂ ନାଇଜେରିଆ ଉପରାଷ୍ଟ୍ରପତି କାଶିମ ଶେଟ୍ଟିମାଙ୍କ ସହ ବୈଠକ କରି ଦ୍ୱିପାକ୍ଷିକ ସହଯୋଗ ବୃଦ୍ଧି ଉପରେ ଆଲୋଚନା କରିଛନ୍ତି।