ନୂଆଦିଲ୍ଲୀ: ଯୁବ ଆନ୍ଦୋଳନ ପୂର୍ବରୁ କେନ୍ଦ୍ର ସରକାର ଦେଶରେ ଭୟ ଏବଂ ଅରାଜକତାର ପରିବେଶ ସୃଷ୍ଟି କରୁଥିବା ଅଭିଯୋଗ ଆଣି ବିରୋଧୀ ଦଳଗୁଡ଼ିକ ପ୍ରଧାନ ବିଚାରପତିଙ୍କ ଦ୍ୱାରସ୍ଥ ହେବାକୁ ଯାଉଛନ୍ତି। କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ଆଜି ଏହି ବିଷୟରେ ସୂଚନା ଦେଇ କହିଛନ୍ତି ଯେ ଦେଶର ବର୍ତ୍ତମାନର ସ୍ଥିତି ଓ ଆଶଙ୍କା ସମ୍ପର୍କରେ ଜଣାଇବା ପାଇଁ ବିରୋଧୀ ନେତାମାନେ ସୋମବାର ଭାରତର ପ୍ରଧାନ ବିଚାରପତିଙ୍କୁ ସାକ୍ଷାତ କରିବେ। ଏହି ସାକ୍ଷାତକାର ପାଇଁ ସେ ଏବଂ ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ ପ୍ରଧାନ ବିଚାରପତିଙ୍କୁ ପୃଥକ ଭାବେ ଚିଠି ଲେଖି ଅପରାହ୍ନ ୪ଟାରୁ ୫ଟା ମଧ୍ୟରେ ସମୟ ମାଗିଛନ୍ତି। ନିଜର ଦାବି ଜଣାଇବା ନୁହେଁ, ବରଂ ବର୍ତ୍ତମାନର ଗମ୍ଭୀର ପରିସ୍ଥିତି ପ୍ରତି ସର୍ବୋଚ୍ଚ ଅଦାଲତଙ୍କ ଦୃଷ୍ଟି ଆକର୍ଷଣ କରିବା ଏହି ସାକ୍ଷାତର ମୁଖ୍ୟ ଉଦ୍ଦେଶ୍ୟ ବୋଲି ସେ ସ୍ପଷ୍ଟ କରିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଗୃହମନ୍ତ୍ରୀ ଅମିତ ଶାହ ଦେଶରେ ଅରାଜକତା ସୃଷ୍ଟି କରୁଥିବା ଅଭିଯୋଗ କରି ଖଡ଼ଗେ କହିଛନ୍ତି ଯେ ସରକାର ପ୍ରସ୍ତାବିତ ୟୁବ ଆନ୍ଦୋଳନକୁ ନେଇ ଅତ୍ୟାଧିକ ଭୟଭୀତ ହୋଇପଡ଼ିଛନ୍ତି। ଏହି କାରଣରୁ ପ୍ରାୟ ୩୨,୦୦୦ ପୋଲିସ କର୍ମଚାରୀ ଏବଂ ୭,୫୦୦ ସୁରକ୍ଷା ବଳ ମୁତୟନ କରାଯାଇଛି, ଯାହା ସରକାରଙ୍କ ଭୟକୁ ସ୍ପଷ୍ଟ ଭାବେ ଦର୍ଶାଉଛି। ବର୍ତ୍ତମାନର ସ୍ଥିତିକୁ ଜରୁରୀକାଳୀନ ପରିସ୍ଥିତି ସହିତ ତୁଳନା କରି ସେ କହିଛନ୍ତି ଯେ ସେତେବେଳେ ମଧ୍ୟ ଏପରି ଆଶଙ୍କା କିମ୍ବା କଟକଣା ଦେଖିବାକୁ ମିଳିନଥିଲା। ସେତେବେଳେ କୌଣସି ଟ୍ରେନ୍ କିମ୍ବା ବିମାନ ସେବା ବାତିଲ କରାଯାଇନଥିଲା ଏବଂ ଲୋକମାନେ ମୁକ୍ତଭାବେ ଯାତାୟାତ କରୁଥିଲେ।
କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ଡି. ଦେବରାଜ ଉର୍ସଙ୍କ ମନ୍ତ୍ରିମଣ୍ଡଳରେ ଶିକ୍ଷାମନ୍ତ୍ରୀ ଭାବେ ନିଜର ଅନୁଭୂତି ବର୍ଣ୍ଣନା କରି ଖଡ଼ଗେ କହିଛନ୍ତି ଯେ ସେତେବେଳେ କାହାକୁ ବିନା କାରଣରେ ଗିରଫ କରାଯାଉନଥିଲା। ଏପରିକି ଅନେକ ଲୋକ ନିଜକୁ ଗିରଫ କରିବାକୁ ଅନୁରୋଧ କରୁଥିଲେ ମଧ୍ୟ ସମ୍ପୃକ୍ତ ମୁଖ୍ୟମନ୍ତ୍ରୀ ବିନା ସାଂବିଧାନିକ ଆଧାରରେ ଗିରଫ କରିବାକୁ ମନା କରିଦେଉଥିଲେ। ମାତ୍ର ବର୍ତ୍ତମାନର ସରକାର ବିନା କାରଣରେ ଭୟର ବାତାବରଣ ସୃଷ୍ଟି କରୁଛନ୍ତି।
ଏହା ସହିତ କଂଗ୍ରେସ ଅଧ୍ୟକ୍ଷ ମୁଖ୍ୟ ନିର୍ବାଚନ ଆୟୁକ୍ତ ଏବଂ ନିର୍ବାଚନ ଆୟୋଗର ସଦସ୍ୟମାନଙ୍କୁ ମିଳିଥିବା ଆଇନଗତ ସୁରକ୍ଷାକୁ ନେଇ ସରକାରଙ୍କୁ ସମାଲୋଚନା କରିଛନ୍ତି। ୨୦୨୩ ମସିହାରେ ଆଗତ ଆଇନ ବଳରେ ନିର୍ବାଚନ ଆୟୋଗଙ୍କୁ ଦିଆଯାଇଥିବା ସୁରକ୍ଷା ବ୍ୟବସ୍ଥା ଦେଶର ରାଷ୍ଟ୍ରପତି କିମ୍ବା ପ୍ରଧାନ ବିଚାରପତିଙ୍କୁ ମଧ୍ୟ ମିଳିନାହିଁ ବୋଲି ସେ ଆକ୍ଷେପ କରିଛନ୍ତି। ନିର୍ବାଚନୀ ଅନିୟମିତତା ଏବଂ ଗଣତାନ୍ତ୍ରିକ ପ୍ରତିବାଦକୁ ଦମନ କରିବା ପାଇଁ ସରକାର ଏପରି ପଦକ୍ଷେପ ନେଉଥିବା ସେ ଦାବି କରିଛନ୍ତି।