ନୂଆଦିଲ୍ଲୀ: ରୋଗ ହେବା ପରେ ଚିକିତ୍ସା ଅପେକ୍ଷା ରୋଗକୁ ଆଗୁଆ ଚିହ୍ନଟ କରିବା ଏବଂ ନିରାକରଣ ଉପରେ ଗୁରୁତ୍ୱ ଦେଉଛନ୍ତି କେନ୍ଦ୍ର ସରକାର। ୨୦୧୭ ପରଠାରୁ ଦେଶର ସ୍ୱାସ୍ଥ୍ୟସେବା ବ୍ୟବସ୍ଥାରେ ପ୍ରତିରୋଧକ ସ୍ୱାସ୍ଥ୍ୟ ଓ ପ୍ରାରମ୍ଭିକ ରୋଗ ଚିହ୍ନଟକୁ ପ୍ରାଥମିକତା ଦିଆଯାଇଛି ବୋଲି କହିଛନ୍ତି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେ.ପି. ନଡ୍ଡା। ABP ସ୍ୱାସ୍ଥ୍ୟ କନକ୍ଲେଭରେ ଯୋଗଦେଇ ସେ ଦେଶରେ ରୋଗ ସ୍କ୍ରିନିଂ, ମାତୃ ସ୍ୱାସ୍ଥ୍ୟ ଓ ଟିକାକରଣ କାର୍ଯ୍ୟକ୍ରମ ସମ୍ପର୍କରେ ତଥ୍ୟ ରଖିଛନ୍ତି।
ନଡ୍ଡାଙ୍କ ଅନୁସାରେ, ଆରୋଗ୍ୟ ମନ୍ଦିର ମାଧ୍ୟମରେ ୩୦ ବର୍ଷରୁ ଅଧିକ ବୟସର ଲୋକଙ୍କ ପାଇଁ ମୁଖ କର୍କଟ, ସ୍ତନ କର୍କଟ, ଗର୍ଭାଶୟ ଗ୍ରୀବା କର୍କଟ, ମଧୁମେହ ଓ ଉଚ୍ଚ ରକ୍ତଚାପ ପରୀକ୍ଷା କରାଯାଉଛି।
୨୦୧୮ରୁ ଚାଲିଥିବା ସ୍କ୍ରିନିଂ କାର୍ଯ୍ୟକ୍ରମରେ ପ୍ରାୟ ୪୪ କୋଟି ଲୋକଙ୍କର ଉଚ୍ଚ ରକ୍ତଚାପ ପରୀକ୍ଷା କରାଯାଇଥିବା ବେଳେ ପ୍ରାୟ ୭.୬ କୋଟି ଲୋକଙ୍କଠାରେ ଏହା ଚିହ୍ନଟ ହୋଇଛି। ସେହିପରି ପ୍ରାୟ ୪୪ କୋଟି ଲୋକଙ୍କର ମଧୁମେହ ସ୍କ୍ରିନିଂରୁ ପ୍ରାୟ ୫ କୋଟି ଲୋକଙ୍କଠାରେ ରୋଗ ଚିହ୍ନଟ ହୋଇଥିବା ସେ କହିଛନ୍ତି।
କର୍କଟ ରୋଗର ପ୍ରାରମ୍ଭିକ ଚିହ୍ନଟ ପାଇଁ ମଧ୍ୟ ସ୍କ୍ରିନିଂକୁ ଗୁରୁତ୍ୱ ଦିଆଯାଉଛି। ନଡ୍ଡାଙ୍କ ଦିଆଯାଇଥିବା ତଥ୍ୟ ଅନୁସାରେ, ପ୍ରାୟ ୩୭.୭ କୋଟି ଲୋକଙ୍କର ମୁଖ କର୍କଟ ସ୍କ୍ରିନିଂରୁ ୨.୨ ଲକ୍ଷ ମାମଲା ଚିହ୍ନଟ ହୋଇଛି। ୧୭.୭ କୋଟି ସ୍ତନ କର୍କଟ ସ୍କ୍ରିନିଂରେ ପ୍ରାୟ ୯୯ ହଜାର ମାମଲା ଏବଂ ୧୯.୮ କୋଟି ଗର୍ଭାଶୟ ଗ୍ରୀବା କର୍କଟ ସ୍କ୍ରିନିଂରେ ପ୍ରାୟ ଏକ ଲକ୍ଷ ମାମଲା ଚିହ୍ନଟ ହୋଇଥିବା ସେ ଉଲ୍ଲେଖ କରିଛନ୍ତି।
ଶିଶୁ ଓ ମାତୃ ସ୍ୱାସ୍ଥ୍ୟକୁ ନେଇ ସରକାରଙ୍କ ପଦକ୍ଷେପ ସମ୍ପର୍କରେ ମଧ୍ୟ ନଡ୍ଡା ସୂଚନା ଦେଇଛନ୍ତି। ସରକାରୀ କାର୍ଯ୍ୟକ୍ରମରେ ଜନ୍ମରୁ ୧୬ ବର୍ଷ ବୟସ ପର୍ଯ୍ୟନ୍ତ ୧୧ଟି ଟିକାକରଣର ବ୍ୟବସ୍ଥା ଥିବା ସେ କହିଛନ୍ତି।
ଗର୍ଭବତୀ ମହିଳାଙ୍କ ସ୍ୱାସ୍ଥ୍ୟ ଉପରେ ମଧ୍ୟ ନିୟମିତ ନଜର ରଖାଯାଉଛି। ସାଧାରଣ ଗର୍ଭଧାରଣରେ ପାଞ୍ଚଟି ସ୍ୱାସ୍ଥ୍ୟ ପରୀକ୍ଷା ଓ ଦୁଇଟି ଟିକାକରଣ ଆବଶ୍ୟକ ହୋଇଥିବା ବେଳେ ଉଚ୍ଚ ବିପଦପୂର୍ଣ୍ଣ ଗର୍ଭଧାରଣ କ୍ଷେତ୍ରରେ ଆଠଟି ପରୀକ୍ଷା କରାଯିବାର ବ୍ୟବସ୍ଥା ରହିଛି।
ମାତୃ ସ୍ୱାସ୍ଥ୍ୟ କ୍ଷେତ୍ରରେ ହୋଇଥିବା ପରିବର୍ତ୍ତନ ବିଷୟରେ ନଡ୍ଡା କହିଛନ୍ତି ଯେ, ୨୦୧୪ରେ ପ୍ରାୟ ୭୮ ପ୍ରତିଶତ ପ୍ରସବ ସରକାରୀ ହସ୍ପିଟାଲରେ ହେଉଥିଲା। ୨୦୨୩-୨୪ ତଥ୍ୟ ଅନୁସାରେ ଏହା ୯୦.୬ ପ୍ରତିଶତକୁ ବୃଦ୍ଧି ପାଇଛି।
ସିଜେରିଆନ୍ ପ୍ରସବ କ୍ଷେତ୍ରରେ ସରକାରୀ ବ୍ୟବସ୍ଥା ଅଧୀନରେ ମାତୃ ଅସ୍ତ୍ରୋପଚାରର ଖର୍ଚ୍ଚ ବହନ କରାଯାଉଥିବା ସେ ଉଲ୍ଲେଖ କରିଛନ୍ତି। ସରକାରଙ୍କ ଏହି ପଦକ୍ଷେପଗୁଡ଼ିକର ମୂଳ ଲକ୍ଷ୍ୟ ହେଉଛି ରୋଗକୁ ଗୁରୁତର ହେବା ପୂର୍ବରୁ ଚିହ୍ନଟ କରିବା, ଚିକିତ୍ସାର ସୁଯୋଗ ବଢ଼ାଇବା ଏବଂ ଗ୍ରାମାଞ୍ଚଳରେ ମଧ୍ୟ ସ୍ୱାସ୍ଥ୍ୟସେବାକୁ ଅଧିକ ସୁଲଭ କରିବା।