ଆଧାର କାର୍ଡ ଆଜି ବ୍ୟାଙ୍କ ଆକାଉଣ୍ଟ ଖୋଲିବାଠାରୁ ଆରମ୍ଭ କରି KYC ଏବଂ ବିଭିନ୍ନ ସରକାରୀ ସେବା ପାଇଁ ଏକ ଗୁରୁତ୍ୱପୂର୍ଣ୍ଣ ଦସ୍ତାବିଜ। କିନ୍ତୁ ଆପଣଙ୍କ ଆଧାର ନମ୍ବର ଅନ୍ୟ କାହା ପାଖରେ ଥିଲେ, ସେ କ’ଣ ଆପଣଙ୍କ ବ୍ୟାଙ୍କ ବାଲାନ୍ସ ଜାଣିପାରିବେ? ଆକାଉଣ୍ଟରୁ ଟଙ୍କା ଉଠାଇପାରିବେ କି? ଏପରି ପ୍ରଶ୍ନକୁ ନେଇ ଅନେକଙ୍କ ମନରେ ଭୟ ରହିଛି। ତେବେ ଏହି ପ୍ରସଙ୍ଗରେ ଆଧାର ପରିଚାଳନାକାରୀ ସଂସ୍ଥା UIDAI ସ୍ପଷ୍ଟ କରିଛି ଯେ, କେବଳ ଆଧାର ନମ୍ବର ଜାଣିଥିବାରୁ କେହି ଆପଣଙ୍କ ବ୍ୟାଙ୍କ ଆକାଉଣ୍ଟରୁ ସିଧାସଳଖ ଟଙ୍କା ଉଠାଇପାରିବେ ନାହିଁ।
UIDAI ପାଖରେ ରହିଛି କି ଆପଣଙ୍କ ବ୍ୟାଙ୍କ ବାଲାନ୍ସର ତଥ୍ୟ?
UIDAI ପାଖରେ ଆଧାର ପଞ୍ଜୀକରଣ ସମୟରେ ଦିଆଯାଇଥିବା ସୀମିତ ପରିଚୟ ସମ୍ବନ୍ଧୀୟ ତଥ୍ୟ ରହିଥାଏ। ଏଥିରେ ନାମ, ଜନ୍ମତାରିଖ, ଲିଙ୍ଗ, ଫଟୋ ଏବଂ ଟିପଚିହ୍ନ ଓ ଆଇରିସ୍ ଭଳି ବାୟୋମେଟ୍ରିକ୍ ତଥ୍ୟ ଅନ୍ତର୍ଭୁକ୍ତ। ମୋବାଇଲ୍ ନମ୍ବର ଓ ଇମେଲ୍ ଠିକଣା ମଧ୍ୟ ଦିଆଯାଇପାରେ।
କିନ୍ତୁ UIDAI ଆପଣଙ୍କ ବ୍ୟାଙ୍କ ଆକାଉଣ୍ଟରେ କେତେ ଟଙ୍କା ଅଛି, କେତେ ଟଙ୍କା ଜମା କରିଛନ୍ତି କିମ୍ବା କେତେ ଟଙ୍କା ଉଠାଇଛନ୍ତି, ସେ ସମ୍ପର୍କିତ ତଥ୍ୟ ରଖେ ନାହିଁ। ସେହିପରି ସେୟାର, ମ୍ୟୁଚୁଆଲ୍ ଫଣ୍ଡ୍, ଡିମାଟ୍ ଆକାଉଣ୍ଟ ଓ ବୀମା ସମ୍ପର୍କିତ ଆର୍ଥିକ ତଥ୍ୟ ମଧ୍ୟ ଆଧାର ଡାଟାବେସ୍ର ଅଂଶ ନୁହେଁ।
ବ୍ୟାଙ୍କ ସହ ଆଧାର ଲିଙ୍କ୍ କଲେ କ’ଣ ହୁଏ?
ଆଧାର ମାଧ୍ୟମରେ ପରିଚୟ ଯାଞ୍ଚ କରିବା ସମୟରେ ବ୍ୟାଙ୍କ କିମ୍ବା ଅନ୍ୟ ଅନୁମୋଦିତ ସଂସ୍ଥା UIDAI ନିକଟକୁ ପ୍ରମାଣୀକରଣ ପାଇଁ ଅନୁରୋଧ ପଠାଏ। ଏହାର ଉତ୍ତରରେ ପରିଚୟ ଯାଞ୍ଚ ସଫଳ ହୋଇଛି କି ନାହିଁ, ତାହା ନିଶ୍ଚିତ କରାଯାଏ।
ଯଦି e-KYC ପ୍ରକ୍ରିୟା କରାଯାଏ, ତେବେ ନିୟମ ଓ ଅନୁମତି ଅନୁସାରେ ନାମ, ଠିକଣା ଓ ଫଟୋ ଭଳି ପରିଚୟ ସମ୍ପର୍କିତ ତଥ୍ୟ ସମ୍ପୃକ୍ତ ସଂସ୍ଥାକୁ ମିଳିପାରେ। କିନ୍ତୁ ଏହାଦ୍ୱାରା UIDAI ଆପଣଙ୍କ ବ୍ୟାଙ୍କ ବାଲାନ୍ସ କିମ୍ବା ନିବେଶର ବିବରଣୀ ପାଇଯାଏ ନାହିଁ।
କେବଳ ଆଧାର ନମ୍ବରରେ ଖାଲି ହୋଇପାରିବ କି ଆକାଉଣ୍ଟ?
ନା, କେବଳ ଆଧାର ନମ୍ବର ଜାଣିଥିବାରୁ କେହି ଆପଣଙ୍କ ବ୍ୟାଙ୍କ ଆକାଉଣ୍ଟରୁ ସିଧାସଳଖ ଟଙ୍କା ଉଠାଇପାରିବେ ନାହିଁ। ବ୍ୟାଙ୍କିଂ କାରବାରରେ ସମ୍ପୃକ୍ତ ସେବା ଅନୁଯାୟୀ ଅତିରିକ୍ତ ପ୍ରମାଣୀକରଣ ଓ ସୁରକ୍ଷା ପ୍ରକ୍ରିୟା ଲାଗୁ ହୋଇପାରେ।
ତେବେ ଏହାର ଅର୍ଥ ନୁହେଁ ଯେ ଆଧାର ସମ୍ପର୍କିତ ସମସ୍ତ ଠକେଇର ଆଶଙ୍କା ନାହିଁ। ଠକମାନେ ଆଧାର ତଥ୍ୟ ସହ ଅନ୍ୟ ବ୍ୟକ୍ତିଗତ ସୂଚନା ହାସଲ କରି ଠକେଇ କରିବାକୁ ଚେଷ୍ଟା କରିପାରନ୍ତି। ତେଣୁ ଆଧାର ନମ୍ବର ସହ OTP, ବ୍ୟାଙ୍କ ପାସୱାର୍ଡ ଓ PIN କାହା ସହ ସେୟାର କରନ୍ତୁ ନାହିଁ। ଅଜଣା ଲିଙ୍କ୍ରେ କ୍ଲିକ୍ କରିବା କିମ୍ବା ଫୋନ୍ରେ ବ୍ୟାଙ୍କିଂ ସୂଚନା ଦେବାରୁ ଦୂରେଇ ରୁହନ୍ତୁ।
ଆଧାର ସୁରକ୍ଷିତ ରଖିବାକୁ କ’ଣ କରିବେ?
– ଆଧାରର ଫଟୋ କିମ୍ବା କପି ଅନାବଶ୍ୟକ ଭାବେ ଅନ୍ୟମାନଙ୍କୁ ଦିଅନ୍ତୁ ନାହିଁ।
– ଆବଶ୍ୟକ ସ୍ଥଳରେ ମାସ୍କଡ୍ ଆଧାର ବ୍ୟବହାର କରନ୍ତୁ।
– UIDAIର ଉପଲବ୍ଧ ସୁବିଧା ମାଧ୍ୟମରେ ବାୟୋମେଟ୍ରିକ୍ ଲକ୍ କରିବା ବିଷୟରେ ବିଚାର କରନ୍ତୁ।
– ବ୍ୟାଙ୍କ ଆକାଉଣ୍ଟରେ ଅଜଣା କାରବାର ଦେଖିଲେ ତୁରନ୍ତ ବ୍ୟାଙ୍କକୁ ଜଣାନ୍ତୁ।
ଆଧାର ହେଉଛି ପରିଚୟ ପ୍ରମାଣର ଏକ ମାଧ୍ୟମ, ଆପଣଙ୍କ ବ୍ୟାଙ୍କ ବାଲାନ୍ସ ଦେଖିବାର ଚାବି ନୁହେଁ। ତଥାପି ଡିଜିଟାଲ୍ ଠକେଇରୁ ବଞ୍ଚିବା ପାଇଁ ବ୍ୟକ୍ତିଗତ ତଥ୍ୟ ଓ ବ୍ୟାଙ୍କିଂ ସୂଚନାକୁ ସୁରକ୍ଷିତ ରଖିବା ଜରୁରୀ।