ଭୁବନେଶ୍ବର: ବଙ୍ଗୋପସାଗରରେ ସୃଷ୍ଟି ହୋଇଥିବା ଅତି ଭୀଷଣ ସାମୁଦ୍ରିକ ଝଡ଼ ‘ଅର୍ଣ୍ଣବ’ ଆନ୍ଧ୍ରପ୍ରଦେଶ ଉପକୂଳରେ ତାଣ୍ଡବ ରଚିବା କରିବା ଆରମ୍ଭ କରିଦେଇଛି। ଭାରତୀୟ ପାଣିପାଗ ବିଭାଗର ସଦ୍ୟତମ ଆକଳନ ଅନୁଯାୟୀ, ବାତ୍ୟାର ସ୍ଥଳଭାଗ ଅତିକ୍ରମ ପ୍ରକ୍ରିୟା ଆରମ୍ଭ ହୋଇସାରିଛି। ଭୋର ୨ଟାରୁ ସକାଳ ୪ଟା ମଧ୍ୟରେ ବାପଟଲା ଏବଂ ବିଶାଖାପାଟଣା ମଧ୍ୟବର୍ତ୍ତୀ ଆନ୍ଧ୍ରପ୍ରଦେଶ-ୟାନମ୍ ଉପକୂଳ ଦେଇ ଏହି ବାତ୍ୟା ସ୍ଥଳଭାଗକୁ ପ୍ରବେଶ କରୁଛି। ବାତ୍ୟାର କେନ୍ଦ୍ରଭାଗ ଉପକୂଳ ନିକଟତର ହେବା ସହ ଏହାର ବିଶାଳ ବାହ୍ୟ ମେଘମଣ୍ଡଳ ସ୍ଥଳଭାଗକୁ ପ୍ରବେଶ କରିସାରିଛି। ଏହି ସମୟରେ ଉପକୂଳ ମୁହାଁ ହୋଇ ଘଣ୍ଟାପ୍ରତି ୧୨୫ରୁ ୧୩୫ କିଲୋମିଟର ବେଗରେ ସାଂଘାତିକ ପବନ ବହିବା ସହ ମଝିରେ ମଝିରେ ଝଟକା ପବନର ବେଗ ୧୫୦ କିଲୋମିଟର ପର୍ଯ୍ୟନ୍ତ ପହଞ୍ଚୁଛି।
ବାତ୍ୟାର ପ୍ରତ୍ୟକ୍ଷ ପ୍ରଭାବରେ ଆନ୍ଧ୍ରପ୍ରଦେଶର ସମଗ୍ର ଉପକୂଳବର୍ତ୍ତୀ ଅଞ୍ଚଳରେ ପ୍ରବଳରୁ ଅତି ପ୍ରବଳ ବର୍ଷା ସାଙ୍ଗକୁ ତୁଫାନି ପବନ ଜାରି ରହିଛି। ବିଶେଷକରି କାକିନାଡ଼ା, ୟାନମ୍ ଏବଂ ଏହାର ଆଖପାଖ ଅଞ୍ଚଳରେ ବାତ୍ୟାର ବ୍ୟାପକ ପ୍ରକୋପ ଦେଖିବାକୁ ମିଳିଛି। ୧୫୦ କିଲୋମିଟର ବେଗରେ ବହୁଥିବା ଏହି ଭୟଙ୍କର ପବନ ଯୋଗୁଁ ବହୁ ପୁରୁଣା ଓ ବିଶାଳ ଗଛ ଉପୁଡ଼ି ପଡ଼ିବା ସହ ଶହ ଶହ ବିଦ୍ୟୁତ୍ ଖୁଣ୍ଟି ଭାଙ୍ଗି ଚୁରମାର ହୋଇଯାଇଛି। କ୍ରମାଗତ ବର୍ଷା ଓ ପବନ ଯୋଗୁଁ କଞ୍ଚା ଘର, ଚାଳ ଘର ଏବଂ ବିଭିନ୍ନ ଐତିହାସିକ ଓ ସାଧାରଣ ନିର୍ମାଣର ବ୍ୟାପକ କ୍ଷୟକ୍ଷତି ହେବାର ଆଶଙ୍କା ଦେଖାଦେଇଛି।
ବର୍ଷା ଓ ପବନ ବ୍ୟତୀତ ସମୁଦ୍ରରେ ଆସୁଥିବା ଭୀଷଣ ଜୁଆର ପ୍ରଶାସନର ଚିନ୍ତାକୁ ଦ୍ୱିଗୁଣିତ କରିଦେଇଛି। ପାଣିପାଗ ବିଶେଷଜ୍ଞଙ୍କ ଅନୁସାରେ, ବାତ୍ୟା ସ୍ଥଳଭାଗ ଛୁଇଁବା ସମୟରେ ସମୁଦ୍ରରେ ସାଧାରଣ ଜୁଆର ତୁଳନାରେ ପ୍ରାୟ ୧.୫ରୁ ୨.୫ ମିଟର ପର୍ଯ୍ୟନ୍ତ ଉଚ୍ଚର ଜଳସ୍ତର ବୃଦ୍ଧି ପାଇପାରେ। ଏହି ସାମୁଦ୍ରିକ ଜୁଆର ଯୋଗୁଁ ଉପକୂଳବର୍ତ୍ତୀ ନିମ୍ନାଞ୍ଚଳ ଏବଂ କାକିନାଡ଼ା ଓ ୟାନମ୍ ନିକଟବର୍ତ୍ତୀ ଗାଁଗୁଡ଼ିକରେ ବ୍ୟାପକ ଜଳପ୍ଲାବନ ସୃଷ୍ଟି ହେବାର ବଳିଷ୍ଠ ଆଶଙ୍କା ରହିଛି। ସେଥିପାଇଁ ସ୍ଥାନୀୟ ବାସିନ୍ଦାଙ୍କୁ ଅତ୍ୟନ୍ତ ସତର୍କ ରହିବାକୁ ପରାମର୍ଶ ଦିଆଯାଇଛି।
ବାତ୍ୟାଜନିତ ଜରୁରୀ ପରିସ୍ଥିତିର ମୁକାବିଲା ପାଇଁ ସ୍ଥାନୀୟ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ଉଦ୍ଧାର ଓ ରିଲିଫ୍ କାର୍ଯ୍ୟକୁ ସର୍ବାଧିକ ପ୍ରାଥମିକତା ଦିଆଯାଉଛି। ବାତ୍ୟା ପ୍ରବଣ ଏବଂ ଜଳପ୍ଲାବନର ବିପଦ ଥିବା ଅଞ୍ଚଳରୁ ହଜାର ହଜାର ଲୋକଙ୍କୁ ସୁରକ୍ଷିତ ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯାଇଛି। ସେମାନଙ୍କ ପାଇଁ ଶୁଖିଲା ଖାଦ୍ୟ, ପାନୀୟ ଜଳ, ଆଲୋକ ଏବଂ ଜରୁରୀ ମେଡିକାଲ ସେବାର ବ୍ୟବସ୍ଥା କରାଯାଇଛି। ଯୁଦ୍ଧକାଳୀନ ଭିତ୍ତିରେ ରାସ୍ତାଘାଟ ସଫା କରିବା ଏବଂ ବିଦ୍ୟୁତ ସେବା ପୁନରୁଦ୍ଧାର ପାଇଁ ସ୍ୱତନ୍ତ୍ର ଟିମ୍ ମୁତୟନ ହୋଇଛନ୍ତି।
ଅନ୍ୟପକ୍ଷରେ, ଏହି ବାତ୍ୟାର ଗତିପଥ ଆନ୍ଧ୍ରପ୍ରଦେଶ ଆଡ଼କୁ ରହିଥିଲେ ମଧ୍ୟ ଏହାର ଆଂଶିକ ପ୍ରଭାବ ଓଡ଼ିଶାରେ ମଧ୍ୟ ଅନୁଭୂତ ହେଉଛି। ଓଡ଼ିଶାର ଦକ୍ଷିଣ ଜିଲ୍ଲାଗୁଡ଼ିକରେ ବାତ୍ୟା ପ୍ରଭାବରେ କ୍ରମାଗତ ବର୍ଷା ଏବଂ ବହୁତ ଜୋରରେ ପବନ ବହିବାର ସମ୍ଭାବନା ରହିଛି। ଏହାକୁ ଦୃଷ୍ଟିରେ ରଖି ଓଡ଼ିଶାର ଉପକୂଳବର୍ତ୍ତୀ ଓ ଦକ୍ଷିଣ ଜିଲ୍ଲାର ଜନସାଧାରଣଙ୍କୁ ସଜାଗ ରହିବା ସହ ପାଣିପାଗ ବିଭାଗର ପ୍ରତ୍ୟେକ ସଦ୍ୟତମ ସୂଚନା ଉପରେ ନଜର ରଖିବାକୁ ଜରୁରୀ ପରାମର୍ଶ ଦିଆଯାଇଛି।