ଭୁବନେଶ୍ୱର: ଯୌନ ନିର୍ଯାତନା ଅଭିଯୋଗକୁ ନେଇ ଦେଶର ଚର୍ଚ୍ଚିତ ଶିକ୍ଷାନୁଷ୍ଠାନ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ (JNU)ରୁ ବହିଷ୍କୃତ ହୋଇଥିବା କଂଗ୍ରେସ ସାଂସଦ ଅଙ୍ଗୋମଚା ବିମୋଲ ଆକୋଇଜାମଙ୍କୁ ମିଳିଛି ବଡ଼ ଆଶ୍ୱସ୍ତି। ତାଙ୍କ ବହିଷ୍କାର ଆଦେଶ ଉପରେ ରୋକ୍ ଲଗାଇଛନ୍ତି ଦିଲ୍ଲୀ ହାଇକୋର୍ଟ। ଫଳରେ ଏହି ହାଇପ୍ରୋଫାଇଲ୍ ମାମଲା ଏବେ ନୂଆ ମୋଡ଼ ନେଇଛି। ଏକପଟେ ୧୧ ଜଣ ମହିଳା ଛାତ୍ରୀଙ୍କ ଗମ୍ଭୀର ଅଭିଯୋଗ, ଅନ୍ୟପଟେ ସାଂସଦଙ୍କ ପକ୍ଷରୁ ବହିଷ୍କାର ନିଷ୍ପତ୍ତିକୁ ଆଇନଗତ ଚ୍ୟାଲେଞ୍ଜ। ଏହା ମଧ୍ୟରେ ହାଇକୋର୍ଟଙ୍କ ଅନ୍ତରୀଣ ରାୟ ମାମଲାକୁ ଆହୁରି ଚର୍ଚ୍ଚାକୁ ଆଣିଛି।
ମାମଲାର ଆରମ୍ଭ ହୋଇଥିଲା ଚଳିତ ବର୍ଷ ମେ ମାସରେ। JNUର ୧୧ ଜଣ ମହିଳା ଛାତ୍ରୀ ପ୍ରଫେସର ଆକୋଇଜାମଙ୍କ ବିରୋଧରେ ଯୌନ ନିର୍ଯାତନା ସମ୍ପର୍କିତ ଅଭିଯୋଗ ଆଣିଥିଲେ। ଅଭିଯୋଗ ଅନୁସାରେ, ବୈଠକ ଓ ଅନ୍ୟାନ୍ୟ ଶିକ୍ଷାଗତ କାର୍ଯ୍ୟକଳାପର ବାହାନା କରି ସେ ଛାତ୍ରୀମାନଙ୍କୁ ବିଶ୍ୱବିଦ୍ୟାଳୟ ପରିସରରେ ଥିବା ନିଜ ବାସଭବନକୁ ଡାକୁଥିଲେ। ସେଠାରେ ସେମାନଙ୍କୁ ଯୌନ ନିର୍ଯାତନା ଦେବାକୁ ଉଦ୍ୟମ କରୁଥିବା ଅଭିଯୋଗ ହୋଇଥିଲା।
କେବଳ ସେତିକି ନୁହେଁ, କିଛି ଛାତ୍ରୀ ଶ୍ରେଣୀଗୃହରେ ପ୍ରଫେସରଙ୍କ ଆପତ୍ତିଜନକ ଓ ଅଶ୍ଳୀଳ ମନ୍ତବ୍ୟ ସମ୍ପର୍କରେ ମଧ୍ୟ ଅଭିଯୋଗ କରିଥିଲେ। ଏହି ଅଭିଯୋଗକୁ ନେଇ ବିଶ୍ୱବିଦ୍ୟାଳୟ ଭିତରେ ଅସନ୍ତୋଷ ବଢ଼ିଥିଲା। ପରେ ମାମଲାର ତଦନ୍ତ ପାଇଁ JNUର ଆଭ୍ୟନ୍ତରୀଣ ଅଭିଯୋଗ କମିଟି (ICC)କୁ ଦାୟିତ୍ୱ ଦିଆଯାଇଥିଲା।
ଆଭ୍ୟନ୍ତରୀଣ ଅଭିଯୋଗ କମିଟିର ତଦନ୍ତ ଓ ରିପୋର୍ଟ ଆଧାରରେ ବିଶ୍ୱବିଦ୍ୟାଳୟ ପ୍ରଶାସନ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ସୁପାରିଶ କରିଥିଲା। ଏହାପରେ ଅକ୍ଟୋବର ୯ ତାରିଖରେ ପ୍ରଫେସର ଆକୋଇଜାମଙ୍କୁ ଚାକିରିରୁ ବହିଷ୍କାର କରିବାକୁ ନିଷ୍ପତ୍ତି ହୋଇଥିଲା।
ବିଶ୍ୱବିଦ୍ୟାଳୟର ବହିଷ୍କାର ଆଦେଶରେ ICCର ତଦନ୍ତ ରିପୋର୍ଟ ଓ ନିଷ୍କର୍ଷକୁ ଆଧାର କରାଯାଇଥିବା ଉଲ୍ଲେଖ ରହିଥିଲା। ଏହି ଆଦେଶରେ JNU କୁଳପତି ଶାନ୍ତିଶ୍ରୀ ଡି. ପଣ୍ଡିତଙ୍କ ସ୍ୱାକ୍ଷର ରହିଥିଲା। ତେବେ ନିଜ ବିରୋଧରେ ଆସିଥିବା ସମସ୍ତ ଅଭିଯୋଗକୁ ଅସ୍ୱୀକାର କରିଥିଲେ ଆକୋଇଜାମ।
ବିଶ୍ୱବିଦ୍ୟାଳୟର ନିଷ୍ପତ୍ତିକୁ ଚ୍ୟାଲେଞ୍ଜ କରି ଅଙ୍ଗୋମଚା ବିମୋଲ ଆକୋଇଜାମ ଦିଲ୍ଲୀ ହାଇକୋର୍ଟର ଦ୍ୱାରସ୍ଥ ହୋଇଥିଲେ। ତାଙ୍କ ଆବେଦନର ଶୁଣାଣି କରି ବିଚାରପତି ଅନୁପ ଜୟରାମ ଭାମ୍ଭାନୀଙ୍କ ଖଣ୍ଡପୀଠ ବହିଷ୍କାର ଆଦେଶ ଉପରେ ଅନ୍ତରୀଣ ସ୍ଥଗିତାଦେଶ ଜାରି କରିଛନ୍ତି।
ଏଥିସହ JNU ପ୍ରଶାସନକୁ ନୋଟିସ୍ ଜାରି କରି ଜବାବ ମାଗିଛନ୍ତି ଅଦାଲତ। ମାମଲାର ପରବର୍ତ୍ତୀ ଶୁଣାଣି ୨୦୨୭ ଜାନୁଆରୀରେ ହେବ। ତେବେ ହାଇକୋର୍ଟଙ୍କ ଏହି ଅନ୍ତରୀଣ ଆଦେଶକୁ ଅଭିଯୋଗରୁ ମୁକ୍ତି ବା ଅଭିଯୋଗର ସତ୍ୟାସତ୍ୟ ଉପରେ ଚୂଡ଼ାନ୍ତ ରାୟ ଭାବେ ଦେଖାଯାଇପାରିବ ନାହିଁ।
ଅଙ୍ଗୋମଚା ବିମୋଲ ଆକୋଇଜାମ ମଣିପୁରର ଆଭ୍ୟନ୍ତରୀଣ ମଣିପୁର ଲୋକସଭା ଆସନରୁ ନିର୍ବାଚିତ କଂଗ୍ରେସ ସାଂସଦ। ସାଂସଦ ହେବା ପୂର୍ବରୁ ସେ ଜବାହରଲାଲ ନେହେରୁ ବିଶ୍ୱବିଦ୍ୟାଳୟର ସାମାଜିକ ବିଜ୍ଞାନ ସ୍କୁଲରେ ପ୍ରଫେସର ଭାବେ କାର୍ଯ୍ୟ କରୁଥିଲେ। ତେଣୁ ଜଣେ ଶିକ୍ଷାବିତ୍ ତଥା ଜନପ୍ରତିନିଧିଙ୍କ ବିରୋଧରେ ଏପରି ଅଭିଯୋଗ ଏବଂ ପରବର୍ତ୍ତୀ ବହିଷ୍କାର ନିଷ୍ପତ୍ତି ଜାତୀୟ ସ୍ତରରେ ଚର୍ଚ୍ଚା ସୃଷ୍ଟି କରିଛି। ଏବେ ନଜର ୨୦୨୭ ଜାନୁଆରୀ ଶୁଣାଣି ଉପରେ। JNU ପ୍ରଶାସନ ହାଇକୋର୍ଟରେ କ’ଣ ଜବାବ ରଖିବ ଏବଂ ବହିଷ୍କାର ଆଦେଶକୁ ନେଇ ଆଗକୁ କି ଆଇନଗତ ମୋଡ଼ ଆସିବ, ତାହା ଉପରେ ସମସ୍ତଙ୍କ ନଜର ରହିଛି।