ଭୁବନେଶ୍ୱର: ରାୟଗଡ଼ା ଟ୍ରକ୍ ମାଲିକ ସଂଘର କୋଟି କୋଟି ଟଙ୍କା ଆତ୍ମସାତ୍ ଓ ବ୍ୟାପକ ଆର୍ଥିକ ଅନିୟମିତତା ମାମଲାରେ ପୂର୍ବତନ ରାଜ୍ୟସଭା ସାଂସଦ ନେକାଣ୍ଟି ଭାସ୍କର ରାଓଙ୍କୁ ନେଇ ରାଜ୍ୟରେ ବଡ଼ଧରଣର ଚାଞ୍ଚଲ୍ୟ ସୃଷ୍ଟି ହୋଇଛି। ରାୟଗଡ଼ା ଏବଂ ବିଶାଖାପାଟଣା ସ୍ଥିତ ବାସଭବନ ସମେତ ମୋଟ ୧୧ଟି ଭିନ୍ନ ସ୍ଥାନରେ କ୍ରାଇମ୍ବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ପକ୍ଷରୁ ଏକକାଳୀନ ଭାବେ ଏହି ବୃହତ ତଲାସୀ ଅଭିଯାନ ଜାରି ରହିଛି। ଅର୍ଥ ହେର୍ଫେର ଏବଂ ସଂଘ ପାଣ୍ଠିର ଦୁରୁପଯୋଗ ନେଇ ଆସିଥିବା ସାଙ୍ଘାତିକ ଅଭିଯୋଗର ଗମ୍ଭୀରତାକୁ ଦୃଷ୍ଟିରେ ରଖି ତଦନ୍ତ ପ୍ରକ୍ରିୟାକୁ ଅଧିକ ତୀବ୍ର କରାଯାଇଛି।
ଇଓଡବ୍ଲ୍ୟୁ ପକ୍ଷରୁ ସୂଚନା ଅନୁଯାୟୀ, ଏହି ସ୍ୱତନ୍ତ୍ର ଅଭିଯାନକୁ ସଫଳ କରିବା ପାଇଁ ଅତିରିକ୍ତ ଏସ୍ପି ଆଶିଷ କୁମାର ମିଶ୍ରଙ୍କ ସିଧାସଳଖ ନେତୃତ୍ୱରେ ଏକ ଶକ୍ତିଶାଳୀ ଟିମ୍ ଗଠନ କରାଯାଇଛି। ଏହି ଟିମ୍ରେ ୫ ଜଣ ଲେଖାଏଁ ଡିଏସ୍ପି ଏବଂ ଇନ୍ସପେକ୍ଟର ପାହ୍ୟାର ବରିଷ୍ଠ ଅଧିକାରୀ ସାମିଲ ରହିଛନ୍ତି। ଘଟଣାର ମୂଳ କାରଣ ଜାଣିବା ପାଇଁ ଗତ ବୁଧବାର ଦିନ ଇଓଡବ୍ଲ୍ୟୁର ଏକ ପ୍ରାରମ୍ଭିକ ଟିମ୍ ରାୟଗଡ଼ାରେ ପହଞ୍ଚି ସ୍ଥାନୀୟ ଥାନାରୁ ସମସ୍ତ ପୁରୁଣା କାଗଜପତ୍ର, ଏଫ୍ଆଇଆର୍ ଏବଂ ଅଭିଯୋଗର ତଥ୍ୟ ସଂଗ୍ରହ କରିଥିଲା। ଏହା ପରେ ପରବର୍ତ୍ତୀ ପଦକ୍ଷେପ ସ୍ୱରୂପ ଗୁରୁବାର ଦିନ ଅନ୍ୟ ଏକ ବିଶାଳ ଟିମ୍ ସେଠାରେ ପହଞ୍ଚି ତଦନ୍ତକୁ ଆହୁରି ବ୍ୟାପକ କରିଥିଲେ।
ଲଗାତାର ଦୁଇ ଦିନ ଧରି ରାୟଗଡ଼ାରେ ଡେରା ପକାଇ ଟ୍ରକ୍ ମାଲିକ ସଂଘର ଆର୍ଥିକ ଅନିୟମିତତା, ଆକାଉଣ୍ଟ ତଥା ହିସାବ କିତାବର କଠିନ ତର୍ଜମା କରାଯାଇଥିଲା। ଏହି ସମସ୍ତ ପ୍ରାଥମିକ ଯାଞ୍ଚ ପରେ ଆଜି ସକାଳୁ ସକାଳୁ ଇଓଡବ୍ଲ୍ୟୁ ଟିମ୍ ସିଧାସଳଖ ପୂର୍ବତନ ସାଂସଦଙ୍କ ବାସଭବନରେ ପ୍ରବେଶ କରି ତଲାସୀ ଅଭିଯାନ ଆରମ୍ଭ କରିଥିଲେ। ଘର ଭିତରୁ ବହୁ ଗୁରୁତ୍ୱପୂର୍ଣ୍ଣ ସରକାରୀ ଓ ବେସରକାରୀ ନଥିପତ୍ର, ବ୍ୟାଙ୍କ ଡକ୍ୟୁମେଣ୍ଟ ଯାଞ୍ଚ କରାଯାଉଥିବା ବେଳେ ସେଗୁଡ଼ିକୁ ଜବତ ମଧ୍ୟ କରାଯାଉଛି। ତବେ ଚଢ଼ାଉ ସମୟରେ ପୂର୍ବତନ ସାଂସଦ ଶ୍ରୀ ରାଓ ଘରେ ଅନୁପସ୍ଥିତ ଥିବା ଜଣାପଡ଼ିଛି। ତାଙ୍କ ବାସଭବନରେ ଉପସ୍ଥିତ ଥିବା କିଛି ସହଯୋଗୀ ଓ ସହାୟକମାନଙ୍କୁ ଅଧିକାରୀମାନେ ଅଟକ ରଖି ଏହି ସମଗ୍ର ଘଟଣା ସମ୍ପର୍କରେ ଘନଘନ ପଚରାଉଚରା ଜାରି ରଖିଛନ୍ତି।
ପ୍ରାପ୍ତ ଅଭିଯୋଗ ଅନୁଯାୟୀ, ରାୟଗଡ଼ା ଟ୍ରକ୍ ମାଲିକ ସଂଘର କିଛି ପ୍ରଭାବଶାଳୀ କର୍ମକର୍ତ୍ତାଙ୍କ ବିରୋଧରେ ବ୍ୟାପକ ଆର୍ଥିକ ଅନିୟମିତତା, ଜବରଦସ୍ତି ଅର୍ଥ ହଡ଼ପ, ବଟି ଆଦାୟ ଏବଂ ସାଧାରଣ ବ୍ୟବସାୟୀଙ୍କୁ ଧମକଚମକ ଦେବା ଭଳି ସାଂଘାତିକ ଅଭିଯୋଗ ରହିଛି। ଏହି ମାମଲାର ମୁଖ୍ୟ ଅଭିଯୁକ୍ତମାନେ ଅନ୍ୟ କିଛି ସଂଘ କର୍ମକର୍ତ୍ତାଙ୍କ ସହ ମିଶି ଦୀର୍ଘ ଦିନ ହେଲା ଅର୍ଥାତ୍ ୨୦୦୫ ମସିହାରୁ ନିରୀହ ଟ୍ରକ୍ ମାଲିକମାନଙ୍କଠାରୁ ବିଭିନ୍ନ ବାହାନା ଦେଖାଇ ବେଆଇନ ଭାବେ ଟଙ୍କା ଆଦାୟ କରିଆସୁଥିଲେ। ସବୁଠାରୁ ଆଶ୍ଚର୍ଯ୍ୟଜନକ କଥା ହେଲା, ସେମାନେ ନକ୍ସଲ କାର୍ଯ୍ୟକଳାପକୁ ପ୍ରଶ୍ରୟ ଦେବା କିମ୍ବା ସେଥିପାଇଁ ଅର୍ଥ ଯୋଗାଇବା ନାଁରେ ମଧ୍ୟ ସାଧାରଣ ଲୋକଙ୍କଠାରୁ ବଳପୂର୍ବକ ଟଙ୍କା ସଂଗ୍ରହ କରୁଥିଲେ ବୋଲି ଅଭିଯୋଗ ହୋଇଛି।
ଏହି ସମସ୍ତ ମାଧ୍ୟମରେ ସଂଗ୍ରହ ହୋଇଥିବା ଅର୍ଥର ପରିମାଣ କୋଟି କୋଟି ଟଙ୍କାରୁ ଅଧିକ ହେବ ବୋଲି ଆକଳନ କରାଯାଉଛି। କିନ୍ତୁ ଏତେ ବଡ଼ ପରିମାଣର ଟଙ୍କା ଆସିବା ସତ୍ତ୍ୱେ ଏହାର କୌଣସି ସଠିକ୍ ହିସାବ କିତାବ କିମ୍ବା ଅଡିଟ୍ ରିପୋର୍ଟ ସଂଘ ପକ୍ଷରୁ ରଖାଯାଇନଥିଲା। ଏପରିକି ଟ୍ରକ୍ ମାଲିକମାନଙ୍କଠାରୁ ଟଙ୍କା ଆଦାୟ କରୁଥିବା ସମୟରେ କୌଣସି ପ୍ରକାରର ରସିଦ୍ କିମ୍ବା ଭାଉଚର ଦିଆଯାଉ ନଥିଲା। ଏହି ଅବୈଧ ଉପାୟରେ ସଂଗ୍ରହ ହୋଇଥିବା କଳା ଧନକୁ ବେଆଇନ ଭାବେ ହଡ଼ପ କରି ସେମାନେ ବିଭିନ୍ନ ବଡ଼ ଘରୋଇ ବ୍ୟବସାୟିକ ସଂସ୍ଥାରେ ବ୍ୟାପକ ନିବେଶ କରିଥିଲେ। ପ୍ରାଥମିକ ତଥ୍ୟରୁ ଜଣାପଡ଼ିଛି ଯେ ଏହି କଳା ଟଙ୍କାଗୁଡ଼ିକୁ ଲଜିଷ୍ଟିକ୍ସ, ଟ୍ରେଡିଂ, ଖଣି (ମାଇନିଂ) ଏବଂ ରିଅଲ୍ ଇଷ୍ଟେଟ୍ କ୍ଷେତ୍ର ସମ୍ପର୍କିତ ବିଭିନ୍ନ ବଡ଼ କମ୍ପାନୀମାନଙ୍କରେ ଲଗାଯାଇ ସମ୍ପତ୍ତି ବୃଦ୍ଧି କରାଯାଇଛି।
ସଂଘର ସ୍ୱାର୍ଥରକ୍ଷା ଏବଂ ଏହି ଦୁର୍ନୀତି ବିରୋଧରେ ସଂଘର ସଭାପତି ସ୍ୱର୍ଗତ ୱାଇ. ଭେଙ୍କଟେଶ୍ୱର ରାଓ ନିଜେ ପୂର୍ବତନ ସାଂସଦ ଏନ୍. ଭାସ୍କର ରାଓ ଏବଂ ଅନ୍ୟାନ୍ୟ ସହଯୋଗୀଙ୍କ ବିରୋଧରେ ରାୟଗଡ଼ା ପୋଲିସରେ ଦୃଢ଼ ଲିଖିତ ଅଭିଯୋଗ ଦାଖଲ କରିଥିଲେ। ସେହି ଅଭିଯୋଗକୁ ଆଧାର କରି ଇଓଡବ୍ଲ୍ୟୁ ପକ୍ଷରୁ ଏତେ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ବର୍ତ୍ତମାନ ତଲାସୀ ଅଭିଯାନ ଜାରି ରହିଥିବାବେଳେ ଜବତ ହୋଇଥିବା କାଗଜପତ୍ର ଏବଂ ନଥିପତ୍ରରୁ ଆଗାମୀ ଦିନରେ ଆହୁରି ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ଓ ବଡ଼ ବଡ଼ ମୁଖା ଖୋଲିବ ବୋଲି ଆଶା କରାଯାଉଛି।