ଭୁବନେଶ୍ୱର: CBSE ଦଶମ ଓ ଦ୍ୱାଦଶ ଶ୍ରେଣୀ ବୋର୍ଡ ପରୀକ୍ଷା ୨୦୨୭କୁ ନେଇ ବଡ଼ ଘୋଷଣା। କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (CBSE) ପକ୍ଷରୁ ଆଗାମୀ ବୋର୍ଡ ପରୀକ୍ଷାର ତାରିଖ ଘୋଷଣା କରାଯାଇଛି। ଆସନ୍ତା ଫେବୃଆରୀ ୧୬ରୁ ଆରମ୍ଭ ହେବ ଦଶମ ଓ ଦ୍ୱାଦଶ ଶ୍ରେଣୀର ପରୀକ୍ଷା। ପରୀକ୍ଷା ଆରମ୍ଭ ହେବାର ୧୦୧ ଦିନ ପୂର୍ବରୁ ବୋର୍ଡ ପକ୍ଷରୁ ଡେଟସିଟ୍ ପ୍ରକାଶ ପାଇଛି। ଏହାଦ୍ୱାରା ଛାତ୍ରଛାତ୍ରୀଙ୍କୁ ପରୀକ୍ଷା ପ୍ରସ୍ତୁତି ପାଇଁ ଯଥେଷ୍ଟ ସମୟ ମିଳିବ।
ପ୍ରକାଶିତ ସୂଚନା ଅନୁଯାୟୀ, ଦଶମ ଶ୍ରେଣୀରେ ମୋଟ ୮୩ଟି ବିଷୟରେ ପରୀକ୍ଷା ହେବାକୁ ଥିବାବେଳେ ଦ୍ୱାଦଶ ଶ୍ରେଣୀରେ ୧୨୧ଟି ବିଷୟରେ ପରୀକ୍ଷା ଅନୁଷ୍ଠିତ ହେବ। ସମସ୍ତ ପରୀକ୍ଷା ସକାଳ ୧୦ଟା ୩୦ରୁ ଆରମ୍ଭ ହେବ। ତେଣୁ ପରୀକ୍ଷାର୍ଥୀମାନେ ନିଜ ନିଜ ବିଷୟ ଅନୁଯାୟୀ ପ୍ରସ୍ତୁତି ଯୋଜନା କରିପାରିବେ।
CBSEର ଅଫିସିଆଲ ୱେବସାଇଟ୍ cbse.gov.inରେ ଦଶମ ଓ ଦ୍ୱାଦଶ ଶ୍ରେଣୀର ପରୀକ୍ଷା ସୂଚୀ ଉପଲବ୍ଧ ରହିଛି। ଛାତ୍ରଛାତ୍ରୀମାନେ ୱେବସାଇଟ୍କୁ ଯାଇ ନିଜ ଶ୍ରେଣୀର ଡେଟସିଟ୍ ଡାଉନଲୋଡ୍ କରିପାରିବେ। ପରୀକ୍ଷା ତାରିଖ ଘୋଷଣା ପରେ ଏବେ ପରୀକ୍ଷାର୍ଥୀଙ୍କ ପାଇଁ ପ୍ରସ୍ତୁତିକୁ ଅଧିକ ଶୃଙ୍ଖଳିତ କରିବାର ସମୟ ଆସିଛି। ଡେଟସିଟ୍ ଅନୁଯାୟୀ ପ୍ରତ୍ୟେକ ବିଷୟ ପାଇଁ ସମୟ ବାଣ୍ଟିବା ସହ ପୁନରାବୃତ୍ତି ଓ ମକ୍ ଟେଷ୍ଟ୍ ଉପରେ ଗୁରୁତ୍ୱ ଦେବା ଜରୁରୀ।